ཀཽ་ཤི་ཀ་བདག་ཅག་རྒྱལ་པོ་རྣམས་ནི་དགའ་བ་མང་པོས་བག་མེད་པས་སྐད་ཅིག་ཏུ་བརྗེད་པར་འགྱུར་གྱིས། བདག་ལ་ཁྱོད་ཀྱིས་མཚན་མ་ཞིག་ཞོག་ཤིག་དང་། བདག་གིས་མཐོང་ནས་ངེས་པར་སྦྱིན་པ་དག་སྦྱིན། བསོད་ནམས་དག་བགྱིའོ། །དེ་ནས་ལྷའི་དབང་པོ་བརྒྱ་བྱིན་གྱིས་ལྷའི་བུ་ལས་ཐམས་ཅད་པ་ལ་བསྒོ་བ། ལས་ཐམས་ཅད་པ་སོང་ལ་ཁྱོད་ཀྱིས་རྒྱལ་པོ་སྒྲ་ཆེན་གྱི་གནས་སུ་ལྷའི་འཁོར་གྱི་ཁྱམས་དང་། ལྷའི་མཆོད་སྡོང་སྲིད་དུ་འདོམ་སྟོང་ཡོད་ལ། སྦོམས་སུ་འདོམ་དྲུག་བཅུ་ཡོད་པ། ཐམས་ཅད་གསེར་ལས་བྱས་ཤིང་རིན་པོ་ཆེ་སྣ་ཚོགས་ཀྱིས་སྤྲས་པ་ཞིག་སྤྲུལ་ཅིག །དེ་ནས་ལྷའི་བུ་ལས་ཐམས་ཅད་པས་རྒྱལ་པོ་སྒྲ་ཆེན་གྱི་གནས་སུ་ལྷའི་འཁོར་གྱི་ཁྱམས་དང་། ལྷའི་མཆོད་སྡོང་སྲིད་དུ་འདོམ་སྟོང་ཡོད་པ། སྦོམས་སུ་འདོམ་དྲུག་བཅུ་ཡོད་པ། ཐམས་ཅད་གསེར་ལས་བྱས་པ། རིན་པོ་ཆེ་སྣ་ཚོགས་ཀྱིས་སྤྲས་པ་ཞིག་སྤྲུལ་ཏོ། །དེ་ནས་རྒྱལ་པོ་སྒྲ་ཆེན་གྱིས་མཆོད་སྦྱིན་གྱི་ཁང་པ་རྩིག་ཏུ་བཅུག་ནས་རང་གི་ཞང་པོ་མྱ་ངན་མེད་ཅེས་བྱ་བ་མཆོད་སྡོང་གི་ཞལ་ཏ་བར་བཞག་གོ། །དེ་ནས་མཆོད་སྡོང་ལ་འཛམ་བུའི་གླིང་ན་གནས་པའི་མི་ཐམས་ཅད་ལྟ་བར་སྤྲོ་བས་ལྷགས་ནས་ཟས་ཟོས་ཤིང་མཆོད་སྡོང་ལྟ་བས་རང་གི་ལས་སྒྲུབ་པར་མི་བྱེད་དོ། །དེ་ནས་ཞིང་ལས་ཀྱི་མཐའ་རྣམས་བར་ཆད་བྱས་པས་རྒྱལ་པོའི་དཔྱ་ཐང་བཞིན་མི་འདུ་བར་གྱུར་ཏོ། །བློན་པོ་རྣམས་ཀྱིས་དཔྱ་ཉུང་ངུ་ཕུལ་བ་དང་རྒྱལ་པོ་སྒྲ་ཆེན་གྱིས་སྨྲས་པ། ཤེས་ལྡན་དག་ཅིའི་ཕྱིར་དཔྱ་ཉུང་ཟད་གཅིག་འབུལ། ལྷ་འཛམ་བུའི་གླིང་ན་གནས་པའི་སྐྱེ་བོའི་ཚོགས་མཆིས་ནས་འཚལ་མ་འཚལ་ཅིང་མཆོད་སྡོང་ལ་ལྟ་ཞིང་མཆིས་ཏེ་རང་གི་ལས་སྒྲུབ་པར་མི་བྱེད་པས་ཞིང་ལས་ཀྱི་མཐའ་རྣམས་ཀྱི་བར་ཆད་བགྱིས་པས་དཔྱ་ཐང་བཞིན་མི་འདུ་ལགས་སོ། །རྒྱལ་པོས་སྨྲས་པ། མཆོད་སྦྱིན་གྱི་ཁང་པ་དྲོལ་ཅིག །དེ་རྣམས་ཀྱིས་དེ་དྲལ་ན་ཡང་དེ་བཞིན་དུ་སྐྱེ་བོའི་ཚོགས་དེ་རང་རང་གི་རྒྱགས་བླངས་ནས་ཟ་ཞིང་མཆོད་སྡོང་ལ་རྟོག་ཅིང་འདུག་སྟེ། རང་རང་གི་ལས་སྒྲུབ་པར་མི་བྱེད་པས་ཞིང་ལས་ཀྱི་མཐའ་རྣམས་ཀྱི་བར་ཆད་བྱས་པས་དེ་བཞིན་རྒྱལ་པོའི་དཔྱ་ཐང་བཞིན་མི་འདུ་བར་གྱུར་ཏོ།