Degé Kangyur volume 45, F.37.a

པའི་ཕ་རོལ་ཏུ་ཕྱིན་པ་དྲུག་གོ། །​དེ་ལ་བརྟུན་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། དམིགས་པ་མེད་པར་གནས་པའི་སྦྱིན་པའི་ཕ་རོལ་ཏུ་ཕྱིན་པ་གང་ཡིན་པ་དེ་ནི་བརྟུན་པའི་སྦྱིན་པའི་ཕ་རོལ་ཏུ་ཕྱིན་པའོ། །​བསྙེམས་པ་མེད་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་བརྟུན་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །​རྗེས་སུ་ཆགས་པ་དང་ཁོང་ཁྲོ་བ་སྤོང་བ་ལ་དམིགས་པའི་བཟོད་པ་གང་ཡིན་པ་དེ་ནི་བརྟུན་པའི་བཟོད་པའི་ཕ་རོལ་ཏུ་ཕྱིན་པའོ། །​ངར་འཛིན་པ་དང་། སྡུག་བསྔལ་སྣ་ཚོགས་སྤང་བ་དང་། སྨད་པའི་ཕྱིར་བདག་གི་ངལ་བ་སྤངས་ནས་སྟོང་པ་ཉིད་ཀྱི་རྗེས་སུ་འཐུན་པ་གང་ཡིན་པ་དེ་ནི་བརྟུན་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །​གང་མི་རྟག་པས་ཡིད་བྱུང་སྟེ། རྟེན་ཅིང་འབྲེལ་པར་འབྱུང་བའི་སྟོབས་རྙེད་ཅིང་ཡོངས་སུ་གཏུགས་པ་མེད་པས་ཕྱེ་བ་གང་ཡིན་པ་དེ་ནི་བརྟུན་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །​འདོད་ཆགས་དང་བྲལ་བར་ཞུགས་པ་གཉིས་སུ་མེད་པས་རབ་ཏུ་ཕྱེ་བའི་ཤེས་རབ་གང་ཡིན་པ་དེ་ནི་བརྟུན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་བརྟུན་པའི་ཕ་རོལ་ཏུ་ཕྱིན་པ་དྲུག་གོ། །​དེ་ལ་ངོམས་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སྦྱིན་པའི་ཕ་རོལ་ཏུ་ཕྱིན་པ་ཐར་པར་ཡོངས་སུ་སྔོ་ཞིང་འཁོར་བར་ཡོངས་སུ་མི་སྔོ་བ་གང་ཡིན་པ་དེ་ནི་ངོམས་པའི་སྦྱིན་པའི་ཕ་རོལ་ཏུ་ཕྱིན་པའོ། །​ནག་ནོག་མེད་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་ངོམས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །བྱང་ཆུབ་སེམས་དཔའི་ངོམས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནག་ནོག་ཅན་གང་ཡིན་པ་ཡོད་དེ། ཚུལ་ཁྲིམས་དེས་ཉན་ཐོས་ཀྱི་སའམ། རང་སངས་རྒྱས་ཀྱི་སར་སྨོན་པ་གང་ཡིན་པ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ནག་ནོག་ཅན་ནོ། །​སངས་རྒྱས་ཀྱི་ཡོན་ཏན་གྱི་བཀོད་པ་དཔག་ཏུ་མེད་པ་དག་འགྲུབ་པར་བྱེད་ཅིང་བླ་ན་མེད་པའི་སྨོན་ལམ་འདོད་པའི་བཟོད་པའི་ཕ་རོལ་ཏུ་ཕྱིན་པ་གང་ཡིན་པ་དེ་ནི་ངོམས་པའི་བཟོད་པའི་ཕ་རོལ་ཏུ་ཕྱིན་པའོ། །​འདུས་བྱས་རྣམས་ལ་ལྷག་པར་ཆགས་པ་མེད་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གང་ཡིན་པ་



The English translation of this folio by 84000 Translating the words of the Buddha can be found at:
https://read.84000.co/translation/toh94.html?part=UT22084-045-001-13927#UT22084-045-001-13927