།མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་ཅིང་གྲངས་མེད་བསམ་གྱིས་མི་ཁྱབ་གཞལ་དུ་མེད། གཞལ་གྱིས་མི་ལང་བརྗོད་དུ་མེད་པའི་འཁོར་བ་དེའི་ཕ་རོལ་གྱི་ཡང་ཆེས་ཕ་རོལ་ན་དྲང་སྲོང་ཕྱི་མའི་མཐའ་སྒྲུབ་པ་ལ་མཁས་པ་ཞེས་བྱ་བ་རྫུ་འཕྲུལ་ཆེ་ཞིང་གཟི་བརྗིད་ཆེ་ལ་མཐུ་ཆེ་བ། ཕྱི་རོལ་གྱི་ལམ་གྱིས་འདོད་པ་དག་གི་འདོད་ཆགས་དང་བྲལ་བ་ཞིག་བྱུང་ངོ་། །དེ་གཅིག་པུ་དབེན་པར་སོང་སྟེ་ནང་དུ་ཡང་དག་འཇོག་ལ་ཞུགས་ནས་སེམས་ཀྱི་རྣམ་པར་རྟོག་པ་འདི་ལྟ་བུ་དག་སྐྱེས་ཏེ། ལས་ཀྱི་རྣམ་པར་སྨིན་པ་གང་གིས་འགྲོ་བའི་བྱེ་བྲག་སྣང་ངོ་སྙམ་མོ། །དེ་འདི་སྙམ་དུ་སེམས་ཏེ། སེམས་ཅན་སྣ་ཚོགས་པ་ཡིན་ལ་སེམས་ཅན་རྣམས་ཀྱི་རྒྱུད་ཀྱང་སྣ་ཚོགས་པ་ཡིན་ཏེ། དེ་ལྟར་ཉོན་མོངས་པ་སྣ་ཚོགས་དག་བྱུང་བས་ལས་སྣ་ཚོགས་དག་མངོན་པར་འདུ་བྱེད་པར་འགྱུར། ལས་སྣ་ཚོགས་དག་མངོན་པར་འདུ་བྱེད་པས་འགྲོ་བ་སྣ་ཚོགས་དག་དང་། སེམས་ཅན་དམྱལ་བ་རྣམས་ན་དམྱལ་བའི་བྱེ་བྲག །དུད་འགྲོའི་སྐྱེ་གནས་དག་ན་དུད་འགྲོའི་བྱེ་བྲག །གཤིན་རྗེའི་འཇིག་རྟེན་དག་ན་གཤིན་རྗེའི་བྱེ་བྲག །ལྷ་མ་ཡིན་དག་ན་ལྷ་མ་ཡིན་གྱི་བྱེ་བྲག །མི་དག་ལ་མིའི་བྱེ་བྲག། ལྷ་དག་ལ་ལྷའི་བྱེ་བྲག་དག་སྣང་ངོ་སྙམ་མོ། །དེ་འདི་སྙམ་དུ་སེམས་ཏེ། གང་གིས་འགྲོ་བ་དེ་དག་ཐམས་ཅད་བྱེ་བྲག་ཏུ་མི་འགྱུར་བའི་རྩི་སྨན་འགའ་ཡོད་དམ་སྙམ་མོ། །དེ་འདི་སྙམ་དུ་སེམས་ཏེ། སེམས་ཅན་ཐམས་ཅད་བདག་ལ་རབ་ཏུ་གནས་ནས། ཉོན་མོངས་པ་ཤིན་ཏུ་བསྐྱེད་ཉོན་མོངས་པའི་སེམས་ཀྱིས་ལས་མངོན་པར་འདུ་བྱེད་དེ། དེ་དག་གི་རྣམ་པར་སྨིན་པ་སྣ་ཚོགས་གྲུབ་བོ། །འོ་ན་བདག་གིས་ཆོས་དེ་དག་གི་བདག་གང་ཡིན་ཡོངས་སུ་བཙལ་བར་བྱའོ་སྙམ་ནས་ཅི་བདག་གཟུགས་ཡིན་ནམ། གལ་ཏེ་རེ་ཞིག་བདག་གཟུགས་སུ་སྣང་ན་གཟུགས་འཕེལ་བ་དང་ཡོངས་སུ་འགྲིབ་པ་ན་གང་གི་ཚེ་བདག་འཕེལ་བ་དང་ཡོངས་སུ་འགྲིབ་པར་མཐོང་བ་དེ་ལྟར་ནི་མ་ཡིན་ཏེ། དེ་ལྟ་བས་ན་བདག་གཟུགས་མ་ཡིན་ནོ། །གལ་ཏེ་ཚོར་བ་བདག་ཡིན་ན་དེ་ཡིད་བདེ་བའི་གནས་དག་ལ་བདེ་བར་འགྱུར། ཡིད་མི་བདེ་བའི་གནས་དག་ལ་སྡུག་བསྔལ་བར་འགྱུར། བཏང་སྙོམས་ཀྱི་གནས་དག་ལ་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པར་འགྱུར་ཏེ། བདག་གི་མཚན་ཉིད་ནི་དེ་ལྟ་བུ་མ་ཡིན་པས་དེ་ལྟ་བས་ན་ཚོར་བ་བདག་མ་ཡིན།