།ཐེར་འབུམ་ཕྲག་ནི་བཅུ་བཅུ་ཚང་བར་འགྱུར། །མི་ཚེ་ལོ་གྲངས་ཆིག་ཁྲི་ལྔ་སྟོང་ཡིན། །བདེ་བར་གཤེགས་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་ཆིག་ཁྲི་ལྔ་སྟོང་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །གསེར་གྱི་རྟ་བབས་མུ་ཏིག་བླ་རེར་ལྡན། །དེ་བཞིན་གཤེགས་པ་བདུད་རྩི་གསལ་བ་ཡི། །སྐྱེ་ཡུལ་འཇིག་རྟེན་སྣང་བར་བྱེད་ཅེས་བྱ། །རྒྱལ་བའི་རིགས་ནི་རྒྱལ་རིགས་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་གྲགས་བྱིན་ཡིན། །བདུད་རྩི་གྲགས་ཞེས་བྱ་བ་རྒྱལ་བའི་ཡུམ། །ཡོན་ཏན་འོད་སྲས་གཙོ་བོ་རིམ་གྲོ་པ། །ས་ལ་འགྲོ་ཞེས་བྱ་བ་མཁས་པ་སྟེ། །རྣམ་པར་དག་པར་གནས་པ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །རྫུ་འཕྲུལ་རྐང་པ་མཆོག་ལ་དབང་གྱུར་པ། །བྱེ་བ་ཕྲག་ནི་བདུན་ཅུ་རེ་རེ་ཡོད། །མི་ཚེ་ལོ་གྲངས་བདུན་ཁྲི་སུམ་སྟོང་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བདུན་ཁྲི་ལྔ་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་དཔག་ཚད། །གསུམ་པ་ནོར་བུའི་ཆུན་པོ་བླ་རེར་ལྡན། །དེ་བཞིན་གཤེགས་པ་བསམ་གཏན་སྙོམས་པ་ཡི། །སྐྱེ་བའི་ཡུལ་ནི་འཕགས་པས་བལྟས་ཞེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་དབྱངས་བཟངས་ཡིན། །དབྱངས་ལྡན་མ་ཞེས་བྱ་བ་རྒྱལ་བའི་ཡུམ། །སྲས་པོ་ལེགས་པ་མ་སྨད་རིམ་གྲོ་པ། །དུལ་གནས་དགའ་ཞེས་བྱ་བ་མཁས་པ་སྟེ། །ཉི་མ་སྒྲོན་མ་ཞེས་བྱ་རྫུ་འཕྲུལ་ཅན། །འདུས་པ་ལན་གྲངས་ཉི་ཤུ་གཉིས་ཀུན་ལའང་། །དགྲ་བཅོམ་གཡོ་མེད་དྲི་མ་མེད་པ་པོ། །བྱེ་བ་ཕྲག་ནི་ཉི་ཤུ་རེ་རེ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །ཡོངས་སུ་མྱ་ངན་འདས་ནས་དམ་ཆོས་དག །ལོ་གྲངས་བརྒྱད་ཁྲི་བདུན་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བཅུ་གཅིག་པ་ལ་རིན་ཆེན་སྤྲས། །མི་ཡི་འདྲེན་པ་འཁྲུག་པ་མེད་པ་ཡི། །སྐྱེ་བའི་ཡུལ་ནི་བྱམས་པས་བལྟས་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་རྩ་ལྔ་ལྷ་ཡི་རྫུ་འཕྲུལ་ཡབ། །ལྷ་དགའ་རྒྱལ་བའི་ཡུམ་ཡིན་སྲས་པོ་ནི། །ལྷ་བྱེད་ན་ཚོད་བཟང་པོ་རིམ་གྲོ་པ།