རང་རང་གི་ལས་སྒྲུབ་པར་མི་བྱེད་པས་ཞིང་ལས་ཀྱི་མཐའ་རྣམས་ཀྱི་བར་ཆད་བྱས་པས་དེ་བཞིན་རྒྱལ་པོའི་དཔྱ་ཐང་བཞིན་མི་འདུ་བར་གྱུར་ཏོ། །རྒྱལ་པོས་དྲིས་པ། ཤེས་ལྡན་དག་མཆོད་སྦྱིན་གྱི་ཁང་པ་དྲལ་ན་ཅིའི་ཕྱིར་ད་དུང་དཔྱ་ཉུང་བར་གྱུར། བློན་པོ་རྣམས་ཀྱིས་སྨྲས་པ། ལྷ་སྐྱེ་བོའི་ཚོགས་རང་རང་གི་རྒྱགས་བླངས་ནས་འཚལ་ཞིང་མཆོད་སྡོང་ལ་རྟོག་ཅིང་མཆིས་ཏེ་རང་གི་ལས་སྒྲུབ་པར་མི་བགྱིད་པས། ཞིང་ལས་ཀྱི་མཐའ་རྣམས་ཀྱི་བར་ཆད་བགྱིས་པས་དེས་ན་དཔྱ་ཉུང་བར་གྱུར་ཏོ། །དེ་ནས་རྒྱལ་པོ་སྒྲ་ཆེན་གྱིས་སྦྱིན་པ་དག་སྦྱིན། བསོད་ནམས་དག་བྱས་ནས་མཆོད་སྡོང་ཆུ་བོ་གང་གཱའི་ནང་དུ་བོར་རོ། །དགེ་སློང་དག་ཇི་སྙམ་དུ་སེམས། རྒྱལ་པོ་རབ་སྒྲོགས་ཀྱི་ཞང་པོ་མྱ་ངན་མེད་ཅེས་བྱ་བ་གང་ཡིན་པ་དེ་ནི་དགེ་སློང་ལེགས་ལྡན་འདི་ཉིད་ཡིན་ཏེ། འདིས་སྔོན་འདི་བསྟེན་ཏོ། །བཙུན་པ་མཆོད་སྡོང་འདི་གང་དུ་ཞིག་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་མ་འོངས་པ་ན་མི་རྣམས་ཀྱིས་ཚེ་ལོ་བརྒྱད་ཁྲི་ཐུབ་པར་འགྱུར་ཏེ། མི་ཚེ་ལོ་བརྒྱད་ཁྲི་པ་རྣམས་ཀྱི་རྒྱལ་པོ་དུང་ཞེས་བྱ་བ་ཡང་དག་པར་སྡོམ་པ། འཁོར་ལོས་སྒྱུར་བ་མཐའ་བཞིར་རྣམ་པར་རྒྱལ་བ། ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ཞིག་འབྱུང་བར་འགྱུར་རོ། །དེའི་རིན་པོ་ཆེ་སྣ་བདུན་ནི་འདི་ལྟ་བུ་དག་འབྱུང་བར་འགྱུར་ཏེ། འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་དང་། རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བདུན་པ་ནི་བློན་པོ་རིན་པོ་ཆེ་ཉིད་དོ། །དེ་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། ཕ་རོལ་གྱི་སྡེ་རབ་ཏུ་འཇོམས་པར་བྱེད་པ་སྟོང་ཡང་ཚང་བར་འབྱུང་བར་འགྱུར་ཏེ། དེ་རྒྱ་མཚོ་ལ་ཐུག་པའི་ས་ཆེན་པོ་མ་ལུས་པར་གནོད་པར་སྡོ་བ་མེད་ཅིང་འཚེ་བ་མེད་པ་འདི་ཉིད་ཆད་པ་མེད་ཅིང་མཚོན་གྱིས་བདའ་བ་མེད་ལ། ཆོས་དང་མཐུན་ཞིང་སྙོམས་པས་ལེགས་པར་ཕབ་སྟེ་གནས་པར་འགྱུར་རོ། །