Degé Kangyur volume 45, F.310.a

ནི་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་དལ་བཞུད་དགེ་སློང་རྐྱེན་པའི་ཚེ། །​དེ་བཞིན་གཤེགས་པ་བསོད་ནམས་དཔལ་དེ་ལ། །​སོ་བི་ར་ཀའི་བཏུང་བ་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །བདེ་གཤེགས་བརྟུལ་ཞུགས་དཀའ་ཐུབ་ཕྱག་དར་པ་ཡི་ཚེ། །​དེ་བཞིན་གཤེགས་པ་བསྡུ་བ་མཁྱེན་པ་པོ་དེ་ཡི། །​ལམ་སྲང་ཁྲུ་བཅུ་སྲིད་དུ་ཕྱག་དར་བྱས་ནས་ཀྱང་། །​དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་འོད་ཟེར་ཕུང་པོ་ཁྱིམ་བདག་ཚེ། །​དེ་བཞིན་གཤེགས་པ་མཚན་གྱི་རྒྱལ་པོ་དེ། །​འཇིགས་པ་མེད་པས་དགོན་པར་སྤྱན་དྲངས་ནས། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་གཟི་བརྗིད་ཆེན་པོ་རྒྱལ་བུའི་ཚེ། །​དེ་བཞིན་གཤེགས་པ་རིམས་ནད་མེད་པ་ཡི། །​བློ་མངའ་དེ་ལ་རྒྱན་དག་ཕུལ་ནས་ཀྱང་། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཙམ་པ་ཀ་ནི་རྒྱལ་ཕྲན་ཚེ། །​དེ་བཞིན་གཤེགས་པ་འཕགས་པ་དུལ་བ་ལ། །​མུ་སྣི་ཀ་དག་དབུལ་བ་བྱས་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​དེ་བཞིན་གཤེགས་པ་དགའ་མཛད་བྲམ་ཟེའི་ཚེ། །དེ་བཞིན་གཤེགས་པ་ཆོས་ཀྱི་ལྷ་དེ་ལ། །​རིལ་བ་སྤྱི་བླུགས་དག་ནི་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་ཚོགས་ཅན་བཟང་པོ་ལྷ་བུའི་ཚེ། །​དེ་བཞིན་གཤེགས་པ་ཡོན་ཏན་བདུད་རྩི་དེས། །​ཆོས་ཀྱི་འཁོར་ལོ་བསྐོར་ཚེ་ལེགས་པ་ཕུལ། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་དབང་པོའི་རྒྱལ་མཚན་མཆོད་སྡོང་སྲུང་བའི་ཚེ། །​དེ་བཞིན་གཤེགས་པ་ཐོགས་པ་མེད་པ་གྲོང་ཁྱེར་དུ། །​གཤེགས་པའི་ཚེ་ན་མཆོད་སྡོང་དག་ནི་ཕུལ་ནས་ཀྱང་། །​དང་པོ་ཉིད་དུ་བྱང་ཆུབ་ཏུ་ནི་སེམས་བསྐྱེད་དོ། །​དེ་བཞིན་གཤེགས་པ་དགྱེས་ཆེན་སྨན་པའི་ཚེ། །​དེ་བཞིན་གཤེགས་པ་བདུད་རྩིའི་ཕུང་པོ་ལ། །​སྨན་གྱི་རེང་བུ་དག་ནི་ཕུལ་ནས་ཀྱང་། །​དང་པོར་བྱང་ཆུབ་ཏུ་ནི་སེམས་བསྐྱེད་དོ། །​བདེ་གཤེགས་སྣ་མའི་མེ་ཏོག་འོད་ནི་གར་མཁན་ཚེ། །​དེ་བཞིན་གཤེགས་པ་ཟླ་བའི་འོད་ལྡན་དེ་ལ་ནི། །



The English translation of this folio by 84000 Translating the words of the Buddha can be found at:
https://read.84000.co/translation/toh94.html?part=UT22084-045-001-14473#UT22084-045-001-14473