།དཔག་ཚད་ཇི་སྙེད་སོང་བས་སུ། །དེ་བཞིན་གཤེགས་པ་མཐོང་བར་འགྱུར། །དེས་ཡང་བར་སྣང་ལ་འདུག་པ་ལས་སྒྲ་ཐོས་པ། དཔག་ཚད་བྱེ་བ་ཕྲག་བཅུ་དང་། །དཔག་ཚད་བརྒྱ་ཕྲག་བཅུ་དག་ན། །གང་ན་རྫོགས་སངས་རྒྱས་བཞུགས་པ། །དེར་ནི་སོང་སྟེ་ཡོངས་སུ་ཞུས། །དེས་སྒྲ་དེ་ཐོས་ནས་བློན་པོ་རྣམས་ལ་སྨྲས་པ། གྲོང་གི་གཙོ་བོ་དག །བཞོན་པ་བཟང་པོ་མྱུར་དུ་སྦྱོར་ཅིག །ཤར་གྱི་ཕྱོགས་ཀྱི་ཕྱོགས་ཆ་ན་དཔག་ཚད་བྱེ་བ་ཕྲག་བཅུ་དང་། དཔག་ཚད་སྟོང་ན་གྲོང་ཁྱེར་ལྷུན་པོའི་རྒྱལ་མཚན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་འོད་ཟེར་དཔག་མེད་ཅེས་བྱ་བ་བཞུགས་ཤིང་ཉེ་བར་གནས་ཏེ། དེར་དེ་བཞིན་གཤེགས་པ་དེ་ལ་བལྟ་བ་དང་བསྙེན་བཀུར་བྱ་བའི་ཕྱིར་འདོང་ངོ་། །བློན་པོ་དག་གིས་བཀའ་བཞིན་འཚལ་ཞེས་ཁྱིམ་བདག་དབེན་པ་འདོད་པའི་ལྟར་མཉན་ནས་བཞོན་པ་བཟང་པོ་དག་བཤམས་སོ། །བཤམས་ནས་གསོལ་པ། ཇོ་བོ་གང་གི་དུས་ལ་དབབ་པར་མཁྱེན་ན་བཞོན་པ་བཟང་པོ་དག་བཤམས་ལགས་སོ། །དེ་ནས་ཁྱིམ་བདག་དབེན་པ་འདོད་པ་ཤིང་སཱ་ལ་ཆེན་པོ་ལྟ་བུ་བཞོན་པ་བཟང་པོ་ལ་ཞོན་ཏེ་རང་གི་གྲོང་ཁྱེར་ནས་བྱུང་ངོ་། །དེ་གང་དང་གང་དུ་འགྲོ་བ་དེ་དང་དེར་སྐྱེ་བོ་ཐམས་ཅད་ཕྱི་བཞིན་འབྲང་ངོ་། །དེ་བཅོམ་ལྡན་འདས་དེ་བཞིན་གཤེགས་པ་འོད་ཟེར་དཔག་མེད་ག་ལ་བ་དེར་སོང་སྟེ། སངས་རྒྱས་ཀྱི་མཐུས་གནས་གཙང་མའི་ལྷ་དེ་དག་གིས་རིམ་གྲོ་ཡོངས་སུ་སྤྱད་པར་བྱེད་དོ། །དེའི་ཚེ་གྲོང་ཁྱེར་ལྷུན་པོའི་རྒྱལ་མཚན་གྱི་ཕྱོགས་ན་སྐྱེད་མོས་ཚལ་ཀུན་ནས་མཛེས་པ་ཞེས་བྱ་བ་དེ་ན་དེ་བཞིན་གཤེགས་པ་དེ་བཞུགས་ཏེ། འདི་ལྟར་དེ་བཞིན་གཤེགས་པ་བཞུགས་པས་སྐྱེད་མོས་ཚལ་དེ་དཔལ་འབར་ཞིང་ལྷན་ནེ་ལྷང་ངེ་བར་རྒྱང་རིང་པོ་ཉིད་ནས་མཐོང་ངོ་། །དེ་བཞོན་པའི་ས་ཇི་ཙམ་པ་དེ་ཙམ་དུ་བཞོན་པས་སོང་སྟེ། བཞོན་པ་ལས་བབས་ནས་རྐང་ཐང་བས་ཡོངས་སུ་བསྐོར་ཅིང་རྐང་ཐང་བས་མདུན་དུ་བདར་ནས། རྐང་ཐང་བས་སྐྱེད་མོས་ཚལ་ཀུན་ནས་མཛེས་པར་ཞུགས་སོ། །དེ་སྐྱེད་མོས་ཚལ་དེར་ཞུགས་པ་ན། སངས་རྒྱས་ཀྱི་མཐུས་རླུང་བསིལ་བ་བདེ་བ་དག་ལངས་ཤིང་སྤོས་ཆུའི་ཆར་དག་མངོན་པར་རབ་ཏུ་བབ་པོ།