།དེ་ནས་ལྷའི་བུ་དེ་དག་གིས་དེ་བཞིན་གཤེགས་པ་ལ་ལྷའི་མེ་ཏོག་གིས་གཏོར་ཏེ། དེ་ནས་ལྷའི་མེ་ཏོག་པུས་མོ་ནུབ་ཙམ་དུ་བཀྲམ་པར་གྱུར་ཏོ། །དགེ་སློང་དག་དེ་ལྟར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ཏེ། མུན་པ་མུན་ནག་དང་ནི་བྲལ། སྲེད་པ་ནི་རྣམ་པར་སྦྱངས། ལྟ་བ་ནི་བཟློག །ཉོན་མོངས་པ་རྣམས་ནི་རྣམ་པར་དཀྲུགས། ཟུག་རྔུ་ནི་ཕྱུང་། མདུད་པ་ནི་བཀྲོལ། ང་རྒྱལ་གྱི་རྒྱལ་མཚན་ནི་བསྙལ། ཆོས་ཀྱི་རྒྱལ་མཚན་ནི་བསྒྲེང་། བག་ལ་ཉལ་རྣམས་ནི་བཏོན། ཆོས་ཀྱི་དེ་བཞིན་ཉིད་ནི་མཁྱེན། ཡང་དག་པའི་མཐའ་ནི་ཐུགས་སུ་ཆུད། ཆོས་ཀྱི་དབྱིངས་ནི་ཡོངས་སུ་མཁྱེན། སེམས་ཅན་གྱི་ཁམས་ནི་རྣམ་པར་བཀོད། ཡང་དག་པ་ཉིད་དུ་ངེས་པའི་ཕུང་པོ་ནི་བསྔགས། ལོག་པ་ཉིད་དུ་ངེས་པའི་ཕུང་པོ་ནི་སྨད། མ་ངེས་པའི་ཕུང་པོ་ནི་ཡོངས་སུ་བཟུང་། སེམས་ཅན་གྱི་དབང་པོ་རྣམས་ལ་ནི་རྣམ་པར་གཟིགས། སེམས་ཅན་གྱི་སྤྱོད་པ་ནི་ཡོངས་སུ་མཁྱེན། སེམས་ཅན་གྱི་ནད་གསོ་བ་ནི་ཐུགས་སུ་ཆུད། བདུད་རྩིའི་སྨན་སྦྱར་བ་ནི་གྲུབ། སྨན་པའི་རྒྱལ་པོར་ནི་བྱུང་། སྡུག་བསྔལ་ཐམས་ཅད་ལས་རབ་ཏུ་ཐར་བར་མཛད་པ་པོར་ནི་གྱུར། མྱ་ངན་ལས་འདས་པའི་བདེ་བ་ལ་འཇོག་པ་པོར་ནི་གྱུར། དེ་བཞིན་གཤེགས་པའི་སྙིང་པོ། དེ་བཞིན་གཤེགས་པའི་ཆོས་ཀྱི་རྒྱལ་པོའི་ཁྲི་ཆེན་པོ་ལ་ནི་བཞུགས། རྣམ་པར་གྲོལ་བའི་ཐབས་ནི་བརྙེས། ཐམས་ཅད་མཁྱེན་པ་ཉིད་ཀྱི་གྲོང་ཁྱེར་དུ་ནི་ཞུགས། སངས་རྒྱས་ཐམས་ཅད་དང་ཡང་དག་པར་ནི་འདྲེས། ཆོས་ཀྱི་དབྱིངས་ཐུགས་སུ་ཆུད་པ་ལས་དབྱེར་མེད་པར་ནི་གྱུར་ཏོ། །དགེ་སློང་དག་དེ་བཞིན་གཤེགས་པ་ངས་འདིར་ཐོག་མ་མེད་པའི་སྐྱེ་བ་དང་། རྒ་བ་དང་། འཆི་བའི་སྡུག་བསྔལ་མཐར་ཕྱུང་ངོ་ཞེས་ཞག་བདུན་པ་དང་པོ་ལ་བྱང་ཆུབ་ཀྱི་སྙིང་པོ་དེ་ཉིད་ན་བཞུགས་སོ།། །།འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་བཅྭ་ལྔ་པ། དགེ་སློང་དག་བྱང་ཆུབ་སེམས་དཔས་ཐམས་ཅད་མཁྱེན་པ་ཉིད་ཐོབ་མ་ཐག་ཏུ་དེ་ནས་སྐད་ཅིག་དེ་ཉིད་ལ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་སེམས་ཅན་ཐམས་ཅད་སྐད་ཅིག་དེ་དང་། ཐང་ཅིག་དེ་དང་། ཡུད་ཙམ་དེ་ལ་མཆོག་ཏུ་བདེ་བ་དང་ལྡན་པར་གྱུར་ཏོ། །འཇིག་རྟེན་གྱི་ཁམས་ཐམས་ཅད་ཀྱང་སྣང་བ་ཆེན་པོས་སྣང་བར་བྱས་ནས། འཇིག་རྟེན་གྱི་བར་སྡིག་པ་སྡིག་པས་ཁྱབ་པ་མུན་ནག་ཅེས་བྱ་བ་སྔ་མ་བཞིན་ནོ།