།ཡུམ་ནི་སྣང་བ་མཐའ་ཡས་བཀོད་པའི་གཟི་བརྗིད་ཅེས་བྱའོ། །སྲས་ནི་འཇིག་རྟེན་ཐམས་ཅད་ན་མཛེས་པ་ཞེས་བྱའོ། །རིམ་གྲོ་པ་ནི་འཇིག་རྟེན་ཐམས་ཅད་ཀྱིས་བསྔགས་པར་སེམས་པ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མངོན་པར་ཤེས་པ་ཡོན་ཏན་རིན་པོ་ཆེ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཡོན་ཏན་ཐམས་ཅད་ཀྱི་བརྡ་འཛིན་པ་ཞེས་བྱའོ། །དགྲ་བཅོམ་པ་འདུས་པ་ནི་ལན་བདུན་ཅུ་སྟེ། ཐམས་ཅད་ལ་ཡང་བྱེ་བ་ཕྲག་ལྔ་བཅུ་རྩ་དྲུག་དྲུག་གོ། །སྐུ་ཚེའི་ཚད་ནི་ལོ་བདུན་ཁྲི་ཉིས་སྟོང་ངོ་། །དམ་པའི་ཆོས་ནི་ལོ་ལྔ་ཁྲི་ལྔ་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཤེས་རབ་བྱིན་སྐྱེ་བའི་ཡུལ་ནི་ཤེས་རབ་སྐར་མདའ་ཅན་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་དྲུག་གོ། །ཡབ་ནི་ཤེས་རབ་སྐར་མདས་མངོན་པར་ཤེས་པའི་མེ་ཏོག་ཀུན་ཏུ་རྒྱས་པ་ཞེས་བྱའོ། །ཡུམ་ནི་ལུས་ཤིན་ཏུ་རྣམ་པར་འབྱེས་པ་འོད་མཐའ་ཡས་པ་ཞེས་བྱའོ། །སྲས་ནི་ཤེས་རབ་རྣམ་པར་ངེས་པའི་རྒྱལ་པོ་ཞེས་བྱའོ། །རིམ་གྲོ་པ་ནི་ཤེས་རབ་ཀྱིས་རྣམ་པར་བསྒོམས་ཤིང་སྦྱངས་པའི་སེམས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མ་འཁྲུགས་ཤིང་ཤེས་རབ་བརྩེགས་པའི་འགྲོས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཤིན་ཏུ་རྣམ་པར་ངེས་པའི་རི་བོ་ཞེས་བྱའོ། །དགྲ་བཅོམ་པ་འདུས་པ་ནི་ལན་དྲུག་ཅུ་སྟེ། ཐམས་ཅད་ལ་ཡང་ཐེར་འབུམ་ཕྲག་བཅུ་བཅུའོ། །སྐུ་ཚེའི་ཚད་ནི་ལོ་བདུན་ཁྲི་ཉིས་སྟོང་ངོ་། །དམ་པའི་ཆོས་ནི་ལོ་བདུན་ཁྲིའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་མཉམ་པར་བཞག་པའི་བདག་ཉིད་སྐྱེ་བའི་ཡུལ་ནི་ཀུན་ནས་གནས་པར་གྲགས་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་ལྔ་བརྒྱའོ། །ཡབ་ནི་ཞི་གནས་རྙེད་ཅིང་ཐོབ་པ་ཞེས་བྱའོ། །ཡུམ་ནི་སེམས་ལ་གཡོ་བ་མེད་པ་ཞེས་བྱའོ། །སྲས་ནི་བདུད་རྩི་དྲན་པའི་གཟི་བརྗིད་ཅེས་བྱའོ། །རིམ་གྲོ་པ་ནི་ཐར་པ་རིན་པོ་ཆེའི་སྣོད་བློ་ཅན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་དགེ་བའི་སེམས་ལ་རབ་ཏུ་ཞི་བའི་འགྲོས་ལ་གནས་པ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་གཡོ་བ་མེད་པའི་གོ་འཕང་རྣམ་པར་གནོན་པའི་སེམས་ཞེས་བྱའོ།