།རིགས་ནི་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་ཁྲི་ཡོད་ཡབ་ནི་ལྷ་དབང་ཡིན། །སྤྱོད་པ་ཅན་ཞེས་བྱ་བ་རྒྱལ་བའི་ཡུམ། །སྲས་པོ་ཡིད་འོང་སྣང་ལྡན་རིམ་གྲོ་པ། །ཆོས་ཀྱི་འོད་ཅེས་བྱ་བ་མཁས་པ་སྟེ། །ཡོན་ཏན་མཆོག་ལ་གནས་པ་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་གསུམ་ཀུན་ལའང་། །སྲིད་པའི་མདུད་པ་ཐམས་ཅད་རྣམ་གྲོལ་བ། །བྱེ་བ་ཕྲག་ནི་དགུ་བཅུ་ལྔ་ལྔ་ཡོད། །མི་ཚེ་ལོ་གྲངས་དགུ་ཁྲི་དགུ་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་དགུ་ཁྲིའི་བར་དུ་གནས་པར་འགྱུར། །སྐུ་གདུང་མཆོད་རྟེན་དཔག་ཚད་བརྒྱད་པ་གཅིག ། གསེར་དང་ནོར་བུའི་ལྡ་ལྡིས་མཛེས་པར་བྱས། །རྒྱལ་བ་ཡུལ་འཁོར་མྱ་ངན་མེད་པ་ཡི། །སྐྱེ་བའི་ཡུལ་ནི་མྱ་ངན་སེལ་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་དགུ་བཅུ་ཡབ་ནི་དུལ་བ་ཡིན། །ཉེས་པ་སྤོང་ཞེས་བྱ་བ་རྒྱལ་བའི་ཡུམ། །སྲས་པོ་ཚལ་འདོར་དྲག་ཤུལ་རིམ་གྲོ་པ། །ཡོན་ཏན་མིག་ཅེས་བྱ་བ་མཁས་པ་སྟེ། །གྲགས་པ་རྣམ་པར་སྤྲུལ་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །དུལ་བའི་ཡིད་ལྡན་བསྒོམས་པའི་བདག་ཉིད་ཅན། །བྱེ་བ་ཕྲག་ནི་བརྒྱ་བརྒྱ་འདུས་པར་འགྱུར། །མི་ཚེ་ལོ་གྲངས་བརྒྱད་ཁྲི་སུམ་སྟོང་ཡིན། །དམ་པའི་ཆོས་དག་ལོ་གྲངས་སྟོང་ཕྲག་ནི། །བརྒྱད་ཅུ་རྩ་གསུམ་བར་དུ་གནས་པར་འགྱུར། །འགྲོ་ལ་ཕན་ཕྱིར་རྒྱལ་བའི་སྐུ་གདུང་དག །རྒྱས་པར་འགྱུར་ཏེ་ཞིང་རྣམས་གང་བར་འགྱུར། །དེ་བཞིན་གཤེགས་པ་བློ་གྲོས་སེམས་པ་ཡི། །སྐྱེ་བའི་ཡུལ་ནི་ཡིད་ཚིམ་བྱེད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་སྟོང་ཡོད་རྫུ་འཕྲུལ་ལྷ་ནི་ཡབ། །ཡིད་གཉིས་འདོད་ཅེས་བྱ་བ་རྒྱལ་བའི་ཡུམ། །སྲས་པོ་ལྟ་བྱེད་དེས་པ་རིམ་གྲོ་པ། །ཤེས་རབ་འཕགས་ཞེས་བྱ་བ་མཁས་པ་སྟེ། །མཆོག་རྒྱལ་བརྟུལ་ཞུགས་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་གཅིག་ཀུན་ལའང་། །བག་ཆགས་ཕ་མཐར་ཕྱིན་པའི་བསམ་གཏན་པ། །བྱེ་བ་ཕྲག་ནི་བརྒྱད་ཅུ་གཉིས་གཉིས་ཡོད། །མི་ཚེ་ལོ་གྲངས་བརྒྱད་ཁྲི་ལྔ་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །སྐུ་གདུང་མཆོད་རྟེན་དཔག་ཚད་བཅུ་གཉིས་པ།