།རིགས་ནི་རྒྱལ་རིགས་ཡིན་ཏེ་འོད་དཔག་ཚད། །བདུན་ཅུ་རྩ་གཉིས་ཡབ་ནི་བློ་གྲོས་ལྡན། །བལྟ་བཟོད་མ་ཞེས་བྱ་བ་རྒྱལ་བའི་ཡུམ། །སྲས་པོ་རྩི་སྨན་མདངས་བཟངས་རིམ་གྲོ་པ། །ཆོས་ཀྱི་འབྱུང་གནས་ཞེས་བྱ་མཁས་པ་སྟེ། །འཇིག་རྟེན་གཞོལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བདུན་ཅུ་ཀུན་ལ་ཡང་། །འཇིག་རྟེན་ཟང་ཟིང་མེད་པའི་དགྲ་བཅོམ་པ། །བྱེ་བ་ཕྲག་ནི་ཁྲི་ཕྲག་གཉིས་གཉིས་ཡོད། །མི་ཚེ་ལོ་གྲངས་དགུ་ཁྲི་ཉིས་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་དགུ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བདུན་པ་གསེར་གྱི་བླ་རེར་ལྡན། །དེ་བཞིན་གཤེགས་པ་ཡུལ་འཁོར་སྤོབས་པ་ཡི། །སྐྱེ་བའི་ཡུལ་ནི་མཁས་པས་མཆོད་ཅེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །དགུ་བཅུ་རྩ་དགུ་ཡབ་ནི་ཡོན་ཏན་དོན། །དོན་སྨྲ་བ་ཞེས་བྱ་བ་རྒྱལ་བའི་ཡུམ། །སྲས་པོ་ལྟ་བྱེད་ལེགས་མཐོང་རིམ་གྲོ་པ། །བློ་གྲོས་རྒྱ་མཚོ་ཞེས་བྱ་མཁས་པ་སྟེ། །མཆོག་ཏུ་ཁྱད་པར་འཕགས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །དགྲ་བཅོམ་ཀུན་ལ་ཕན་ཕྱིར་སྙིང་བརྩེ་བ། །བྱེ་བ་ཕྲག་ནི་བདུན་ཅུ་བཞི་བཞི་ཡོད། །མི་ཚེ་ལོ་གྲངས་ཁྲི་ཕྲག་སྟོང་རྩ་བཞི། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་བདུན་ཁྲི་དྲུག་སྟོང་བར་དུ་གནས། །འགྲོ་ལ་ཕན་ཕྱིར་རྒྱལ་བའི་སྐུ་གདུང་དག །ཞིང་རྣམས་དག་ཏུ་རྒྱས་ཤིང་གང་བར་འགྱུར། །སངས་རྒྱས་རིན་ཆེན་རབ་སྦྱིན་སྐྱེ་བ་ཡི། །ཡུལ་ནི་ཐམས་ཅད་སྣང་བར་བྱེད་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་འབྱོར་པའི་ལྷ། །ལྷ་ཡི་དབང་ཕྱུག་མ་ནི་རྒྱལ་བའི་ཡུམ། །སྲས་པོ་ལྷ་དགའ་ལྷ་ནི་རིམ་གྲོ་པ། །བདུད་རྩིའི་དབྱངས་ཞེས་བྱ་བ་མཁས་པ་སྟེ། །གནས་པ་མཐའ་ཡས་པ་ནི་རྫུ་འཕྲུལ་ཅན། །འདུས་པ་ལན་གྲངས་དགུ་བཅུ་ཀུན་ལ་ཡང་། །བྱས་པའི་མཐར་ཕྱིན་ཞི་བར་གྱུར་པ་པོ། །བྱེ་བ་ཕྲག་ནི་བདུན་ཅུ་གསུམ་གསུམ་ཡོད། །མི་ཚེ་ལོ་གྲངས་དགུ་ཁྲི་བཞི་སྟོང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་དགུ་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་དག་གི་མཆོད་རྟེན་ནི།