དེ་ནི་བརྩམས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །བཙུན་མོའི་འཁོར་གྱི་ནང་ན་གནས་ཀྱང་། བསམ་གཏན་བཞི་ཆུད་མི་ཟ་བ་གང་ཡིན་པ་དེ་ནི་བརྩམས་པའི་བསམ་གཏན་གྱི་ཕ་རོལ་ཏུ་ཕྱིན་པའོ། །འདུ་བྱེད་ཐམས་ཅད་སྒྱུ་མ་ལྟ་བུར་མཐོང་བ་དང་ལྡན་ཞིང་ཟབ་མོ་མི་དམིགས་པ་དང་ལྡན་པའི་ཤེས་རབ་རྨོངས་པ་མེད་པ་གང་ཡིན་པ་དེ་ནི་བརྩམས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འདི་དག་ནི་བརྩམས་པའི་ཕ་རོལ་ཏུ་ཕྱིན་པ་དྲུག་སྟེ། དེ་དག་ནི་རྫུ་འཕྲུལ་གྱི་རྐང་པ་བཞི་ལས་བལྟ་བར་བྱའོ། །དེ་ལ་དགེ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། བག་ཆགས་ཀྱི་མཚམས་སྦྱོར་བ་འཇོམས་པར་བྱེད་པའི་སྦྱིན་པ་གང་ཡིན་པ་དེ་ནི་དགེ་བའི་སྦྱིན་པའི་ཕ་རོལ་ཏུ་ཕྱིན་པའོ། །འཕགས་པའི་ཚུལ་ཁྲིམས་ཀྱི་ཕྱིར་ཐམས་ཅད་ཡོངས་སུ་གཏོང་བར་གནས་པ་དང་། བག་མེད་པ་རྣམ་པར་སྦྱོང་བ་དང་། ངན་འགྲོ་སེལ་བ་ལ་ཉེ་བར་གནས་པའི་ཚུལ་ཁྲིམས་གང་ཡིན་པ་དེ་ནི་དགེ་བའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ཐམས་ཅད་ལ་བཟོད་ཅིང་དགེ་བའི་ཆོས་ལ་རྩོད་པ་མེད་པ་གང་ཡིན་པ་དེ་ནི་དགེ་བའི་བཟོད་པའི་ཕ་རོལ་ཏུ་ཕྱིན་པའོ། །བྱ་བར་གཏོགས་པ་ཐམས་ཅད་ལ་བརྩོན་འགྲུས་ཞུམ་པ་མེད་པ་གང་ཡིན་པ་དེ་ནི་དགེ་བའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །བསམ་གཏན་གྱི་ངོ་བོ་ཉིད་ཡུལ་མཉམ་པ་ཉིད་ལ་ཞུགས་པ་བསམ་པ་ཇི་ལྟ་བ་བཞིན་སེམས་གདུལ་བའི་ཕྱིར་གནས་པ་གང་ཡིན་པ་དེ་ནི་དགེ་བའི་བསམ་གཏན་གྱི་ཕ་རོལ་ཏུ་ཕྱིན་པ་སྟེ། དཔེར་ན་རྒྱལ་པོ་ཆེན་པོ་ལེགས་མཐོང་འདོད་པའི་རྣམ་པར་རྟོག་པ་དང་། གནོད་སེམས་ཀྱི་རྣམ་པར་རྟོག་པ་དང་། རྣམ་པར་འཚེ་བའི་རྣམ་པར་རྟོག་པ་དག་ལས་འདས་པ་ལྟ་བུའོ། །ཐམས་ཅད་ལ་མི་གནས་པའི་ཤེས་རབ་གང་ཡིན་པ་དེ་ནི་དགེ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། དེ་ཡང་སྙིང་རྗེ་ཆེན་པོ་ལས་བལྟ་བར་བྱ་བ་སྟེ། འདི་དག་ནི་དགེ་བའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣོ་བས་ཕྱེ་བའི་ཕ་རོལ་ཏུ་ཕྱིན་པ་དྲུག་གང་ཞེ་ན། མི་དམིགས་པ་ལ་གནས་པའི་སྦྱིན་པ་གང་ཡིན་པ་དེ་ནི་རྣོ་བའི་སྦྱིན་པའི་ཕ་རོལ་ཏུ་ཕྱིན་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པས་རློམ་སེམས་མེད་ཅིང་དངོས་པོ་བཅབས་པ་མེད་པ་གང་ཡིན་པ་དེ་ནི་རྣོ་བའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ།