།དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པའི་གཉེན་རྙིང་བ་སྣག་གི་གཉེན་མཚམས་སྔོན་གྱི་ལྷ་ཞིག་གིས་རྒྱལ་པོའི་ཕོ་བྲང་དེ་སྣང་བར་བྱས་ནས་ལུས་མ་སྦས་པར་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་ལ་ཚིགས་སུ་བཅད་དེ་སྨྲས་པ། རྒྱལ་པོ་ཆེན་པོ་ལེགས་སོ་ལེགས། །མི་ཡི་བདག་པོ་ཁྱོད་ལེགས་སོ། །འཇིག་རྟེན་ཀུན་ལ་ཕན་འདོད་པ། །ཁྱོད་ཀྱི་སེམས་ཀྱི་བསམ་པ་ལེགས། །དེ་བཞིན་གཤེགས་པ་འཇིག་རྟེན་བཞུགས། །མཚན་ནི་ནྱ་གྲོ་དྷ་ཞེས་བོད། །སངས་རྒྱས་དེ་དྲུང་དེ་སོང་ལ། །སྐྱེ་བོའི་བདག་པོས་ཡོངས་སུ་ཞུས། །ལྷ་དེ་ཡི་ནི་ཚིག་དེ་དག །མི་ཡི་བདག་པོས་ཐོས་ནས་སུ། །སེམས་དགའ་ཡིད་ནི་མགུ་གྱུར་ནས། །ལྷ་ལ་མངོན་པར་སྨྲས་པ་ནི། །འཇིག་རྟེན་གསལ་བར་མཛད་པ་ཡི། །རྐང་གཉིས་མཆོག་ནི་ཡུལ་གང་ན། །བཞུགས་པ་དེར་ནི་བདག་མཆི་ཞིང་། །བསྙེན་བཀུར་དག་ནི་རབ་ཏུ་བྱ། །དེ་ནས་ལྷ་དེས་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་ལ་ཚིགས་སུ་བཅད་དེ་སྨྲས་པ། ཤར་ཕྱོགས་འདི་ཡི་ཕྱོགས་ཆ་ན། །གྲོང་ཁྱེར་ལྷུན་པོ་འབྱུང་བ་ཡོད། །དེ་ན་མགོན་པོ་དེ་བཞུགས་ཏེ། །སྲོག་ཆགས་རྣམས་ལ་ཆོས་སྟོན་ཏོ། །དེ་ནི་འཇིག་རྟེན་ཡོན་གནས་ཏེ། །ཕ་རོལ་དག་གི་ཕུལ་བས་འཚོ། །སེམས་ཅན་རྣམས་ལ་ཐུགས་བརྩེའི་ཕྱིར། །ཡོན་གནས་སོ་སོར་བཞེས་པར་མཛད། །བསྐལ་པ་བྱེ་བ་སྟོང་ཕྲག་ཏུ། །དེ་བཞིན་གཤེགས་པ་དེ་བཞུགས་ཏེ། །རྒྱལ་པོ་ཆེན་པོ་དེ་བཞིན་གཤེགས། །འཁྲུག་པ་མི་མངའ་འདོད་ཆགས་བྲལ། །སེམས་ཅན་ཀུན་ལ་ཐུགས་བརྩེའི་ཕྱིར། །ཡོན་ནི་སོ་སོར་བཞེས་པར་མཛད། །ཡོངས་སུ་གསོལ་ནས་སྟོན་པར་མཛད། །ཡོན་གྱི་འབྲས་བུ་འདི་ཡིན་ནོ། །ཐུབ་པ་འཇིག་རྟེན་ཀུན་ལ་མཁས། །འཇིག་རྟེན་གསུམ་གྱི་བསོད་ནམས་ཞིང་། །དེ་དྲུང་སོང་ལ་བསྙེན་བཀུར་གྱིས། །དེ་ནི་ཁྱོད་ཀྱི་ལུང་སྟོན་མཛད། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པ་ལྷ་དེས་བསྐུལ་བ་དྲན་ནས། དེའི་མཚན་མོ་འདས་ཏེ། དེའི་བློན་པོ་རྣམས་བསྡུས་སོ། །བསྡུས་ནས་སྨྲས་པ། གྲོང་གི་གཙོ་བོ་དག་གང་ཤེས་པར་གྱིས་ཤིག །ཤར་ཕྱོགས་ཀྱི་ཕྱོགས་ཆ་ན་གྲོང་ཆེན་པོ་ལྷུན་པོ་འབྱུང་བ་ཞེས་བྱ་བ་ཡོད་དེ།