རྒྱལ་པོ་དུང་གི་མདུན་ན་འདོན་བྲམ་ཟེ་ཚངས་པའི་ཚེ་ཞེས་བྱ་བ་ཞིག་འབྱུང་སྟེ། དེའི་ཆུང་མ་ནི་ཚངས་ལྡན་མ་ཞེས་བྱ་བ་ཞིག་འབྱུང་ངོ་། །དེ་བྱམས་པ་ཚད་མེད་པའི་ཡན་ལག་གིས་རྒྱས་པར་བྱས་པས་བུ་བྱམས་པ་ཞེས་བྱ་བ་ཞིག་བཙའ་བར་འགྱུར་རོ། །བྲམ་ཟེ་ཚངས་པའི་ཚེ་བྲམ་ཟེའི་ཁྱེའུ་བརྒྱད་ཁྲི་ལ་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ། །དེས་བྲམ་ཟེའི་ཁྱེའུ་དེ་རྣམས་བྱམས་པ་ལ་གཏད་ནས་བྲམ་ཟེའི་ཁྱེའུ་བྱམས་པས་བྲམ་ཟེའི་ཁྱེའུ་བརྒྱད་ཁྲི་པོ་རྣམས་བྲམ་ཟེ་རྣམས་ཀྱི་གསང་ཚིག་ཀློག་ཏུ་འཇུག་གོ། །དེ་ནས་རྒྱལ་པོ་ཆེན་པོ་བཞི་པོ་རྣམས་ཀྱིས་གཏེར་ཆེན་པོ་བཞི་པོ། ཀ་ལིང་ཀ་ནས་དམར་སེར་ཏེ། །མི་ཐི་ལ་ནས་སྐྱ་བོ་ཡི། །ས་འཛིན་ནས་ནི་ཨེ་ལའི་འདབ། །བཱ་རཱ་ཎ་སཱིའི་གྲོང་ནས་དུང་། །མཆོད་སྡོང་འདི་ཡང་ཁྱེར་ནས་རྒྱལ་པོ་དུང་ལ་འབུལ་བར་འགྱུར་རོ། །རྒྱལ་པོ་དུང་གིས་ཀྱང་བྲམ་ཟེ་ཚངས་པའི་ཚེ་ལ་སྦྱིན་པར་འགྱུར་རོ། །བྲམ་ཟེ་ཚངས་པའི་ཚེས་ཀྱང་བྲམ་ཟེའི་ཁྱེའུ་བྱམས་པ་ལའོ། །བྲམ་ཟེའི་ཁྱེའུ་བྱམས་པས་ཀྱང་བྲམ་ཟེའི་ཁྱེའུ་དེ་རྣམས་ལའོ། །དེ་ནས་བྲམ་ཟེའི་ཁྱེའུ་དེ་རྣམས་ཀྱིས་མཆོད་སྡོང་དེ་དུམ་བུ་དུམ་བུར་བཅད་ནས་འགེད་པར་འགྱུར་རོ། །དེ་ནས་བྲམ་ཟེའི་ཁྱེའུ་བྱམས་པས་མཆོད་སྡོང་དེའི་མི་རྟག་པ་ཉིད་མཐོང་ནས། དེ་ཉིད་ཀྱིས་སྐྱོ་བ་སྐྱེས་ནས་ནགས་སུ་འགྲོ་བར་འགྱུར་རོ། །གང་གི་ཉི་མ་ཁོ་ན་ལ་ནགས་སུ་སོང་བ་དེ་ཁོ་ནའི་ཉི་མ་ལ་བྱམས་པ་ཚད་མེད་པའི་ཡན་ལག་གིས་རྒྱས་པར་བྱས་ནས་བླ་ན་མེད་པའི་ཡེ་ཤེས་ཐོབ་པར་འགྱུར་ཏེ། དེའི་མཚན་བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པ། བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པ་ཞེས་བྱ་བར་འགྱུར་རོ། །གང་གི་ཉི་མ་ཁོ་ན་ལ་ཡང་དག་པར་རྫོགས་པའི་སངས་རྒྱས་བྱམས་པས་བླ་ན་མེད་པའི་ཡེ་ཤེས་ཐོབ་པར་འགྱུར་བ་དེ་ཁོ་ནའི་ཉི་མ་ལ་རྒྱལ་པོ་དུང་གི་རིན་པོ་ཆེ་སྣ་བདུན་ནུབ་པར་འགྱུར་རོ། །རྒྱལ་པོ་དུང་ཡང་ཁམས་ཀྱི་རྒྱལ་ཕྲན་བརྒྱད་ཁྲིའི་འཁོར་དང་བླ་ན་མེད་པ་ཡང་དག་པར་རྫོགས་པའི་སངས་རྒྱས་བྱམས་པ་རབ་ཏུ་འབྱུང་བའི་རྗེས་སུ་རབ་ཏུ་འབྱུང་བར་འགྱུར་རོ།