སངས་རྒྱས་ཀྱི་མཐུས་རླུང་བསིལ་བ་བདེ་བ་དག་ལངས་ཤིང་སྤོས་ཆུའི་ཆར་དག་མངོན་པར་རབ་ཏུ་བབ་པོ། །དེ་ནས་དེ་བཞིན་གཤེགས་པ་འོད་ཟེར་དཔག་མེད་དེས་ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུའི་བསམ་པ་ཐུགས་སུ་ཆུད་ནས། བདུད་རྩིའི་འོད་བསིལ་བ་བཏང་ངོ་། །དེའི་བདུད་རྩིའི་བསིལ་བ་དེས་དེ་ལམ་གྱིས་དུབ་པ་མེད་པར་མཛད་དོ། །དེ་བཞིན་གཤེགས་པས་དེའི་ལུས་དུབ་པ་མེད་པར་ཐུགས་སུ་ཆུད་ནས་ཤིང་ཏལ་གཅིག་ཙམ་དུ་ནམ་མཁའ་ལ་མངོན་པར་འཕགས་ཏེ་འཆག་གོ། །ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུ་དེས་བཅོམ་ལྡན་འདས་དེ་བཞིན་གཤེགས་པ་འོད་ཟེར་དཔག་མེད་དེ་མཛེས་ཤིང་སྡུག །དབང་པོ་ཞི་ཐུགས་ཞི་བ་བར་སྣང་ལ་འཆག་ཅིང་བཞུགས་པ་མཐོང་ངོ་། །མཐོང་ནས་ཀྱང་ཚིགས་སུ་བཅད་དེ་གསོལ་པ། ཇི་ལྟར་ཐོས་པ་དེ་བཞིན་མཐོང་། །དེ་བས་ཀྱང་ནི་ལྷག་པར་བཟང་། །འཇིག་རྟེན་དག་ན་ཁྱོད་དང་ནི། །ཡེ་ཤེས་ཡོན་ཏན་འདྲ་མ་མཆིས། །དེ་ལ་དེ་བཞིན་གཤེགས་པ་འོད་ཟེར་དཔག་མེད་དེས་སླར་ཚིགས་སུ་བཅད་དེ་བཀའ་སྩལ་པ། ཁྱིམ་བདག་ཁྱོད་ཀྱིས་ཚིག་སྨྲས་པ། །དབེན་པར་འགྱུར་བ་ཡིན་ཏེ་ལེགས། །ཇི་ལྟར་འདིར་ནི་ཡུན་རིང་དུ། །དགེ་བའི་རྩ་བ་ཤིན་ཏུ་བསྟེན། །འཇིག་རྟེན་དག་ན་ང་འདྲ་མེད། །ང་ལས་ལྷག་འགྱུར་ག་ལ་ཡོད། །ཁྱིམ་བདག་ཅུང་ཟད་ཡིད་ལ་ནི། །ཞུ་བ་གང་དག་འདོད་པ་ཞུས། །དེས་པ་ཁྱོད་ཀྱི་འདོད་པ་གང་། །ང་ཡིས་ཁྱོད་ཀྱི་སེམས་རངས་བྱ། །ང་ལ་ཅུང་ཟད་གང་འདྲི་བ། །དེ་རིང་ཐེ་ཙོམ་མེད་པར་བྱ། །དེ་ནས་ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུས་དེ་བཞིན་གཤེགས་པ་འོད་ཟེར་དཔག་མེད་དེ་ལ་ཚིགས་སུ་བཅད་དེ་གསོལ་པ། ཇི་ལྟར་བསམ་གཏན་ལངས་ནས་མཆིས། །བསམ་གཏན་བསམ་གཏན་ཡོན་ཏན་དགའ། །འདི་ལ་ཡིད་གཞོལ་ཇི་ལྟར་འགྱུར། །ཞུས་པ་དེ་དག་བདག་ལ་གསུངས། །དགེ་བའི་རྩ་བ་གང་གིས་ནི། །ཤེས་པ་དེ་ནི་རྟོགས་པར་འགྱུར། །ལྡན་པ་དང་ནི་ཤེས་པའི་རྒྱུ། །ཞུས་པ་དེ་དག་བདག་ལ་གསུངས། །དེ་ལ་དེ་བཞིན་གཤེགས་པ་འོད་ཟེར་དཔག་མེད་དེས་ལུང་བསྟན་པ་ཚིགས་སུ་བཅད་པ་གཅིག་གིས་ཡོངས་སུ་མགུ་བར་མཛད་དེ།