ད་ལྟར་བྱུང་བའི་དགེ་བའི་ཆོས་བྱུང་བ་དག་འཕེལ་ན་ཕྱོགས་དཀར་པོ་འཕེལ་བར་འགྱུར་རོ་སྙམ་མོ། །དེ་ནས་བྲམ་ཟེ་རྒྱལ་བ་འཛིན་ཤིང་སཱ་ལ་ཆེན་པོ་ལྟ་བུ་དགེ་བའི་ཆོས་དག་བྱུང་བ་དང་། མི་དགེ་བའི་ཆོས་དག་བཟློག་པ་སོ་སོར་ཇི་ལྟ་བ་བཞིན་དུ་བརྟགས་ནས་དགེ་བའི་ཆོས་བྱུང་བ་དག་ཡང་དག་པར་འཕེལ་བར་བྱེད་ཅིང་། མི་དགེ་བའི་ཆོས་བྱུང་བ་དག་འདོར་བར་བྱེད་དོ། །མི་དགེ་བའི་ཆོས་སྤངས་ཤིང་དགེ་བའི་ཆོས་རྣམས་ལ་བསྟེན་པས་ཏིང་ངེ་འཛིན་ཐོབ་སྟེ། ཏིང་ངེ་འཛིན་གང་ཐོབ་པས་མི་དགེ་བའི་ཕྱོགས་ཐམས་ཅད་གཏན་དུ་ཟློག་པར་བྱེད་ལ། དགེ་བའི་ཆོས་འབྱུང་བ་རྣམས་མཆོག་ཏུ་འཕེལ་བར་བྱེད་དོ། །དེ་ལས་དེ་བྱས་ཤིང་བསགས་ལ་མཐར་ཕྱིན་ཅིང་རྫོགས་པ་དང་། ཡང་དག་པར་བླངས་པས་བསྐལ་པ་འབུམ་ཕྲག་བརྒྱད་ཅུར་ལོག་པར་ལྟུང་བར་མ་སོང་ངོ་། །མཽད་གལ་གྱི་བུ་ཁྱོད་དེའི་ཚེ་དེའི་དུས་ན་བྲམ་ཟེ་རྒྱལ་བ་འཛིན་ཅེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་བྲམ་ཟེ་རྒྱལ་བ་འཛིན་ཅེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་ཏོ། །ངས་འཁོར་བའི་རྒྱུ་བཟློག་པ་དང་། མྱ་ངན་ལས་འདས་པའི་རྒྱུ་ཡང་དག་པར་འཕེལ་བར་བྱ་བའི་ཕྱིར་བར་དེ་དག་ཏུ་སངས་རྒྱས་བྱེ་བ་ཁྲག་ཁྲིག་དུ་མ་དག་ལ་བསྙེན་བཀུར་བྱས་ཤིང་ཡོངས་སུ་ཞུས་སོ། །དགེ་བའི་རྩ་བ་དེས་ང་ད་ལྟར་བག་ཆགས་ཀྱི་མཚམས་སྦྱོར་བ་དང་བཅས་པའི་ཉོན་མོངས་པ་སྤངས་ནས་ཆོས་ལ་སྒྲིབ་པ་མེད་པའི་ཡེ་ཤེས་བརྙེས་སོ། །དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་མཽད་གལ་གྱི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཐུགས་སྐྱོ་བ་མི་མངའ་བ་ནས། བཅོམ་ལྡན་འདས་ཡང་དག་པར་བླངས་པའི་གོ་ཆ་ཆེན་པོ་གསོལ་ནས་སེམས་ཅན་གྱི་དོན་དུ་བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པར་བྱང་ཆུབ་པ་ནི་ངོ་མཚར་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ལ་འདི་སྐད་ཅེས་བཀའ་སྩལ་ཏོ། །མཽད་གལ་གྱི་བུ་དེ་ལྟར་ཡིན་ཏེ། མཽད་གལ་གྱི་བུ་དེ་བཞིན་གཤེགས་པས་རྒྱུན་གྱི་རྗེས་སུ་འགྲོ་བའི་སེམས་ཅན་རྣམས་རྒྱུན་ལས་བཟློག་པར་བྱ་བའི་དོན་དུ་གོ་ཆ་ཆེན་པོ་འདི་བགོས་སོ། །མཽད་གལ་གྱི་བུ་བདག་ཉིད་མ་བསྲུངས་པར་གཞན་གྱི་དོན་བྱ་བར་མི་ནུས་ཏེ། ལུས་དང་སྲོག་ལ་མི་ལྟ་བས་ནི་གཞན་གྱི་དོན་བྱ་བར་ནུས་སོ།།