།མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་འགོག་པ་མཐོང་བ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་པོ་འགོག་པ་མཐོང་བ་ཞེས་བྱ་བར་གྱུར་ཏེ། དེ་ང་ཡིན་ཏེ་ད་ལྟར་བྱུང་བའི་ཆོས་ཀྱང་འགོག་པའི་ཆོས་སུ་རབ་ཏུ་ཤེས་སོ། །དེ་འདི་སྙམ་དུ་སེམས་ཏེ། ཀྱེ་མ་འཇིག་རྟེན་གནས་པ་འདི་ནི་འགོག་པའི་ཆོས་དང་། ཆོས་རྣམས་ལ་སྤྱོད་པ་ཉོན་མོངས་སོ་སྙམ་མོ། །དེ་ང་ཡིན་ཏེ་སྐྱེ་བོའི་ཚོགས་མང་པོའི་ནང་དུ་འདུག་ནས་ཆོས་ཐམས་ཅད་ནི་འགོག་པའི་ཆོས་སོ་ཞེས་ཆོས་བསྟན་ཏོ། །དེས་ན་ངས་སྔོན་སྲོག་ཆགས་ཁྲི་ཕྲག་དཔག་ཏུ་མེད་པ་དག་མངོན་པར་འདུ་བྱེད་པ་མེད་པ་ལ་རབ་ཏུ་བཙུད་དོ། །ལྷ་དང་མི་རྣམས་ལ་ཡང་དག་པར་རབ་ཏུ་བསྟན་ཏེ། ངའི་ཚངས་པར་སྤྱོད་པ་རྒྱ་ཆེ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་འགོག་པ་ལ་མཁས་པར་བྱའོ། །འགོག་པ་ལ་མཁས་པའི་བྱང་ཆུབ་སེམས་དཔའ་ནི་ཕྱིར་མི་ལྡོག་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ། །མཽད་གལ་གྱི་བུ་ངས་རིམ་པ་ཤེས་པ་འགོག་པར་འགྱུར་བའི་ལམ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྒྱ་ཆེ་བ་མངོན་པར་འདུས་བྱས་ཏེ། དེ་བཞིན་དུ་སྦྱར་རོ། །མཽད་གལ་གྱི་བུ་སྔོན་བྱུང་བ་འདས་པའི་དུས་ནས་དེའི་ཕ་རོལ་གྱི་ཡང་ཆེས་ཕ་རོལ་ན་རྒྱལ་པོ་རོ་མྱང་བ་དང་ཉེས་དམིགས་ལ་མཁས་པ་ཞེས་བྱ་བ་ཞིག་བྱུང་ངོ་། །དེ་ཆོས་ཐམས་ཅད་ཀྱི་རོ་མྱང་བ་དང་ཉེས་དམིགས་ནི་རབ་ཏུ་ཤེས་ན་ངེས་པར་འབྱུང་བ་དེ་དག་རབ་ཏུ་མི་ཤེས་སོ། །དེ་འདི་སྙམ་དུ་སེམས་ཏེ། ཆོས་འདི་དག་ལ་ངེས་པར་འབྱུང་བ་རབ་ཏུ་ཤེས་པ་སུ་ཞིག་ཡོད་སྙམ་ནས། དེའི་མཚན་མོ་ཉལ་དུ་སོང་བ་དང་། སངས་རྒྱས་ཀྱི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དག་དང་ལྡན་པ་བྱུང་ནས་དེས་དེ་ལ་བཀའ་སྩལ་པ། རྒྱལ་པོ་ཁྱོད་སྐྱེ་བོ་མང་པོ་ལ་ཕན་པ་དང་། སྐྱེ་བོ་མང་པོ་ལ་བདེ་བ་དང་། འཇིག་རྟེན་ལ་སྙིང་བརྩེ་བའི་ཕྱིར་ཚུལ་བཞིན་དུ་སེམས་བསྐྱེད་པ་དེ་ལེགས་སོ་ལེགས་སོ། །རྒྱལ་པོ་ཆེན་པོ་དེའི་ཕྱིར་ཁྱོད་ཉིད་ཀྱིས་ཤེས་པར་གྱིས་ཤིག །མངོན་པར་འདུ་བྱེད་པ་མེད་པ་ནི་ངེས་པར་འབྱུང་བ་ཡིན་ཏེ། གང་མངོན་པར་འདུ་མི་བྱེད་པ་དེ་མི་འབྱུང་ངོ་། །གང་མ་བྱུང་ན་དེ་ངེས་པར་འབྱུང་བ་ཞེས་བྱའོ།