བདག་གི་ཉོན་མོངས་པ་ཁོང་དུ་ཆུད་པར་བྱས་སོ། །དེ་བདག་གི་ལས་དང་བདག་གི་ཉོན་མོངས་པ་དེ་དག་ཡོངས་སུ་ཤེས་པ་ན། འདོད་པ་རྣམས་ལ་འདོད་ཆགས་དང་བྲལ་བ་རྗེས་སུ་ཐོབ་བོ། །དེ་དག་ལུས་ཞིག་ནས་ཤི་བའི་འོག་ཏུ་ཚངས་པའི་འཇིག་རྟེན་དུ་སྐྱེས་སོ། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན་རྒྱལ་པོ་ཉོན་མོངས་པ་སྨོད་པ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་རྒྱལ་པོ་ཉོན་མོངས་པ་སྨོད་པ་ཞེས་བྱ་བར་གྱུར་ཏོ། །ངས་དེའི་ཚེ་བུད་མེད་ཁྲི་ཕྲག་དགུ་བཅུ་པོ་དེ་དག་ལས་དང་ཉོན་མོངས་པ་ཁོང་དུ་ཆུད་པར་བྱས་སོ། །ཁོང་དུ་ཆུད་པ་ན་ལས་དང་ཉོན་མོངས་པ་ཡོངས་སུ་ཤེས་ནས་ཚངས་པའི་འཇིག་རྟེན་དུ་སྐྱེས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་ཉོན་མོངས་པ་སྤང་བར་བྱའོ།། །།བམ་པོ་ཉི་ཤུ་གཉིས་པ། མཽད་གལ་གྱི་བུ་ངས་རིམ་པ་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ནས་དེ་བཞིན་དུ་སྦྱར་ཏེ། མངོན་པར་འདུས་བྱས་པའི་བར་དུའོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན། རྒྱལ་པོ་འགོག་པ་མཐོང་བ་ཞེས་བྱ་བ་ཞིག་བྱུང་ངོ་། །དེ་ཆོས་སྐྱེ་བ་གང་དང་གང་མཐོང་བ་དེ་དང་དེ་ཉིད་ལ་འགོག་པར་རྣམ་པར་རྟོག་གོ། །དེ་འདི་སྙམ་དུ་སེམས་ཏེ། དངོས་པོ་གང་དག་ཀུན་འབྱུང་བའི་ཆོས་ཅན་དེ་དག་ཐམས་ཅད་ནི་འགོག་པའི་ཆོས་ཅན་ནོ། །འབྱོར་པ་ཡང་འགོག་པའི་ཆོས་ཅན་ཡིན་ལ། རྒུད་པ་ཡང་འགོག་པའི་ཆོས་ཅན་ནོ། །རྙེད་པ་ཡང་འགོག་པའི་ཆོས་ཅན་ཡིན་ལ། མ་རྙེད་པ་ཡང་འགོག་པའི་ཆོས་ཅན་ནོ། །དེ་བཞིན་དུ་སྦྱར་ཏེ་གྲགས་པ་དང་། མ་གྲགས་པ་དང་། སྨད་པ་དང་། བསྟོད་པ་དང་། བདེ་བ་དང་། སྡུག་བསྔལ་བ་ཡང་འགོག་པའི་ཆོས་ཅན་ནོ་སྙམ་མོ། །དེ་འདི་སྙམ་དུ་སེམས་ཏེ། ཆོས་འདི་དག་མངོན་པར་འདུས་མ་བྱས་ན་མི་སྐྱེ་སྟེ། གང་འགོག་པའི་ཆོས་ཅན་འདི་དག་ཐམས་ཅད་དེ་ཅི་སྟེ་མངོན་པར་བསྐྱེད་པར་བྱ། གང་སྐྱེ་བ་མེད་པ་དེ་ལ་འགོག་པ་མེད། གང་འགོག་པ་མེད་པ་དེ་ལ་མྱ་ངན་མེད་ཅིང་སྨྲེ་སྔགས་འདོན་པ་མེད་དོ། །དེ་ལྟ་བས་ན་མ་བྱས་པ་ཉིད་མཆོག་ཡིན་ནོ་སྙམ་མོ། །མཽད་གལ་གྱི་བུ་དེ་ཇི་སྙམ་དུ་སེམས།