།དེས་ན་དེ་བཞིན་གཤེགས་པ་བདུད་རྩིས་དབང་བསྐུར་ལ་ཚིགས་སུ་བཅད་པས་མངོན་པར་བསྟོད་པ། གཟུགས་ཀུན་དཔེ་མེད་ཁམས་གསུམ་དག་ལས་ཁྱད་པར་འཕགས། །འདྲེན་པ་ཁྱོད་ལ་དཔེར་བྱ་ནུས་པ་སུ་མ་མཆིས། །སེམས་ཅན་ཁ་ལོ་སྒྱུར་བའི་གཟུགས་གང་དཔེར་བྱ་བ། །དེ་ལྟར་ཁྱོད་ཀྱི་གཟུགས་དང་འདྲ་བ་གང་མ་མཆིས། །ཁྱོད་ཀྱི་གཟུགས་ནི་སེམས་ཀྱིས་གྲུབ་སྟེ་གང་འདྲ་བ། །གང་གིས་ཁྱོད་ཀྱི་དཔེར་འགྱུར་ཁམས་གསུམ་འདི་ན་མེད། །བདག་གཟུགས་འདི་འདྲར་གྱུར་ཅིག་ཡེ་ཤེས་འདི་འདྲར་ཤོག །གང་གིས་འགྲོ་བ་འཁོར་བའི་བཙོན་རར་བཅིངས་འགྲོལ་བ། །དེའི་སེམས་རྐང་གཉིས་མཆོག་གིས་མཁྱེན་ནས་ལུང་བསྟན་པ། །རྣམ་འདྲེན་མཆོག་ཐོབ་མིང་ནི་སྲེད་མེད་བུ་ཞེས་བྱ། །བདུད་རྩིའི་དབང་བསྐུར་རྫོགས་རྒྱས་རྐང་གཉིས་མཆོག་ཏུ་འགྱུར། །འཇིག་རྟེན་སྟོན་པ་བླ་མེད་སེམས་ཅན་བྱེ་བ་འདྲེན། །དེ་ཚེ་དེ་ཡི་ལུང་བསྟན་སྐྱེ་བོ་ཀུན་གྱིས་ཐོས་ནས་སུ། །བྱང་ཆུབ་སེམས་བསྐྱེད་དེ་དག་ཀྱང་ནི་འདྲེན་པས་ལུང་བསྟན་པ། །རྒྱལ་བས་འགྲོ་བ་མ་ལུས་ཐམས་ཅད་བྱང་ཆུབ་ལུང་བསྟན་ཏོ། །རྒྱལ་ལ་ཡང་དག་བསྙེན་བཀུར་བྱས་ནས་བྱང་ཆུབ་ཕ་རོལ་འགྲོ། །མཁས་པ་འཇིག་རྟེན་དོན་བྱས་སངས་རྒྱས་དེ་ཀུན་མྱ་ངན་འདས། །དེ་ལྟར་རྫོགས་པའི་བྱང་ཆུབ་དེ་དག་བློ་མཆོག་ཤིན་ཏུ་སྐྱེས། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་བློ་གྲོས་ལེགས་བསམས་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། དེ་བཞིན་གཤེགས་པ་འོད་སྲུང་དེ་དེའི་ཚེ་དེའི་དུས་ན་རྒྱལ་པོ་བློ་གྲོས་ལེགས་བསམས་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་རྒྱལ་པོ་འཇིགས་བྱེད་བླ་མ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། །ང་དེའི་ཚེ་དེའི་དུས་ན་རྒྱལ་པོ་འཇིགས་བྱེད་བླ་མ་ཞེས་བྱ་བར་གྱུར་ཏེ། དེས་ན་ང་རྣམ་པར་ཐར་པ་ཤེས་པ་ལ་ངེས་པར་གྱུར་པས་མི་སྐྱེ་བའི་ཆོས་ལ་བཟོད་པ་ཐོབ་བོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔས་རྣམ་པར་ཐར་པ་ཤེས་པ་ཀུན་འབྱུང་བ་རྟོགས་པར་བྱ་བའི་ཕྱིར་དགེ་བའི་བཤེས་གཉེན་ལ་བསྙེན་བཀུར་བྱ་ཞིང་། ཡོངས་སུ་འདྲི་བའི་རང་བཞིན་ཅན་དུ་ཡང་བྱའོ། །