འཇིག་རྟེན་གྱི་བར་སྡིག་པ་སྡིག་པས་ཁྱབ་པ་མུན་ནག་ཅེས་བྱ་བ་སྔ་མ་བཞིན་ནོ། །ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས་སོ། །ལྡེག །རབ་ཏུ་ལྡེག། །ཀུན་ཏུ་རབ་ཏུ་ལྡེག་གོ །འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ཏོ། །འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་སོ། །ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ་མོ། །འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར་རོ། །སངས་རྒྱས་ཐམས་ཅད་ཀྱིས་ཀྱང་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་པ་ལ་ལེགས་སོ་ཞེས་བྱ་བ་བྱིན་ཏེ། ཆོས་ཀྱི་དགབ་པ་དག་ཀྱང་སྐུར་རོ། །ཆོས་ཀྱི་དགབ་པ་དེ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་རིན་པོ་ཆེའི་གདུགས་གཅིག་གིས་ཁེབས་པར་གྱུར་ཏེ། རིན་པོ་ཆེའི་གདུགས་དེ་ལས་ཀྱང་རྣམ་པ་འདི་ལྟ་བུའི་འོད་ཟེར་གྱི་དྲ་བ་བྱུང་སྟེ། དེ་དག་གིས་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་སྣང་བར་བྱས་ནས་ཕྱོགས་བཅུའི་བྱང་ཆུབ་སེམས་དཔའ་རྣམས་དང་། ལྷའི་བུ་རྣམས་ཀྱང་ཀུན་དགའ་བའི་སྒྲ་རྗོད་པར་གྱུར་ཏེ། སེམས་ཅན་མཁས་པའི་པད་མ་ཡེ་ཤེས་ཀྱི་མཚོ་ལས་བྱུང་བ། འཇིག་རྟེན་གྱི་ཆོས་རྣམས་ཀྱིས་མ་གོས་པ་བྱུང་ངོ་། །ཐུགས་རྗེ་ཆེན་པོའི་སྤྲིན་ཡང་དག་པར་འཕགས་ཏེ། ཆོས་ཀྱི་དབྱིངས་ཀྱི་གནས་ཁྱབ་པར་མཛད་ནས། འདུལ་བའི་སྐྱེ་བོའི་སྨན་གྱི་ཆོས་ཀྱི་ཆར། དགེ་བའི་རྩ་བའི་ས་བོན་ཐམས་ཅད་ཀྱི་མྱུ་གུ་སྐྱེད་པ། དད་པའི་མྱུ་གུ་རྣམས་རྣམ་པར་འཕེལ་བར་བྱེད་པ། རྣམ་པར་གྲོལ་བའི་འབྲས་བུ་རྣམས་འབྱིན་པར་བྱེད་པའི་ཆར་འབེབས་པར་འགྱུར་རོ་ཞེས་འཛེར་ཏོ། །དེ་ལ་འདི་སྐད་ཅེས་བྱ་སྟེ། སྐྱེས་བུ་སེང་གེ་དེ་ཡིས་དཔུང་བཅས་བདུད་བཏུལ་ཏེ། །སྟོན་པས་བསམ་གཏན་བདེ་བ་མངོན་དུ་མཛད་ནས་ནི། །གང་ཚེ་སྟོབས་བཅུས་རིག་པ་གསུམ་པོ་མཉེས་གྱུར་ཚེ། །ཕྱོགས་བཅུའི་སངས་རྒྱས་ཞིང་མང་བྱེ་བ་གཡོས་པར་གྱུར། །ཆོས་འདོད་བྱང་ཆུབ་སེམས་དཔའ་གང་དག་ཡོངས་ལྷགས་པ། །ཞབས་ལ་གཏུགས་ཏེ་འདི་སྐད་ཚིག་སྨྲས་མ་མཉེལ་ཏམ། །བདག་ཅག་མངོན་སུམ་ཅི་འདྲ་ཤིན་ཏུ་འཇིགས་དཔུང་དེ། །ཤེས་རབ་བསོད་ནམས་སྟོབས་དང་བརྩོན་འགྲུས་སྟོབས་ཀྱིས་བཅོམ། །ཁྲག་ཁྲིག་ཞིང་ནས་སངས་རྒྱས་རྣམས་ཀྱིས་གདུགས་རྣམས་བསྐུར།