གདུ་བུ་རྒྱན་ཅན་དང་། གཞན་ཡང་རྒྱན་རྣམ་པ་སྣ་ཚོགས་ཀྱིས་བརྒྱན་ཅིང་གདུགས་དང་། རྒྱལ་མཚན་དང་། བ་དན་དག་བཙུགས་སོ། །དེ་ནས་དུས་གཞན་ཞིག་ན་རྒྱལ་པོ་ལེགས་མཐོང་ཆེན་པོ་བཙུན་མོའི་འཁོར་གྱིས་བསྐོར་ནས་སོ་གའི་དུས་ལ་བབ་པ་ན་མེ་ཏོག་གི་ཤིང་རྣམས་ཁ་འབུས་ཤིང་ངང་པ་དང་། ཀྲུང་ཀྲུང་དང་། རྨ་བྱ་དང་། ནེ་ཙོ་དང་། རི་སྐེགས་དང་། བྱ་ཀོ་ཀི་ལ་དང་། ཤང་ཤང་དེའུ་སྐད་འབྱིན་པའི་ཚལ་གསེབ་ཏུ་སྐྱེད་མོས་ཚལ་གྱི་གཞིར་སོང་ནས། དེ་སྐྱེད་མོས་ཚལ་ན་འཁྱམ་པ་ལས་དགྲ་བཅོམ་པའི་མཆོད་རྟེན་དེ་མཐོང་ངོ་། །དེ་ནས་སྐྱེད་མོས་ཚལ་སྲུང་བའི་མི་ལ་སྨྲས་པ། ཀྭའི་ནང་རྗེ་འདི་ཅི་ཡིན། དེས་སྨྲས་པ། ལྷ་བདག་གིས་ནི་མ་འཚལ་ཏེ། འོན་ཀྱང་འདིའི་དོན་ནི་བཙུན་མོས་འཚལ་ཏོ། །དེ་ནས་དེས་བཙུན་མོའི་འཁོར་རྣམས་ལ་སྨྲས་པ་དང་། དེ་དག་གིས་རྐང་པ་གཉིས་ལ་གཏུགས་ཏེ་སྨྲས་པ། ལྷ་མི་འཇིགས་པ་སྩལ་དུ་གསོལ། དེས་སྨྲས་པ། དེ་བཞིན་དུ་སྦྱིན་ནོ། །དེ་དག་གིས་སྐབས་དེ་རྒྱས་པར་སྨྲས་པ་དང་། རྒྱལ་པོས་སྨྲས་པ། ཁྱེད་ཅག་གིས་བུ་རྒྱལ་སྲིད་ལ་མངོན་པར་དགའ་ན་དེ་ཁོ་བོ་ལ་མ་གསོལ་བ་བཟང་པོ་མ་ཡིན་བ་ཞིག་བྱས་སོ། །གལ་ཏེ་གསོལ་བར་གྱུར་པ་དང་ཁོ་བོ་དེ་ཁོ་ན་ལ་རྒྱལ་སྲིད་ལ་དབང་བསྐུར་བས་དབང་བསྐུར་བར་འགྱུར་བ་ཞིག །འོན་ཀྱང་ངས་བདག་ཉིད་ཆེན་པོ་དེ་མྱ་ངན་ལས་འདས་པར་གྱུར་ཀྱང་གདུགས་དང་། ཅོད་པན་དང་། ཐོར་ཚུགས་གདགས་སོ་ཞེས་དེ་ནས་དེས་བུ་ལ་བྱམས་པས་རང་སངས་རྒྱས་ཀྱི་མཆོད་རྟེན་དེ་ལ་གདུགས་དང་། ཅོད་པན་དང་། ཐོར་ཚུགས་རྣམས་བཏགས་སོ། །དགེ་སློང་དག་ཇི་སྙམ་དུ་སེམས། དེའི་ཚེ་དེའི་དུས་ཀྱི་རྒྱལ་པོ་ཆེན་པོ་ལེགས་མཐོང་གང་ཡིན་པ་དེ་ནི་ང་ཉིད་ཡིན་ནོ། །གང་ཡང་ངས་དེ་ན་བུ་ལ་བྱམས་པས་རང་སངས་རྒྱས་ཀྱི་མཆོད་རྟེན་དེ་ལ་གདུགས་དང་། ཅོད་པན་དང་། ཐོར་ཚུགས་བཏགས་ཏེ། ལས་དེའི་རྣམ་པར་སྨིན་པས་ངས་འཁོར་ལོས་སྒྱུར་བའི་རྒྱལ་པོ་ཉིས་སྟོང་ལྔ་བརྒྱ་བྱས་སོ།