Degé Kangyur volume 45, F.3.a

ཚངས་པ་ཆེན་པོ་དང་། ཀླུའི་བདག་པོ་དང་། གནོད་སྦྱིན་གྱི་བདག་པོ་དང་། ལྷ་མ་ཡིན་གྱི་བདག་པོ་དང་། ནམ་མཁའ་ལྡིང་གི་བདག་པོ་དང་། མི་འམ་ཅིའི་བདག་པོ་དང་། ལྟོ་འཕྱེ་ཆེན་པོའི་བདག་པོ་དང་། དྲི་ཟའི་བདག་པོ་དང་། དེ་དག་ཐམས་ཅད་བཅོམ་ལྡན་འདས་ག་ལ་བ་དེར་དོང་སྟེ། བཅོམ་ལྡན་འདས་ལ་མེ་ཏོག་སིལ་མས་གཏོར་ནས་འཁོད་པར་གྱུར་ཏོ། །​དེ་ནས་བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོས་ཉིན་ཞག་བདུན་ཟས་བཅད་དེ་འཆག་ཅིང་འགྲེང་ལ་འདུག་བཞིན་དུ་གློས་མ་ཕབ་པར་རྨུགས་པ་དང་། གཉིད་མེད་པར་མངོན་པར་བརྩོན་པར་གྱུར་ཏོ། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་མཆོག་ཏུ་དགའ་བའི་རྒྱལ་པོས་འདི་སྐད་ཅེས་གསོལ་ཏོ། །​བྱང་ཆུབ་སེམས་དཔའ་ཆོས་གང་རྫོགས་པར་བགྱིས་ན་སེམས་ཅན་ཐམས་ཅད་ཀྱི་བསམ་པ་དང་སྤྱོད་པ་འཚལ་བར་འགྱུར་བ་དང་། སངས་རྒྱས་རྣམས་ཀྱི་དགོངས་པའི་བཀའ་ལ་འཇུག་པར་འགྱུར་བ་དང་། ཕྱིན་ཅི་ལོག་ཏུ་སྟོན་པ་ལས་མི་སྟོན་པར་འགྱུར་བ་དང་། སྒྲ་ཇི་ལྟ་བ་བཞིན་དུ་བདེན་པ་ཤེས་པ་ལ་རྗེས་སུ་འཇུག་པར་འགྱུར་བ་དང་། ད་ལྟར་གྱི་སངས་རྒྱས་ཐམས་ཅད་ལ་སྒྲིབ་པ་མེད་པར་འགྱུར་བ་དང་། འདི་ལྟ་སྟེ་སངས་རྒྱས་དང་འགྲོགས་པ་འཐོབ་ཅིང་མཐོང་བ་དང་། ཆོས་ཀྱིས་ངེས་པ་འཐོབ་པར་འགྱུར་བ་དང་། འཇིག་རྟེན་གྱི་ཆོས་ལ་ཡང་སྤྱོད་ལ་འཇིག་རྟེན་པས་ཀྱང་མི་གོས་པར་འགྱུར་བ་དང་། སྙོམས་པར་འཇུག་པ་ལ་གནས་ཀྱང་དེ་དེར་སྐྱེ་བར་མི་འགྱུར་བ་དང་། མྱ་ངན་ལས་འདས་པའི་ཆོས་ལ་སྤྱོད་ཀྱང་ཡོངས་སུ་མྱ་ངན་ལས་འདའ་བར་མི་འགྱུར་བ་དང་། སངས་རྒྱས་ཀྱི་སྨོན་ལམ་ཡོངས་སུ་རྫོགས་པར་མ་བགྱིས་པར་ཉན་ཐོས་དང་། རང་སངས་རྒྱས་ཀྱི་ཆོས་ལ་སྤྱོད་ཀྱང་ཐེག་པ་དེ་དག་གིས་ངེས་པར་མི་འབྱུང་བར་འགྱུར་བ་དང་། སངས་རྒྱས་རྗེས་སུ་དྲན་པ་ལ་སེམས་ནག་ནོག་མ་མཆིས་པར་འགྱུར་བ་དང་། ཁམས་སྣ་ཚོགས་ལ་ཡང་འཇུག་ལ་ཐམས་ཅད་ཀྱི་རྗེས་སུ་ཡང་འཇུག་པར་འགྱུར་བ་དང་། ཞུ་བ་དང་། སྤོབས་པའི་བསམ་པ་ལ་ཟིལ་གྱིས་ནོན་པར་མི་འགྱུར་བ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh94.html?part=UT22084-045-001-13859#UT22084-045-001-13859