མཁན་པོ་དང་སློབ་དཔོན་མེད་པར་བྱང་ཆུབ་ཀྱི་ཕྱོགས་སུམ་བཅུ་རྩ་བདུན་གྱི་ཆོས་བསྐྱེད་ནས་རང་བྱང་ཆུབ་མངོན་སུམ་དུ་བྱས་སོ། །རང་སངས་རྒྱས་དེས་བསམས་པ། བདག་གིས་མ་དེ་རྣམས་ལ་ཁས་བླངས་པ་སྨྲ་དགོས་པས་སོང་ལ་སྔོན་གྱི་དམ་བཅས་པ་མཐར་དབྱུང་ངོ་སྙམ་ནས། བདག་ཉིད་ཆེན་པོ་དེ་དག་ནི་ངག་གིས་ཆོས་མི་སྟོན་གྱི་ལུས་ཀྱིས་ཡིན་པས་དེས་དེ་རྣམས་ཀྱི་མདུན་དུ་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པ་དག་གི་ཆོ་འཕྲུལ་དག་བྱ་བར་བརྩམས་སོ། །སོ་སོའི་སྐྱེ་བོ་ནི་རྫུ་འཕྲུལ་ལ་མྱུར་དུ་སེམས་གཏོད་པ་ཡིན་པས་དེ་དག་ཤིང་རྩ་བ་ནས་བཅད་པ་བཞིན་རྐང་པ་གཉིས་ལ་གཏུགས་ནས་སྨྲས་པ། འཕགས་པ་ཁྱོད་ཀྱིས་ཡོན་ཏན་གྱི་ཚོགས་འདི་ལྟ་བུ་རྟོགས་སམ། རྟོགས་སོ། །འཕགས་པ་ཁྱོད་ནི་བསོད་སྙོམས་བཞེད་པ་ལགས་ལ། བདག་ཅག་ཀྱང་བསོད་ནམས་འཚལ་བ་ལགས་ན། ཁྱོད་འདི་ཉིད་དུ་སྐྱེད་མོས་ཚལ་དུ་བཞུགས་ཤིག་དང་། བདག་ཅག་གིས་རྒྱུན་དུ་བསོད་སྙོམས་དབུལ་བར་བགྱིའོ། །རང་སངས་རྒྱས་དེས་ཁས་བླངས་ནས་དེ་དག་གིས་རང་སངས་རྒྱས་ལ་བསོད་སྙོམས་ཀྱིས་བཀུར་སྟིར་བྱ་བར་བརྩམས་སོ། །རང་སངས་རྒྱས་དེས་བསམས་པ། བདག་གི་ལུས་རྣག་ཅན་འདིས་བྱ་བ་གང་ཡིན་པ་དེ་ནི་བྱས་ཀྱིས། མ་ལ་བདག་ཕུང་པོ་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་འཇུག་གོ་སྙམ་ནས། དེ་ནས་དེ་ངང་པའི་རྒྱལ་པོ་འདབ་མ་བརྐྱང་བ་ལྟར་སྟེང་གི་ནམ་མཁའ་ལ་མངོན་པར་འཕགས་ནས་འབར་བ་དང་། གསལ་བ་དང་། ཆར་འབེབས་པ་དང་། གློག་འབྱིན་པའི་ཆོ་འཕྲུལ་དག་ཀྱང་བསྟན་ནས་ཕུང་པོ་ལྷག་མ་མེད་པའི་མྱ་ངན་ལས་འདས་པ་ཞི་བའི་དབྱིངས་སུ་ཞུགས་སོ། །དེ་ནས་དེ་དག་གིས་ཤིང་དྲི་ཞིམ་པོ་ཐམས་ཅད་སྤུངས་ཏེ། སྤུངས་ནས་བསྲེགས་ཏེ་མེའི་ཕུང་པོ་དེ་འོ་མས་བསད་ནས་རུས་པ་དེ་དག་གསེར་གྱི་བུམ་པའི་ནང་དུ་བཅུག་སྟེ། སྐྱེད་མོས་ཚལ་དེ་ཉིད་དུ་རུས་པའི་མཆོད་རྟེན་བརྩིགས་ཏེ་མགུལ་གདུབ་དང་། གདུ་བུ་རྒྱན་ཅན་དང་།