།གཞན་དུ་ན་སེམས་ཅན་དེ་དག་ལས་གང་ཕལ་ཆེར་སྨོན་ལམ་གྱི་དབང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་སྟེ། དེ་འདོད་ན་འཇིག་རྟེན་གྱི་ཁམས་དུ་མར་སོང་ཞིང་། སྐྱེ་བ་གཅིག་གིས་ཐོགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །རྒྱལ་པོ་དཔག་མེད་རྒྱལ་མཚན་གྱིས་དེ་བཞིན་གཤེགས་པ་འཇིག་རྟེན་དུ་བྱུང་བ་ཐོས་སོ། །ཐོས་ནས་བཅོམ་ལྡན་འདས་ག་ལ་བ་དེར་སོང་སྟེ། ཕྱིན་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ། རིམ་གྲོ་དང་བདེ་བའི་གནས་ཐམས་ཅད་དུ་དགེ་སློང་གི་དགེ་འདུན་འཁོར་དང་བཅས་པ་དང་ཐབས་ཅིག་ཏུ་སྤྱན་དྲངས་ཤིང་། སྙིང་རྗེ་ཆེན་པོས་ཡོངས་སུ་ནོན་པའི་སེམས་ཀྱིས་བྱང་ཆུབ་ཀྱི་ཕྱིར་ཡང་དག་པར་གནས་སོ། །མཽད་གལ་གྱི་བུ་དེའི་ཚེ་དེའི་དུས་ན་རྒྱལ་པོ་དཔག་མེད་རྒྱལ་མཚན་ཞེས་བྱ་བར་གྱུར་པ་དེ་གཞན་ཡིན་པར་སེམས་ན་ཁྱོད་ཀྱིས་དེ་ལྟར་མི་བལྟ་སྟེ། ང་དེའི་ཚེ་དེའི་དུས་ན་རྒྱལ་པོ་དཔག་མེད་རྒྱལ་མཚན་དུ་གྱུར་ཏོ། །མཽད་གལ་གྱི་བུ་ངས་ཁམས་དུ་མ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། དགེ་བའི་རྩ་བ་དཔག་ཏུ་མེད་པ་དག་མངོན་པར་འདུས་བྱས་ཏེ། མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་བྲམ་ཟེ་རྒྱལ་བ་འཛིན་ཅེས་བྱ་བ་ཤིང་སཱ་ལ་ཆེན་པོ་ལྟ་བུར་གྱུར་པ། མཛངས་ཤིང་གསལ་ལ་ཡིད་གཞུངས་པ། གཞི་ཤེས་ཤིང་མཁས་ལ་དེ་ཤེས་རབ་ཀྱི་རང་བཞིན་ཅན་ཏེ། དེ་ཡང་སེམས་པར་གྱུར་ཏོ། །དེ་ཡོན་ཏན་དང་ཉེས་པ་སེམས་ཏེ་དབེན་པར་ནང་དུ་ཡང་དག་འཇོག་ལ་ཞུགས་ནས། སེམས་ཀྱིས་འདི་ལྟར་ཡོངས་སུ་རྟོག་པ་སྐྱེ་སྟེ། ཉེས་པའི་གཞི་ནི་གང་ལས་བྱུང་། ཡོན་ཏན་གྱི་གཞི་ནི་གང་ལས་བྱུང་སྙམ་མོ། །དེ་དེ་ལྟར་བསམ་ནས་བདག་ཉིད་ཀྱི་ཤེས་པ་གཞན་ལ་རག་མ་ལས་པ་བྱུང་ནས་ད་ལྟར་བྱུང་བའི་ཉོན་མོངས་པ་སྣ་ཚོགས་བྱུང་བ་དག་མ་བཟློག་པ་ལས་ཀུན་ནས་ཉོན་མོངས་པར་འགྱུར། ད་ལྟར་བྱུང་བའི་ཉོན་མོངས་པ་བྱུང་བ་དག་བཟློག་ན་ཀུན་ནས་ཉོན་མོངས་པར་མི་འགྱུར། ད་ལྟར་བྱུང་བའི་དགེ་བའི་ཆོས་བྱུང་བ་དག་བཟློག་ན་དཀར་པོའི་ཕྱོགས་མི་འཕེལ་ལ། ད་ལྟར་བྱུང་བའི་དགེ་བའི་ཆོས་བྱུང་བ་དག་འཕེལ་ན་ཕྱོགས་དཀར་པོ་འཕེལ་བར་འགྱུར་རོ་སྙམ་མོ།