།དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཆོས་ཀྱི་དབང་ཕྱུག་བྲམ་ཟེའི་བུར་གྱུར་ཚེ། །དེ་བཞིན་གཤེགས་པ་ཡིད་དུ་འོང་བའི་དབྱངས་དེ་ལ། །ཀུ་ཤ་དག་ལས་བྱས་པའི་ན་བཟའ་ཕུལ་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཚངས་དབྱངས་ཞིང་པའི་ཚེ། །བསོད་ནམས་འདོད་ཕྱིར་ཁྲོན་དྲུང་ཆུ་ཏོམ་བཞག །དེ་བཞིན་གཤེགས་པ་དགོངས་པ་ཆེན་པོ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྤྱོད་བཟང་བ་ལང་རྫི་ཡི་ཚེ། །དེ་བཞིན་གཤེགས་པ་གསལ་བའི་ལྷ་དེ་ལ། །སྣོད་དག་ཞོ་ཡིས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཁྲུལ་མེད་བློ་ནི་གླིང་བུ་མཁན། །བྱེད་ཚེ་བདེ་གཤེགས་སེམས་སྤྱོད་བདུད་རྩི་ལ། །ཡིད་དུ་འོང་བའི་སྒྲ་དག་བསྒྲགས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དབྱངས་ཆེན་ཁྱིམ་བདག་ཚེ། །གཙུག་ལག་ཁང་ནི་སྟོང་སྙེད་བྱས་ནས་ཀྱང་། །དེ་བཞིན་གཤེགས་པ་བློ་གྲོས་གསལ་བ་ལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྙན་གྲགས་ཚོང་དཔོན་བུར་གྱུར་ཚེ། །དེ་བཞིན་གཤེགས་པ་སྒྲོན་མ་མཆོག་དེ་ལ། །ཕྲེང་བ་བརྒྱུས་པ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ཏོག་ལྡན་ཤིང་ཐུན་ཚེ། །དེ་བཞིན་གཤེགས་པ་བློ་གྲོས་བརྟན་པ་ལ། །ཨུད་པལ་གསུམ་ཞིག་གཏོར་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཟི་བརྗིད་རྣམ་གྲགས་ཚོང་དཔོན་གྱི། །བུ་ཚེ་བདེ་གཤེགས་མཐུ་རྩལ་སྟོབས་དེ་ལ། །མེ་ཏོག་དག་གི་ཕུར་མ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འགྲོ་བའི་དབང་ཕྱུག་དེད་དཔོན་ཚེ། །དེ་བཞིན་གཤེགས་པ་པད་འདབ་སྤྱན་དེ་ལ། །ནོར་བུའི་སྒྲོན་མ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལྗོན་པ་དབུལ་པོའི་ཚེ། །དེ་བཞིན་གཤེགས་པ་བྱང་ཆུབ་འོད་དེ་ལ། །མ་ཥའི་སྒྲོན་མ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་གཏི་མུག་རབ་ཟད་བྱ་བའི་ཚེ།