།ང་ཡང་དགེ་སློང་ཀུན་དགའ་བོ་དང་ཐབས་ཅིག་ཀླུ་རྣམས་ཀྱི་གདེངས་ཀའི་ཟམ་པ་ལས་ཆུ་བོ་གང་གཱ་བརྒལ་བར་བྱའོ། །དེ་ན་ཁ་ཅིག་ནི་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་གྲུ་ཟམ་ལས་རྒལ་ཏོ། །ཁ་ཅིག་ནི་ཡངས་པ་ཅན་གྱི་ལིཙྪ་བཱི་རྣམས་ཀྱི་གྲུ་ཟམ་ལས་རྒལ་ཏོ། །བཅོམ་ལྡན་འདས་ཀྱིས་ཀྱང་ཚེ་དང་ལྡན་པ་ཀུན་དགའ་བོ་དང་ཐབས་ཅིག་ཏུ་ཀླུ་རྣམས་ཀྱི་གདེངས་ཀའི་ཟམ་པ་ལས་རྒལ་ཏོ། །དེ་ནས་དགེ་བསྙེན་ཞིག་གིས་དེའི་ཚེ་ཚིགས་སུ་བཅད་དེ་སྨྲས་པ། ཁ་ཅིག་ཟམ་པ་བཙུགས་ནས་ཆུ་བྲན་བོར་ཏེ་རྒྱ་མཚོ་རྒལ། །སྐྱེ་བོ་རྣམས་ནི་གཟིངས་འཆའ་མཁས་པའི་སྐྱེ་བོ་རྣམས་ཆུ་རྒལ། །སངས་རྒྱས་བཅོམ་ལྡན་བྲམ་ཟེ་རྒལ་བར་གྱུར་ནས་སྐམ་ལ་བཞུགས། །དགེ་སློང་དག་འདིར་ཁྲུས་བྱེད་ཉན་ཐོས་རྣམས་ནི་གཟིངས་འཆའོ། །གལ་ཏེ་ཀུན་ན་ཆུ་ཡོད་ན། །ཁྲོན་པའི་ཆུས་ནི་ཅི་ཞིག་བྱ། །སྲེད་པའི་རྩ་བ་བཅད་ནས་ནི། །སུ་ཞིག་སྤྱོད་པ་ཚོལ་བར་བྱེད། །བཅོམ་ལྡན་འདས་ཀྱིས་ས་ཕྱོགས་གཞན་ཞིག་ན་མཐོ་ཞིང་མཐོ་བའི་ས་ཕྱོགས་ཞིག་གཟིགས་སོ། །གཟིགས་ནས་ཀྱང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་རྒྱལ་པོ་སྒྲ་ཆེན་འཛིན་གྱི་ལྷའི་མཆོད་སྡོང་སྲིད་དུ་འདོམ་སྟོང་ཡོད་ལ་སྦོམས་སུ་འདོམ་དྲུག་བཅུ་ཡོད་པ། ཐམས་ཅད་གསེར་ལས་བྱས་པ། རིན་པོ་ཆེ་སྣ་ཚོགས་ཀྱིས་སྤྲས་པ་ཞིག་ཡོད་དེ། སྦྱིན་པ་དག་བྱིན། བསོད་ནམས་དག་བྱས་ནས་ཆུ་བོ་གང་གཱའི་ནང་དུ་བོར་བ་གང་ཡིན་པ་དེ་ལྟ་བར་འདོད་དམ། བཅོམ་ལྡན་འདས་དེ་ལྟ་བའི་དུས་ལ་བབ་ལགས་སོ། །བདེ་བར་གཤེགས་པ་དེའི་ཚོད་ལ་བབ་ལགས་ཏེ། བཅོམ་ལྡན་འདས་ཀྱིས་གང་མཆོད་སྡོང་དེ་བསྒྲེང་ན་དགེ་སློང་རྣམས་ལྟ་བར་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་འཁོར་ལོ་དང་བཀྲ་ཤིས་དང་། གཡུང་དྲུང་འཁྱིལ་པ་དང་། དྲ་བས་འབྲེལ་པ། བསོད་ནམས་བརྒྱ་ཕྲག་དུ་མས་བསྐྱེད་པ། འཇིགས་པ་རྣམས་དབུགས་འབྱིན་པར་མཛད་པའི་ཕྱག་གིས་ས་ལ་རེག་པར་མཛད་པ་དང་། ཀླུ་རྣམས་ཀྱིས་བསམས་པ།