དྲན་པ་དང་ལྡན་པའི་འདུ་ཤེས་ཡང་དག་པར་མི་སྤྱོད་དེ་འདོད་པའི་འདོད་ཆགས་ཀུན་ནས་དཀྲིས་པའི་སེམས་ལ་ཀུན་ཏུ་མི་གནས། ཞེ་སྡང་ཀུན་ནས་དཀྲིས་པའི་སེམས་དང་། གཏི་མུག་ཀུན་ནས་དཀྲིས་པའི་སེམས་ལ་ཀུན་ཏུ་མི་གནས་ཏེ་ཡོངས་སུ་དག་པའི་ཡིད་ཀྱིས་རྟག་ཏུ་བྱང་ཆུབ་ཀྱི་སེམས་དང་བྲལ་བས་ནམས་ཀྱང་མི་གནས་སོ། །འོང་བ་དང་འགྲོ་བ་དང་གནས་པ་དང་འདུག་པ་དང་ཉལ་བ་དང་གཉིད་ལོག་པ་ན་དེ་རྒྱགས་པའང་མེད་ན་བག་མེད་པ་ལྟ་ག་ལ་ཞིག་ཡོད། གཞན་དུ་ན་བྱང་ཆུབ་ཀྱི་སེམས་ཀྱི་རྒྱུན་རབ་ཏུ་འཇུག་སྟེ། སེམས་ཅན་སྡུག་བསྔལ་བ་རྣམས་ལ་བྱམས་པ་དང་ལྡན། སེམས་ཅན་ཉོན་མོངས་པ་རྣམས་ལ་སྙིང་རྗེ་དང་ལྡན་སེམས་ཅན་བདེ་བ་རྣམས་ལ་དགའ་བ་དང་ལྡན། སེམས་ཅན་བྱ་བ་ཡོངས་སུ་རྫོགས་པ་རྣམས་ལ་བཏང་སྙོམས་དང་ལྡན་པར་སེམས་བསྐྱེད་དོ། །མཚན་མོ་ཉལ་བ་ན་སེམས་སྐྱེད་པར་བྱེད་པ་ནི་འཇིག་རྟེན་ན་བདག་གི་དགེ་བའི་རྩ་བ་བསྐྱེད་པར་བྱ་བའི་ཡོན་གནས་ཡོངས་སུ་འཛིན་པ་སུ་ཡོད་གང་ལ་བདག་ཤེས་པར་བྱ། བསམ་གཏན་དང་པོ་ལ་ཇི་ལྟར་སྙོམས་པར་འཇུག་པར་བྱ། བསམ་གཏན་དང་པོ་ལས་ཇི་ལྟར་ལྡང་བར་བྱ། དེ་བཞིན་དུ་བསམ་གཏན་བཞི་པའི་བར་ལ་ཇི་ལྟར་སྙོམས་པར་འཇུག་པར་བྱ། བསམ་གཏན་བཞི་པ་ལས་ཇི་ལྟར་ལྡང་བར་བྱ། དེ་བཞིན་དུ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དག་གི་གནས་ཤེས་པ་ལ་ཇི་ལྟར་སྙོམས་པར་འཇུག་པར་བྱ། གནས་ཤེས་པ་ལ་ཇི་ལྟར་ལྡང་བར་བྱ། དེ་བཞིན་དུ་ཇི་ལྟར་གནས་ཤེས་པ་ཀུན་འབྱུང་བ་ཤེས་པ་དང་། ཇི་ལྟ་བུར་གནས་ཤེས་པ་འགོག་པ་ཤེས་པ་དང་། ཇི་ལྟར་གནས་ཤེས་པ་འགོག་པར་འགྱུར་བའི་ལམ་ཤེས་པ་ལ་སྙོམས་པར་འཇུག་པར་བྱ། ཇི་ལྟར་གནས་ཤེས་པ་འགོག་པར་འགྱུར་བའི་ལམ་ཤེས་པ་ལས་ལྡང་བར་བྱ། དེ་བཞིན་དུ་གནས་ཤེས་པ་དང་། ཀུན་འབྱུང་བ་དང་། འགོག་པ་དང་། ལམ་དང་། དེ་བཞིན་དུ་ཐམས་ཅད་མཁྱེན་པའི་ཤེས་པ་ལ་ཇི་ལྟར་སྙོམས་པར་འཇུག་པར་བྱ། ཇི་ལྟར་ལྡང་བར་བྱ། དེ་བཞིན་དུ་ཀུན་འབྱུང་བ་དང་། འགོག་པ་དང་། ལམ་ཤེས་པ་ལ་ཡང་བྱའོ། །དེ་ནས་རྒྱལ་པོ་ཡིད་གཉིས་ལས་ཡང་དག་པར་འདས་པའི་གཉེན་རྙིང་བ་སྣག་གི་གཉེན་མཚམས་སྔོན་གྱི་ལྷ་ཞིག་གིས་རྒྱལ་པོའི་ཕོ་བྲང་དེ་སྣང་བར་བྱས་ནས་ལུས་མ་སྦས་པར་རྒྱལ་པོ་ཡིད་གཉིས་ལས་ཡང་དག་པར་འདས་པ་དེ་ལ་ཚིགས་སུ་བཅད་དེ་སྨྲས་པ།