བུ་མོ་མང་པོ་རྣམས་ཀྱང་ཤིན་ཏུ་ལྟད་མོར་གྱུར་ནས་ཀུན་འདུས་ཏེ་དེའི་ཕྱི་བཞིན་འབྲང་ཞིང་འགྲོའོ། །དེ་ནས་སྨད་འཚོང་མའི་བུ་མོ་གསེར་མཆོག་འོད་དཔལ་དེ་ཚོང་དཔོན་གྱི་བུ་འཇིགས་བྱིན་ཞེས་བྱ་བས་ནོར་གྱིས་གླས་ཏེ། སྐྱེད་མོས་ཚལ་གྱི་སར་བྱུང་ནས་རྟ་བཞི་དང་ལྡན་པའི་ཤིང་རྟ་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། གསེར་གྱིས་ལེགས་པར་བརྒྱན་པ། གདུགས་དང་རྒྱལ་མཚན་དང་། བ་དན་བསྒྲེང་ཞིང་མེ་ཏོག་དང་། བདུག་པ་དང་། སྤོས་དང་། ཕྱེ་མ་དང་། མེ་ཏོག་ཕྲེང་གིས་མཛེས་བྱས་པ། མེ་ཏོག་ཙམ་པ་ཀའི་ཕྲེང་བས་སྐར་ཁུང་བྱས་པའི་ནང་དུ་སྟན་བཟང་པོ་བཤམས་པ་ལ་འདུག་ནས། འདི་ལྟར་རྩེ་ཞིང་དགའ་བའི་བསམ་པས་ཤིང་རྟ་དེའི་མདུན་དུ་ནི་སིལ་སྙན་དང་། ཕེག་རྡོབ་པ་དང་། གླུ་དབྱངས་ལེན་པ་དག་གིས་དྲངས། ཤིང་རྟ་དེའི་ཕྱི་བཞིན་དུ་ནི་ཉེ་བར་སྤྱད་པ་དང་། ཡོངས་སུ་སྤྱད་པ་ཐོགས་པ་ཐམས་ཅད་རྗེས་སུ་འབྲང་ལ། སྐྱེ་བོའི་ཚོགས་ཆེན་པོ་ལྟད་མོ་ལྟ་བའི་བསམ་པ་ཅན་དག་ཀྱང་ཕྱི་བཞིན་འབྲང་བར་གྱུར་ཅིང་སྐྱེད་མོས་ཚལ་གྱི་སར་དོང་ངོ་། །དེ་ནས་འཇམ་དཔལ་གཞོན་ནུར་གྱུར་པ་ནང་དུ་ཡང་དག་འཇོག་ལས་ལངས་ཏེ། སེམས་ཅན་ཐམས་ཅད་ལ་སྙིང་རྗེ་ཆེན་པོ་སྐྱེས་ནས་འདི་སྙམ་དུ་སེམས་ཏེ། སུ་ཞིག་རྫུ་འཕྲུལ་གྱི་ཆོ་འཕྲུལ་ལམ། ཀུན་བརྗོད་པའི་ཆོ་འཕྲུལ་ལམ། རྗེས་སུ་བསྟན་པའི་ཆོ་འཕྲུལ་གྱིས་འདུལ་བར་འགྱུར་བའི་སེམས་ཅན་གང་ཐེག་པ་ཆེན་པོ་འདི་ལ་ཡོངས་སུ་སྨིན་པར་བྱ་སྙམ་པ་དང་། འཇམ་དཔལ་གཞོན་ནུར་གྱུར་པས་སྨད་འཚོང་མའི་བུ་མོ་གསེར་མཆོག་འོད་དཔལ་ཚོང་དཔོན་གྱི་བུ་འཇིགས་བྱིན་དང་ལྷན་ཅིག་ཏུ་ཤིང་རྟ་ལ་ཞོན་ཏེ་སྐྱེད་མོས་ཚལ་གྱི་སར་འགྲོ་བ་མཐོང་ངོ་། །མཐོང་ནས་ཀྱང་གདུལ་བའི་ཕྱིར་དེའི་དབང་པོ་དང་། སྟོབས་དང་བརྩོན་འགྲུས་ཀྱི་བྱེ་བྲག་ལ་རྣམ་པར་བལྟས་ན་དེ་སྔོན་གྱི་དགེ་བའི་རྩ་བ་དང་ལྡན་ཞིང་ཆོས་ཀུན་ཤེས་པར་བྱ་བའི་ནུས་པ་དང་། མཐུ་དང་། སྐལ་བ་ཡོད་པར་རིག་ནས། དེའི་ཚེ་འཇམ་དཔལ་གཞོན་ནུར་གྱུར་པས་འདི་ལྟ་བུ་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་བྱས་ཏེ། ཇི་ལྟ་བུའི་རྫུ་འཕྲུལ་མངོན་པར་འདུ་བྱས་པས། འདི་ལྟར་རང་གི་ལུས་བསྟན་མ་ཐག་ཏུ་ཉི་མ་དང་ཟླ་བའི་འོད་ཀྱང་ཟིལ་དུ་རླག་པར་བྱེད་ན། སེམས་ཅན་གཞན་དག་གི་ལྟ་སྨོས་ཀྱང་ཅི་དགོས་པ་དེ་ལྟ་བུར་རང་གི་ལུས་མངོན་པར་སྤྲུལ་ནས།