དེས་ན་ང་དེ་བཞིན་གཤེགས་པ་དེ་མཐོང་བ་ཙམ་གྱིས་དད་པས་འཇིག་རྟེན་ཤེས་པ་ཀུན་འབྱུང་བ་ཤེས་པ་བསྒྲུབས་སོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ཉིད་མཐོང་བར་བྱའོ། །མཽད་གལ་གྱི་བུ་དེ་ཉིད་མཐོང་བའི་བྱང་ཆུབ་སེམས་དཔས་སངས་རྒྱས་ལ་དད་པ་བསྐྱེད་པར་བྱ། འཇིག་རྟེན་པའི་ཤེས་པ་ཁོང་དུ་ཆུད་པར་བྱ་བ་ལ་རྣལ་འབྱོར་དུ་བྱའོ། །མཽད་གལ་གྱི་བུ་ངས་འཇིག་རྟེན་ཤེས་པ་འགོག་པ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་འཇིག་རྟེན་ཤེས་པ་འགོག་པ་ཤེས་པ་མངོན་པར་རྫོགས་པར་ཤེས་ནས་སེམས་ཅན་རྣམས་ལ་ཇི་ལྟར་ཡང་དག་པར་རབ་ཏུ་བཤད་པར་བྱ་སྙམ་ནས། དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་དེའི་ཕ་རོལ་གྱི་ཡང་ཆེས་ཕ་རོལ་ན་དྲང་སྲོང་གྲོ་ཞིན་སྐྱེས་ཞེས་བྱ་བ་ཞིག་བྱུང་སྟེ། དེ་དབེན་པར་སོང་ནས་ནང་དུ་ཡང་དག་འཇོག་ལ་འཇུག་སྟེ། འདི་སྙམ་དུ་སེམས་སོ། །གང་སྲོག་ཆགས་དང་སྲོག་ཆགས་མ་ཡིན་པ་དེ་དག་སྲིད་པ་ལ་ཇི་ལྟར་འགྲོ་སྙམ་མོ། །དེ་འདི་སྙམ་དུ་སེམས་ཏེ་བདག་དགེ་སྦྱོང་དང་བྲམ་ཟེ་གང་དག་གི་དྲུང་དུ་སོང་སྟེ་གང་ཡིན་པ་ཡོངས་སུ་དྲི་བར་བྱ་སྙམ་མོ། །དེའི་ཚེ་དེ་བཞིན་གཤེགས་པ་འཇིག་རྟེན་སྒྲོན་མ་ཞེས་བྱ་བ་ནས། སངས་རྒྱས་བཅོམ་ལྡན་འདས་ཀྱི་བར་འཇིག་རྟེན་དུ་བྱུང་ངོ་། །དེ་བཞིན་གཤེགས་པ་འཇིག་རྟེན་སྒྲོན་མ་དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་སྒྲོན་མ་དེ་ཞེས་བྱ་བ་ནས་དེ་མི་མཁྱེན་པའམ། མ་གཟིགས་པའམ། ཐུགས་སུ་མ་ཆུད་པའམ། མངོན་སུམ་དུ་མ་མཛད་པའམ། མངོན་པར་རྫོགས་པར་ཐུགས་སུ་མ་ཆུད་པ་ཅི་ཡང་མེད་དེ། དེ་བདག་གི་འདི་འཆད་དོ་ཞེས་བྱ་བའི་བར་དེ་ལྟ་བུའི་སྒྲ་མངོན་པར་ཕྱུང་ངོ་། །དེ་ནས་དྲང་སྲོང་གྲོ་ཞིན་སྐྱེས་འདི་སྙམ་དུ་སེམས་ཏེ། བདག་དེ་བཞིན་གཤེགས་པའི་དྲུང་དུ་སོང་ནས་ཡོངས་སུ་ཞུ་བར་བྱ། བཅོམ་ལྡན་འདས་དེ་བཞིན་གཤེགས་པ་དེ་ཇི་ལྟ་བཞིན་དུ་ལུང་སྟོན་པར་མཛད་དེ། དེའི་དོན་དེ་བཞིན་དུ་གཟུང་བར་བྱའོ་སྙམ་ནས། དེ་བཅོམ་ལྡན་འདས་དེ་བཞིན་གཤེགས་པ་འཇིག་རྟེན་སྒྲོན་མ་དེ་ག་ལ་བ་དེར་སོང་སྟེ་ཕྱིན་ཏོ།