།ལྟ་སྦྱོང་དེ་བཞིན་སྲིད་པ་ཟད་བྱེད་དང་། །རྣམ་པར་རོལ་དང་ཞིང་བཀོད་འབྱོར་པ་དག །འདི་དང་རབ་ཏུ་ལྡན་ལ་དཀོན་མ་ཡིན། །དེ་བཞིན་རྣམ་གྲོལ་སྤོབས་པ་ཕུན་ཚོགས་དང་། །བྱ་བ་ཐམས་ཅད་སྦྱོང་བྱེད་གཟུགས་དག་དང་། །བསམ་པ་ཇི་བཞིན་བྱང་ཆུབ་འཚང་རྒྱ་བ། །དེ་དག་ཐམས་ཅད་འདིར་གནས་མོད་པ་ཡིན། །ང་ཡིས་དེ་སྙེད་ཚིག་གིས་རྗོད་ནུས་རྣམས། །དེ་ལྟ་བས་ན་དེ་དག་འདིར་སྒྲུབས་ཤིག །ཀུན་མཁྱེན་ཆོས་ལ་དགའ་བར་མ་བྱས་ན། །ཕྱི་དུས་དག་ན་འགྱོད་པར་གྱུར་ཏ་རེ། །ཕ་རོལ་ཕྱིན་པ་ཇི་སྙེད་ངས་བསྟན་དང་། །གང་དག་ཡེ་ཤེས་རྒྱ་མཚོ་སྦྱོར་ལམ་དག །ལུས་རྟེན་བྱིས་པའི་སྤྱོད་ལ་གནས་པ་ཡིས། །ཤེས་པར་བྱ་བ་དག་ཏུ་ནུས་མ་ཡིན། །དུས་ངན་པ་དང་སེམས་ཅན་མ་རུངས་དང་། །ཆོས་ནུབ་མཐའ་དང་ངན་སོང་འཕེལ་བ་ན། །མཁས་པས་ཤིན་ཏུ་ཡིད་བྱུང་བྱས་ནས་ཀྱང་། །བག་ཡོད་རི་དགས་བཞིན་དུ་སྐྲག་པར་འགྱུར། །མཆོག་ཏུ་དགའ་བའི་རྒྱལ་པོ། བྱང་ཆུབ་སེམས་དཔའ་གང་ཞིག་གིས་བསྐལ་པ་སྟོང་དུ་ཐབས་མཁས་པ་མ་གཏོགས་པར། ཕ་རོལ་ཏུ་ཕྱིན་པ་དྲུག་དག་ལ་སྤྱད་པ་བས་ནི། ཏིང་ངེ་འཛིན་འདི་ཐོས་ནས་རྗེས་སུ་ཡི་རང་བར་བྱས་པའི་བསོད་ནམས་ཀྱི་ཕུང་པོ་འདི་ལ། བསོད་ནམས་ཀྱི་ཕུང་པོ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོ་བ་ནས། དཔེའི་བར་དུ་ཡང་ཉེ་བར་མི་འགྲོའོ། །ཆོས་ཀྱི་རྣམ་གྲངས་འདི་བསྟན་པ་ན། བྱང་ཆུབ་སེམས་དཔའ་གྲངས་མེད་པ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ལྷ་དང་མིའི་སྐྱེ་དགུའི་ཚོགས་བརྒྱད་འབུམ་སྙེད་ཀྱང་། རྡུལ་མེད་ཅིང་དྲི་མ་དང་བྲལ་ལ་ཆོས་རྣམས་ལ་ཆོས་ཀྱི་མིག་རྣམ་པར་དག་གོ །ལྷ་དེ་དག་ཆོས་ཀྱི་མིག་རྣམ་པར་དག་པས་བཅོམ་ལྡན་འདས་ཀྱི་ཆོས་ལ་མངོན་པར་དགའ་བའི་ཕྱིར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དག་མེ་ཏོག་གིས་ཆལ་པར་བཀྲམ་པར་གྱུར་ཏོ།