Degé Kangyur volume 2, F.104.a

པ་ན་ཚེ་དང་ལྡན་པ་ཡུལ་འཁོར་སྐྱོང་གི་ལག་པ་དང་། རྐང་པ་དང་། བཞིན་དང་། སྣ་དང་། སྨྲ་དངགས་དག་གི་མཚན་མ་ཤིན་ཏུ་ལེགས་པར་བཟུང་ནས་འདི་སྐད་ཅེས་ཀྱང་སྨྲས་སོ། །​རྗེའི་སྲས་ཡུལ་འཁོར་སྐྱོང་ལགས་སམ། སྲིང་མོ་ཁོ་བོ་སྐྱེ་བོ་དག་གིས་དེ་ལྟར་ཤེས་སོ། །​དེ་ནས་སྔོན་གྱི་བྲན་མོ་རྒན་མོ་དེ་རིངས་པ་རིངས་པར་ཚེ་དང་ལྡན་པ་ཡུལ་འཁོར་སྐྱོང་གི་ཕ་གང་ན་བ་དེར་སོང་སྟེ་ཕྱིན་ནས། ཚེ་དང་ལྡན་པ་ཡུལ་འཁོར་སྐྱོང་གི་ཕ་ལ་འདི་སྐད་ཅེས་སྨྲས་སོ། །​ཇོ་བོ་མཁྱེན་པར་མཛོད་ཅིག །​སྲས་ཡུལ་འཁོར་སྐྱོང་བང་མཛོད་སྟུག་པོ་ཅན་དུ་བྱོན་ནས་རིང་མོ་ཞིག་ལགས་ན་ཉིད་ཀྱི་ཁབ་ཏུ་ནི་བྱོན་མི་བཞེད་དོ། །​དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕས་ལག་པ་གཡོན་པས་སྐྲ་བསྡུས་ནས་རས་ཡུག་གཅིག་གི་སྨད་གཡོགས་བགོས་བཞིན་དུ་ཚེ་དང་ལྡན་པ་ཡུལ་འཁོར་སྐྱོང་གང་ན་བ་དེར་སོང་བ་དང་། དེའི་ཚེ་ཚེ་དང་ལྡན་པ་ཡུལ་འཁོར་སྐྱོང་རྩིག་དྲུང་ཞིག་ཏུ་འདུག་ནས་ཟན་དྲོན་རུལ་པ་ཞག་ལོན་པ་ཟ་བར་བྱེད་པ་དང་། དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་སྨྲས་སོ། །​ཡུལ་འཁོར་སྐྱོང་ཁྱོད་བང་མཛོད་སྟུག་པོ་ཅན་དུ་ཕྱིན་ནས་རིང་མོ་ཞིག་ལོན་ན་ཅིའི་ཕྱིར་རང་གི་ཁྱིམ་དུ་འཇུག་པར་མི་འདོད། ཟན་དྲོན་རུལ་པ་ཞག་ལོན་པ་ཁྱོད་ཀྱི་གྲེ་བར་ཡང་ཇི་ལྟར་འགྲོར་བཏུབ། ཁྱིམ་བདག་ཁྱོད་ཀྱི་ཁྱིམ་དུ་འོངས་ན་རྒྱ་གག་མ་གཏོགས་པ་སྦྱིན་པ་ཡང་མ་ཐོབ། བསྐྲད་ཀྱང་མ་བསྐྲད་པ་དང་མྱུར་བ་མྱུར་བར་བྱུང་ངོ་། །​བུ་ཡུལ་འཁོར་སྐྱོང་ཡིན་པར་ཁོ་བོས་མི་ཤེས་མོད། གལ་ཏེ ཁོ་བོས་ཤེས་ན་དེ་སྐད་མི་སྨྲ་བ་ཞིག །​བུ་ཡུལ་འཁོར་སྐྱོང་བཟོད་པར་གསོལ་ལོ། །​ཁྱིམ་བདག་བཟོད་དོ། །​དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕས་ཚེ་དང་ལྡན་པ་ཡུལ་འཁོར་སྐྱོང་ལ་ཡན་ལག་ཐམས་ཅད་ཀྱིས་འཁྱུད་པ་བྱས་ནས་རང་གི་ཁྱིམ་དུ་སྟན་བཤམས་པ་ཉིད་ལ་འདུག་ཏུ་བཅུག་གོ། །​དེ་ནས་ཚེ་དང་ལྡན་པ་ཡུལ་འཁོར་སྐྱོང་གི་ཕས་ཡུལ་འཁོར་སྐྱོང་གི་མ་ལ་འདི་སྐད་ཅེས་སྨྲས་སོ། །​བུ་ཡུལ་འཁོར་སྐྱོང་ཡུན་རིང་ཞིག་ལོན་ནས་



The English translation of this folio by 84000 Translating the words of the Buddha can be found at:
https://read.84000.co/translation/toh1-6.html?part=UT22084-001-006-8102#UT22084-001-006-8102