ལས་དེའི་རྣམ་པར་སྨིན་པས་ངས་འཁོར་ལོས་སྒྱུར་བའི་རྒྱལ་པོ་ཉིས་སྟོང་ལྔ་བརྒྱ་བྱས་སོ། །ལས་དེ་ཁོ་ནའི་ལྷག་མས་ད་ལྟར་ང་མངོན་པར་རྫོགས་པར་བྱང་ཆུབ་པ་ན་ལྷ་དང་མི་རྣམས་ཀྱིས་རྩིབས་བརྒྱ་དང་ལྡན་པའི་གདུགས་ཉིས་སྟོང་ལྔ་བརྒྱ་དབུའི་གཙུག་གི་སྟེང་དུ་བཟུང་བར་གྱུར་ཏོ། །གལ་ཏེ་ངས་ཡོན་ཏན་གྱི་ཚོགས་འདི་ལྟ་བུ་རྟོགས་པར་མ་གྱུར་ན་གཞན་དུ་ཡང་ངས་འཁོར་ལོས་སྒྱུར་བའི་རྒྱལ་པོ་ཉིས་སྟོང་ལྔ་བརྒྱ་བྱེད་པར་འགྱུར་རོ། །དེ་ལྟ་བས་ན་ངའི་བསོད་ནམས་ཀྱི་རྣམ་པར་སྨིན་པ་ཅན་གང་ཡིན་པ་དེ་ངས་ཉན་ཐོས་རྣམས་ཀྱི་ལོངས་སྤྱོད་དུ་རྣམ་པར་སྨིན་པར་བསྔོས་ཏེ། གལ་ཏེ་མུ་ཏིག་བྲེ་གང་གིས་འབྲས་བྲེ་གང་ཁུགས་ཀྱང་འོན་ཀྱང་ངའི་ཉན་ཐོས་རྣམས་ནི་བསོད་སྙོམས་ཀྱིས་ཕོངས་པར་མི་འགྱུར་རོ། །དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན་ལ་ཞེས་བྱ་བ་ནས་བརྩལ་བར་བྱ་སྟེ། དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ་ཞེས་བྱ་བའི་བར་གོང་མ་བཞིན་དུའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་གྲུ་ཟམ་འཛུགས་སུ་བཅུག་པ་དང་། ཡངས་པ་ཅན་གྱི་ལིཙྪ་བཱི་རྣམས་ཀྱིས་ཀྱང་དེ་བཞིན་དུ་བཅོམ་ལྡན་འདས་ཀྱི་ཕྱིར་གྲུ་ཟམ་བཙུགས་སོ། །ཀླུ་རྣམས་ཀྱིས་བསམས་པ། བདག་ཅག་ཀླུ་རྣམས་ནི་རྣམ་པར་ལྟུང་བའི་ལུས་ཅན་ཡིན་པས་མ་ལ་བདག་ཅག་གིས་གདེངས་ཀའི་ཟམ་པས་བཅོམ་ལྡན་འདས་ཆུ་བོ་གང་གཱ་བསྒྲལ་བར་བྱའོ་སྙམ་ནས་དེ་རྣམས་ཀྱིས་གདེངས་ཀའི་ཟམ་པ་བཙུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཅག་ལས་གང་ཞིག་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་གྲུ་ཟམ་ལས་ཆུ་བོ་གང་གཱ་རྒལ་བར་སྤྲོ་བ་དེ་ནི་དེ་ལས་རྒོལ་ཅིག །གང་ཞིག་ཡངས་པ་ཅན་གྱི་ལིཙྪ་བཱི་རྣམས་ཀྱིས་གྲུ་ཟམ་བཙུགས་པ་ལས་སྤྲོ་བ་གང་ཡིན་པ་དེ་ཡང་དེ་ལས་རྒོལ་ཅིག །ང་ཡང་དགེ་སློང་ཀུན་དགའ་བོ་དང་ཐབས་ཅིག་ཀླུ་རྣམས་ཀྱི་གདེངས་ཀའི་ཟམ་པ་ལས་ཆུ་བོ་གང་གཱ་བརྒལ་བར་བྱའོ།