།གཡོ་བ་མེད་པར་གནས་པ་རྫུ་འཕྲུལ་ཅན། །འདུས་པ་ལན་གྲངས་བཅུ་དྲུག་ཀུན་ལ་ཡང་། །ང་མེད་ཉོན་མོངས་མེད་པའི་དགྲ་བཅོམ་པ། །བྱེ་བ་སྟོང་ཕྲག་བཅུ་གསུམ་བཅུ་གསུམ་ཡོད། །མི་ཚེ་ལོ་གྲངས་ཉི་ཁྲི་སུམ་སྟོང་ཡིན། །འགོག་པར་ཕྱིན་པའི་དམ་པའི་ཆོས་དག་ཀྱང་། །ལོ་གྲངས་བརྒྱད་ཁྲིའི་བར་དུ་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་གསུམ་པ་གཅིག །གསེར་གྱི་དྲ་བ་དག་གིས་ཁེབས་པར་བྱས། །དེ་བཞིན་གཤེགས་པ་གློག་གི་ཏོག་དག་གི། །སྐྱེ་བའི་ཡུལ་ནི་རྟག་ཏུ་མཐོང་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་སྨན་པ་བཟང་པོ་ཡབ། །གློག་མཆོད་མ་ནི་རྒྱལ་ཡུམ་སྲས་པོ་ནི། །ཐུབ་མེད་ཤིན་ཏུ་རྣམ་དུལ་རིམ་གྲོ་པ། །རིན་ཆེན་འཆང་བ་བློ་གྲོས་ཅན་ཡིན་ཏེ། །མཐའ་ཡས་འོད་ཅེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་རྩ་བརྒྱད་དེ། །ཀུན་ལའང་ཞི་བ་མྱ་ངན་འདས་གནས་པ། །དགྲ་བཅོམ་མཆོད་པར་འོས་པ་ཤ་སྟག་གོ། །མི་ཚེ་ལོ་གྲངས་བདུན་ཁྲི་བདུན་སྟོང་ཡིན། །མི་ཡི་ཕུལ་དུ་བྱུང་བའི་དམ་ཆོས་དག །ལོ་གྲངས་ཉི་ཁྲི་སུམ་སྟོང་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་གཅིག་པ་རྒྱལ་མཚན་དག་གིས་བརྒྱན། །དེ་བཞིན་གཤེགས་པ་འོད་ཟེར་རྒྱལ་པོ་ཡི། །སྐྱེ་བའི་ཡུལ་ནི་བཟང་ལ་དགའ་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །བྱེ་བ་གཉིས་ཡོད་འོད་ཟེར་བཟང་པོ་ཡབ། །ཡོན་ཏན་འོད་ཟེར་རྒྱལ་ཡུམ་སྲས་པོ་ནི། །འོད་ཟེར་བྱིན་ཡིན་ལྷ་ལེགས་རིམ་གྲོ་པ། །སྣང་བའི་འོད་ཅེས་བྱ་བ་མཁས་པ་སྟེ། །སྒྲོན་མ་མཐའ་ཡས་པ་ནི་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །རྡུལ་སྦྱངས་པ་ཡི་དགྲ་བཅོམ་ཚོགས་པ་དག །ཐེར་འབུམ་ཕྲག་ནི་བརྒྱད་ཅུ་བརྒྱད་ཅུ་ཡོད། །མི་ཚེ་ལོ་གྲངས་ས་ཡ་ཕྲག་བརྒྱད་ཡིན། །སྟོན་པ་མྱ་ངན་འདས་པའི་དམ་ཆོས་དག །ལོ་གྲངས་བདུན་ཁྲི་ཉིས་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །སྟོང་གསུམ་མཆོད་རྟེན་བཟང་པོ་དག་གིས་གང་། །དེ་བཞིན་གཤེགས་པ་སྐར་མཁན་སྐྱེ་བ་ཡི། །ཡུལ་ནི་གསེར་གྱི་གཟི་བརྗིད་ལྡན་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད།