བདག་གི་མཚན་ཉིད་ནི་དེ་ལྟ་བུ་མ་ཡིན་པས་དེ་ལྟ་བས་ན་ཚོར་བ་བདག་མ་ཡིན། གལ་ཏེ་འདུ་ཤེས་བདག་ཡིན་ན་བདེ་བའི་ཚོར་བ་དག་ལ་བདེ་བ་རྗེས་སུ་འཇུག་པར་འགྱུར། སྡུག་བསྔལ་གྱི་ཚོར་བ་དག་ལ་སྡུག་བསྔལ་རྗེས་སུ་འཇུག་པར་འགྱུར། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་དག་ལ་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་རྗེས་སུ་འཇུག་པར་འགྱུར་ཏེ། གང་གཞན་གྱི་རྗེས་སུ་འཇུག་པར་འགྱུར་བ་དེ་ནི་བདག་གི་མཚན་ཉིད་མ་ཡིན་པས་དེ་ལྟ་བས་ན་འདུ་ཤེས་བདག་མ་ཡིན། གལ་ཏེ་འདུ་བྱེད་བདག་ཡིན་ན་དེ་དགེ་བ་དང་། མི་དགེ་བ་དང་། མི་གཡོ་བ་རྣམ་པ་གསུམ་སྟེ། རྣམ་པ་གསུམ་པོ་དེ་དག་གི་རྣམ་པར་སྨིན་པ་བདེ་བ་དང་། སྡུག་བསྔལ་དང་སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའོ། །དེ་ལ་ཅི་བདག་དགེ་བའམ་འོན་ཏེ་མི་དགེ་བའམ། འོན་ཏེ་མི་གཡོ་བའི་བདག་དེ་ནི་འགྱུར་བར་མི་འདོད་པས། དེ་ལྟ་བས་ན་འདུ་བྱེད་བདག་མ་ཡིན། གལ་ཏེ་རྣམ་པར་ཤེས་པ་བདག་ཡིན་ན་ཅིའི་ཕྱིར་བདེ་བའི་ཚོར་བ་དག་ལ་བདེ་བར་རྗེས་སུ་འཇུག་པར་འགྱུར། སྡུག་བསྔལ་གྱི་ཚོར་བ་དག་ལ་སྡུག་བསྔལ་གྱི་རྗེས་སུ་འཇུག་པར་འགྱུར། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བ་དག་ལ་བཏང་སྙོམས་རྗེས་སུ་འཇུག་པར་འགྱུར། བདག་དེ་ནི་འགྱུར་བར་མི་འདོད་པས་དེ་ལྟ་བས་ན་རྣམ་པར་ཤེས་པ་བདག་མ་ཡིན་ནོ་སྙམ་མོ། །དེ་འདི་སྙམ་དུ་སེམས་ཏེ། ཕུང་པོ་ལྔ་པོ་འདི་དག་ཐམས་ཅད་ནི་བདག་མེད་ཅིང་བདག་གི་བ་མེད་དེ། ཉོན་མོངས་པ་དག་ལས་ལས། ལས་དག་ལས་རྣམ་པར་སྨིན་པ། རྣམ་པར་སྨིན་པ་ལས་ཉོན་མོངས་པ་སྟེ། དེ་ལྟར་གསུམ་པོ་འདིའི་རྒྱུན་མི་འཆད་པར་འགྱུར་རོ་སྙམ་མོ། །དེ་ཏིང་ངེ་འཛིན་དེ་ལས་ལངས་ནས་འཁོར་བཞི་རྣམས་ལ་ཆོས་སྟོན་ཏེ། གྲོགས་པོ་དག་འདི་ལ་བདག་དང་བདག་གི་བ་མེད་དེ། རྐྱེན་དག་ཡོད་ན་འདུ་བྱེད་རྣམས་འབྱུང་བར་འགྱུར་ལ། རྐྱེན་དག་མེད་ན་འདུ་བྱེད་རྣམས་འབྱུང་བར་མི་འགྱུར་རོ། །དེ་དེ་ལྟར་ཆོས་སྟོན་པ་ན་སེམས་ཅན་ཁྲི་ཕྲག་དཔག་ཏུ་མེད་པ་དག་མི་སྐྱེ་བའི་ཆོས་ལ་བཟོད་པ་ཐོབ་བོ། །འདིར་འདུ་བྱེད་འདི་དག་ལ་མ་གཏོགས་པར་ཆོས་གང་ཡང་སྐྱེ་བའམ། འཇིག་པའམ་འཆི་བ་མེད་དེ། འདི་ལྟ་སྟེ། ཉོན་མོངས་པ་དག་ལས་ལས། ལས་དག་ལས་རྣམ་པར་སྨིན་པ་ཡིན་ནོ། །ཆོས་འདི་དག་ཐམས་ཅད་ནི་ངོ་བོ་ཉིད་དང་བྲལ་བ་ཡིན་ཏེ།