ན་བཟའ་དག་ནི་བཀྲུ་བཤལ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་དཔལ་ནི་ཁྱིམ་བདག་ཚེ། །དེ་བཞིན་གཤེགས་པ་སྟོན་པའི་སྟེགས་དེ་ལ། །བཞུགས་གདན་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་དགྲ་རྒྱལ་བྲམ་ཟེའི་ཆུང་མའི་ཚེ། །བདེ་གཤེགས་ཁྲོ་འཇོམས་བྱང་ཆུབ་སྙིང་པོར་ནི། །གཤེགས་ཚེ་སྦྲང་རྩིར་བསྲེས་པའི་འོ་མ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འབྱོར་ལྡན་གྲགས་པ་སློང་བའི་ཚེ། །དེ་བཞིན་གཤེགས་པ་སེང་གེའི་སྐུ་དེ་ལ། །ཨུ་དུམ་བཱ་རའི་འབྲས་བུ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཡུལ་འཁོར་བཟང་པོ་ཕྲེང་རྒྱུད་བུ་མོའི་ཚེ། །དེ་བཞིན་གཤེགས་པ་བཤེས་གཉེན་གྲགས་པའི་འོད་དེ་ལ། །ཤིང་འཛམ་བུ་ཡི་འབྲས་བུ་དབུལ་བ་བྱས་ནས་ཀྱང་། །དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་མེ་ཏོག་འོད་ནི་ཕྱུགས་རྫིའི་ཚེ། །དེ་བཞིན་གཤེགས་པ་ང་རོ་རྣམ་དག་ལ། །ལྷུང་བཟེད་དར་བས་བཀང་སྟེ་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་སེང་གེའི་ང་རོ་བྲམ་ཟེའི་ཚེ། །དེ་བཞིན་གཤེགས་པ་བཟང་པོ་བཞེད་དེ་ལ། །བསྟོད་པ་དག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཟླ་ལྟར་ཤར་བ་ཚོང་པའི་ཚེ། །དེ་བཞིན་གཤེགས་པ་རབ་ཞི་བདག་པོ་ལ། །དངུལ་ལས་བྱས་པའི་ལྷུང་བཟེད་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་འཇོམས་པའི་མཆོག་ནི་ཚོང་དཔོན་ཚེ། །དེ་བཞིན་གཤེགས་པ་དུལ་བའི་གཟི་བརྗིད་ཀྱི། །གཙུག་ལག་ཁང་ནི་ཙན་དན་དམར་པོས་བྱུགས། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །དེ་བཞིན་གཤེགས་པ་མི་གཡོ་ཕྲེང་རྒྱུད་ཚེ། །དེ་བཞིན་གཤེགས་པ་གཟི་བརྗིད་ལེགས་མཆོད་ལ། །མེ་ཏོག་བླ་རེ་དག་ནི་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་ཕན་ལྡན་གཤེགས་པ་ཚོང་པའི་ཚེ། །དེ་བཞིན་གཤེགས་པ་འཇིག་རྟེན་འོད་དེ་ལ། །དངུལ་ལས་བྱས་པའི་མེ་ཏོག་གཏོར་ནས་ཀྱང་།