།སྲས་པོ་ཐར་དགའ་ཡོན་ཏན་རིམ་གྲོ་པ། །དགའ་མཆོག་ཅེས་ནི་བྱ་བ་མཁས་པ་སྟེ། །རིན་ཆེན་གསལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་ལྔ་བཅུ་ཀུན་ལ་ཡང་། །སེང་གེ་ལྟ་བུའི་འཇིགས་པ་མེད་ཐོབ་པ། །བྱེ་བ་ཕྲག་ནི་ཉི་ཤུ་རེ་རེ་ཡོད། །མི་ཚེ་ལོ་གྲངས་ཆིག་ཁྲི་བཞི་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲི་དྲུག་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །ཁམས་གསུམ་རིན་པོ་ཆེ་ཡིས་གང་བར་འགྱུར། །དེ་བཞིན་གཤེགས་པ་དྲང་སྲོང་གསལ་བ་ཡི། །སྐྱེ་བའི་ཡུལ་ནི་འཕགས་པས་བསྔགས་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བདུན་སྟོང་ཡབ་ནི་སྒྲོན་མ་ཡིན། །ལྷ་ཡི་རྒྱལ་མཚན་ཞེས་བྱ་རྒྱལ་བའི་ཡུམ། །སྲས་པོ་མཐུ་རྩལ་རབ་རྩལ་རིམ་གྲོ་པ། །དགྲ་བཅོམ་པ་ཡིས་བསྟོད་པ་མཁས་པ་སྟེ། །བཀོད་པ་གནས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་གཉིས་ཀུན་ལའང་། །སྲིད་པའི་ཀུན་ལས་རྒལ་བའི་ཡིད་ལྡན་པ། །བྱེ་བ་སྟོང་ཕྲག་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་སུམ་ཁྲི་བཞི་སྟོང་ཡིན། །གྲགས་པ་མཐའ་ཡས་མྱ་ངན་འདས་ནས་ཀྱང་། །དམ་ཆོས་ལོ་གྲངས་སྟོང་དུ་གནས་པར་འགྱུར། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །ཞིང་རྣམས་ཀུན་དུ་མཆོད་རྟེན་དག་གིས་གང་། །སངས་རྒྱས་ཡོན་ཏན་བརྩོན་འགྲུས་སྐྱེ་བ་ཡི། །ཡུལ་ནི་ཡོན་ཏན་རིན་ཆེན་འཕྲོ་ཞེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་སུམ་སྟོང་ཡབ་ནི་ལེགས་ཞི་ཡིན། །ཕན་པར་སེམས་ཞེས་བྱ་བ་རྒྱལ་བའི་ཡུམ། །སྲས་པོ་སྒོམ་བྱེད་རབ་ཞི་རིམ་གྲོ་པ། །པད་མའི་འོད་ཅེས་བྱ་བ་མཁས་པ་སྟེ། །བཀོད་པ་མཛེས་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །དགྲ་དག་ཆོམས་པ་དེ་དག་འདུས་པའི་གྲངས། །འབུམ་ཕྲག་དགུ་བཅུ་རྩ་ནི་དགུ་དགུ་ཡོད། །མི་ཚེ་ལོ་གྲངས་དགུ་ཁྲི་དགུ་སྟོང་ཡིན། །དམ་པའི་ཆོས་དག་ལོ་གྲངས་སྟོང་ཕྲག་ནི། །དགུ་བཅུ་རྩ་བརྒྱད་བར་དུ་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་བཅུ་གསུམ་པ། །བཻ་དཱུརྱ་ཡི་རྒྱལ་མཚན་དག་གིས་བསྐོར།