།བདེ་གཤེགས་དགེ་བའི་སྒྲོན་མ་ཚོང་པའི་ཚེ། །དེ་བཞིན་གཤེགས་པ་མཐུ་རྩལ་ཆེ་དེ་ལ། །བ་སོའི་གཟིམས་ཁྲི་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མཐུ་རྩལ་བརྟན་པོ་བྲམ་ཟེའི་ཚེ། །དེ་བཞིན་གཤེགས་པ་དམ་བཅས་བརྟན་པ་ལ། །ཨ་མྲའི་ཁུ་བ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་ལྷ་སྒྲ་ཚོང་པའི་ཚེ། །དེ་བཞིན་གཤེགས་པ་དོན་གྲུབ་དེ་ལ་ནི། །པ་ལ་ཤི་ཀ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་རབ་ཞི་གོས་འཚོང་ཚེ། །དེ་བཞིན་གཤེགས་པ་ཕན་པར་དགྱེས་དེ་ལ། །ན་བཟའ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཉི་མའི་ཞལ་ནི་ཁྱིམ་བདག་ཚེ། །དེ་བཞིན་གཤེགས་པ་ལྷ་ཡིས་མཆོད་དེ་ལ། །རྫིང་བུ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཐར་པའི་བརྟུལ་ཞུགས་མི་བཀྲེན་ཚེ། །དེ་བཞིན་གཤེགས་པ་སྤོང་བའི་ཤུགས་དེ་ལ། །པྲི་ཡང་ཀུ་ཡི་བསོད་སྙོམས་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཚུལ་ཁྲིམས་འོད་ནི་དབུལ་པོའི་ཚེ། །དེ་བཞིན་གཤེགས་པ་རིན་ཆེན་གཏོང་དེ་ལ། །ཚོད་མའི་ཁུ་བ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བརྟུལ་ཞུགས་གནས་པ་ཁྱིམ་བདག་གི། །བུ་མོའི་ཚེ་ན་བདེ་གཤེགས་ཡེ་ཤེས་ཤུགས། །དེ་ལ་ཨུད་པལ་ལྡ་ལྡི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་རྡུལ་མེད་ཕྲེང་རྒྱུད་བུ་མོའི་ཚེ། །དེ་བཞིན་གཤེགས་པ་ཟམ་པ་དེ་ལ་ནི། །པད་མ་འདབ་བརྒྱ་པ་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སྙིང་པོ་འཕགས་པ་ཚོང་པའི་ཚེ། །དེ་བཞིན་གཤེགས་པ་ཐར་པ་བཟང་པོ་ལ། །རས་ཡུག་གཅིག་གིས་དགབ་པ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མིག་སྨན་ལམ་སྟོན་ཚེ། །དེ་བཞིན་གཤེགས་པ་ཚོགས་ནི་རྣམ་གནོན་ལ། །ཨ་མྲའི་འབྲས་བུ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་འཕེལ་མཛད་རྒྱལ་པོའི་ཚེ། །དེ་བཞིན་གཤེགས་པ་གཟི་བརྗིད་སྣང་བ་ལ།