ལྷ་ཤར་གྱི་ལུས་འཕགས་ཞེས་བགྱི་བའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་མཆིས་ཀྱིས། ལྷ་དེར་གཤེགས་ཏེ་བཀའ་སྩལ་དུ་གསོལ། དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། བདག་ལ་འཛམ་བུའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ། སྐྱེ་བོ་དང་མི་མང་པོས་གང་བ་ཡང་ཡོད། བདག་ལ་རིན་པོ་ཆེ་སྣ་བདུན་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་བློན་པོ་རིན་པོ་ཆེ་ཡང་ཡོད། བདག་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པ་སྟོང་ཡང་ཚང་། བདག་གི་ཕོ་བྲང་གི་ནང་དུ་ཡང་རིན་པོ་ཆེའི་ཆར་ཞག་བདུན་དུ་བབ་ན། ཤར་གྱི་ལུས་འཕགས་ཞེས་བྱ་བའི་གླིང་ཞིག་ཡོད་ཅེས་གྲག་གིས། མ་ལ་བདག་དེར་ཡང་སོང་ལ་རྗེས་སུ་བསྟན་པར་བྱའོ་སྙམ་པ་དང་། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དཔུང་གི་ཚོགས་བྱེ་བ་བརྒྱད་འབུམ་དང་ཐབས་ཅིག་ཏུ་བུ་སྟོང་གིས་ཡོངས་སུ་བསྐོར་ནས་མདུན་ནས་འགྲོ་བ་རིན་པོ་ཆེ་སྣ་བདུན་དང་ནམ་མཁའ་ལ་འཕགས་ཏེ། རྒྱལ་པོ་ང་ལས་ནུ་ཤར་གྱི་ལུས་འཕགས་ཀྱི་གླིང་དུ་ཆས་ནས་རྒྱལ་པོ་ང་ལས་ནུ་ཤར་གྱི་ལུས་འཕགས་ཀྱི་གླིང་དུ་གནས་ཏེ། རྒྱལ་པོ་ང་ལས་ནུས་ཇི་ལྟར་སེམས་ཅན་བསོད་ནམས་བྱས་པ། དགེ་བ་བྱས་པ། མཐུ་ཆེན་པོ། རྫུ་འཕྲུལ་ཆེན་པོས་རང་གི་བསོད་ནམས་ཀྱི་འབྲས་བུ་ཉམས་སུ་མྱོང་བ་ལྟར་ཤར་གྱི་ལུས་འཕགས་ཀྱི་གླིང་དུ་ལོ་མང་པོ་དང་། ལོ་བརྒྱ་ཕྲག་མང་པོ་དང་། ལོ་སྟོང་ཕྲག་མང་པོ་དང་། ལོ་བརྒྱ་སྟོང་ཕྲག་མང་པོར་རྗེས་སུ་བསྟན་པར་བྱས་སོ། །དེ་ཤར་གྱི་ལུས་འཕགས་གླིང་ན་རྗེས་སུ་སྟོན་པ་ལ་བརྒྱ་བྱིན་དྲུག་ཤི་འཕོས་པ་ལོན་ནོ། །ཡང་རྒྱལ་པོ་ང་ལས་ནུས་གནོད་སྦྱིན་ལྷ་གནས་ལ་སྨྲས་པ། བཀའ་འོག་ཏུ་མ་ཆུད་པའི་གླིང་གཞན་འགའ་ལྟ་ཡོད་དམ། ལྷ་གནས་ཀྱིས་སྨྲས་པ། ལྷ་ནུབ་ཀྱི་བ་ལང་སྤྱོད་ཅེས་བྱ་བའི་གླིང་འབྱོར་པ་དང་། རྒྱས་པ་དང་། བདེ་བ་དང་། ལོ་ལེགས་པ་དང་། སྐྱེ་བོ་དང་མི་མང་པོས་གང་བ་མཆིས་ཀྱིས་ལྷ་དེར་ཡང་གཤེགས་ཏེ་རྗེས་སུ་བསྟན་དུ་གསོལ།། །།