དེའི་ཚེ་དེ་རིངས་པ་ཉིད་དུ་ཚུལ་དང་འཐུན་པའི་བཞོན་པ་བཟང་པོ་བཤམས་ནས་བཞོན་པ་བཟང་པོ་དེ་ལ་ཞོན་ཏེ། བློན་པོའི་ཚོགས་ཀྱིས་ཡོངས་སུ་བསྐོར་ཅིང་། སྐྱེ་བོའི་ཚོགས་མང་པོ་དང་ལྷན་ཅིག་ཏུ། རྒྱལ་པོ་འཇིགས་བྱེད་བླ་མ་དེ་ག་ལ་བ་དེར་སོང་སྟེ་ཕྱིན་ནས་གྲོགས་པོའི་ཆོས་ཚུལ་བྱས་ནས་དྲིས་པ། གྲོགས་པོ་དེ་བཞིན་གཤེགས་པ་ག་ལ་བཞུགས་གསུངས། དེས་སྨྲས་པ་གྲོགས་པོ་རེ་ཞིག་ཁ་ཟས་ཀྱི་བྱ་བ་བྱས་ཏེ། ཕྱིས་དེ་བཞིན་གཤེགས་པ་བསྟན་ཏོ། །དེས་འདི་སྐད་ཅེས་སྨྲས་སོ། །གྲོགས་པོ་འདི་ལྟ་སྟེ། དེ་བཞིན་གཤེགས་པ་མཐོང་བ་དེ་ཉིད་ཁ་ཟས་ཀྱི་བྱ་བ་བྱས་པར་འགྱུར་རོ། །དེ་ནས་རྒྱལ་པོ་འཇིགས་བྱེད་བླ་མས་རྒྱལ་པོ་བློ་གྲོས་ལེགས་བསམས་ལྟར་མཉན་ནས། བློ་གྲོས་ལེགས་བསམས་བློན་པོའི་འཁོར་དང་བཅས་པ་དེ་དང་ལྷན་ཅིག་སྲོག་ཆགས་ཁྲི་ཕྲག་བརྒྱད་ཅུ་རྩ་དྲུག་དང་ལྷན་ཅིག་ཏུ་རྒྱལ་པོའི་རྫུ་འཕྲུལ་ཆེན་པོ་དང་། རྒྱལ་པོའི་མཐུ་ཆེན་པོས་རྒྱལ་པོའི་ཕོ་བྲང་རིན་ཆེན་ཅན་ནས་བྱུང་སྟེ། འབྱུང་པོ་ཐམས་ཅད་སྒྲོགས་པ་ཞེས་བྱ་བའི་སྐྱེད་མོས་ཚལ་གང་ན་བཅོམ་ལྡན་འདས་དེ་བཞིན་གཤེགས་པ་བདུད་རྩིས་དབང་བསྐུར་དེ་ག་ལ་བ་དེར་སོང་ངོ་། །ཇི་ཙམ་དུ་བཞོན་པར་བྱ་བའི་ས་དེ་ཙམ་དུ་བཞོན་པས་སོང་ནས་བཞོན་པ་ལས་བབས་ཏེ་བཅོམ་ལྡན་འདས་དེ་བཞིན་གཤེགས་པ་བདུད་རྩིས་དབང་བསྐུར་དེ་ག་ལ་བ་དེར་སོང་ནས་མཐོང་ངོ་། །དེ་བཞིན་གཤེགས་པ་བདུད་རྩིས་དབང་བསྐུར་དེས་ཀྱང་རྒྱལ་པོ་གཉིས་པོ་དེ་དག་སྐྱེ་བོའི་ཚོགས་མང་པོ་དེ་དང་རྒྱང་རིང་པོ་ནས་འདིར་འོང་བ་གཟིགས་ནས་ཏ་ལའི་སྲིད་ཙམ་དུ་ནམ་མཁའ་ལ་མངོན་པར་འཕགས་ཏེ་འཆག་གོ། །འཆག་པ་ན་དེ་བཞིན་གཤེགས་པ་བདུད་རྩིས་དབང་བསྐུར་དེའི་སྐུའི་སྨད་ལས་ཆུའི་རྒྱུན་རབ་ཏུ་ཕབ་བོ། །སྐུའི་སྟོད་ལས་མེ་རབ་ཏུ་འབར་རོ། །འདོད་པ་ན་སྤྱོད་པའི་ལྷ་དག་གིས་ཀྱང་ལྷའི་གདུགས་འཛིན་ཅིང་ལྷའི་མེ་ཏོག་མན་དཱ་ར་བ་དག་ཀྱང་རབ་ཏུ་འཐོར་རོ། །དེ་ནས་རྒྱལ་པོ་བློ་གྲོས་ལེགས་བསམས་ཀྱིས་དེ་བཞིན་གཤེགས་པ་དེ་མཐོང་མ་ཐག་ཏུ་གཞལ་དུ་མེད་པའི་དད་པ་བསྐྱེད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་མ་ཐག་ཏུ་མི་སྐྱེ་བའི་ཆོས་ལ་བཟོད་པ་ཐོབ་བོ། །དེས་ན་དེ་བཞིན་གཤེགས་པ་བདུད་རྩིས་དབང་བསྐུར་ལ་ཚིགས་སུ་བཅད་པས་མངོན་པར་བསྟོད་པ།