དེ་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་སྒྲོན་མ་དེ་ག་ལ་བ་དེར་སོང་སྟེ་ཕྱིན་ཏོ། །བཅོམ་ལྡན་འདས་དེ་བཞིན་གཤེགས་པ་འཇིག་རྟེན་སྒྲོན་མ་དེ་མཐོང་ནས་གཞལ་དུ་མེད་པའི་དད་པ་ཐོབ་སྟེ། སེམས་རབ་ཏུ་དང་བས་ཞབས་ལ་མགོ་བོས་ཕྱག་འཚལ་ཏེ། ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་དྲང་སྲོང་གྲོ་ཞིན་སྐྱེས་དེས་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་སྒྲོན་མ་དེ་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། མི་མཆོག་བདེ་གཤེགས་སེམས་ཅན་གང་དག་སྲིད་པར་སྐྱེ། །དེ་དག་ཚོགས་རྣམས་གར་མཆི་འདྲེན་པ་བདག་ལ་གསུངས། །དངོས་པོ་འདི་ཀུན་རྒྱུ་མེད་པ་ཞེས་ཁ་ཅིག་མཆི། །བདག་གི་རང་བཞིན་སྐྱེ་སྟེ་འགྲོ་བར་དེ་བཞིན་མཆི། །ས་ནི་ས་རུ་མཆི་ཞིང་ཆུ་ཡང་ཆུ་རུ་མཆི། །མེ་ནི་མེ་རུ་མཆི་ཞིང་རླུང་ཡང་རླུང་དུ་མཆི། །འབྱུང་བའི་ཚོགས་པ་མ་གཏོགས་དེ་ལས་གཞན་མ་མཆིས། །དེར་ནི་རྣམ་ཤེས་མཐོང་སྟེ་འདི་ལྟར་རྣམ་ཤེས་སྣང་། །ཁ་ཅིག་འདི་སྐད་མཆི་སྟེ་གཟུགས་ལ་སེམས་ཐོགས་མེད། །ལྡོག་པ་ག་ལས་འབྱུང་བ་འདི་ཀུན་མི་འཚལ་ན། །ཇི་ལྟར་བདག་ནི་ཐེ་ཚོམ་མེད་ཅིང་ཆོས་ཀུན་མཁས། །མི་མཆོག་བདག་གི་ཐེ་ཙོམ་དེ་དག་དགུམ་པ་གསུངས། །སྒྲོན་མ་གང་ཟག་མཆོག་གི་མཁྱེན་པས་དེ་ལུང་བསྟན། །གྲོ་ཞིན་དེས་པས་གང་ཞུས་བཤད་ཀྱིས་ང་ལ་ཉོན། །གཟུགས་དང་ཚོར་བ་འདུ་ཤེས་སེམས་པ་སེམས་དང་ལྔ། །འདི་དག་བརྟེན་ནས་འབྱུང་སྟེ་འོང་བ་དེ་དག་མེད། །ཇི་ལྟར་ནམ་མཁའི་སྤྲིན་ནི་བྱུང་ནས་ཞིག་ཅིང་མེད། །དེ་ལྟར་འགྲོ་དང་མི་འགྲོ་མེད་པའི་ཆོས་ཤེས་བྱོས། །དེ་ནས་དྲང་སྲོང་གྲོ་ཞིན་སྐྱེས་འདི་སྙམ་དུ་སེམས་ཏེ། ཇི་ཙམ་དུ་དེ་བཞིན་གཤེགས་པ་ནི་མཁྱེན་པ་མཉམ་སྟེ། གང་གིས་ཆོས་རྣམས་ཀྱི་ཆོས་ཉིད་འདི་གཟིགས་པ་ནི་ངོ་མཚར་ཏོ། །ཆོས་དེ་དག་ཀྱང་གང་ནས་ཀྱང་མི་འོང་ལ་གང་དུ་ཡང་མི་འགྲོ། འགྲོ་བར་ཡང་སྣང་ལ། རྒྱུ་མེད་པ་ལས་ཀྱང་མི་སྐྱེ། གར་ཡང་མི་སྐྱེ་ལ་འགོག་པ་ཡང་མེད་འགྲོ་བ་ཡང་མེད་དོ་སྙམ་ནས། དེ་དད་པ་མཆོག་དང་ལྡན་པས་སེམས་བསྐྱེད་དེ། བདག་མ་འོངས་པའི་དུས་ན་དེ་བཞིན་གཤེགས་པའི་ཡེ་ཤེས་འདི་དང་ལྡན་ནས་ཆོས་རྣམས་ཀྱི་ཆོས་ཉིད་འདི་དག་ཉིད་སེམས་ཅན་རྣམས་ལ་ཡང་དག་པར་རབ་ཏུ་སྟོན་པར་གྱུར་ཅིག ། མཽད་གལ་གྱི་བུ་དེ་ཇི་སྙམ་དུ་སེམས།