སངས་རྒྱས་ཡོན་ཏན་འོད་ནི་སྐྱེ་བའི་ཡུལ། །ཡོན་ཏན་ཀུན་གྱི་རྒྱ་མཚོ་ཞེས་ཀྱང་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་ལེགས་མཆོག་ཡིན། །བློ་གསལ་རྒྱལ་ཡུམ་སྲས་པོ་ཡོན་ཏན་ཚོགས། །ཡོན་ཏན་འོད་ཅེས་བྱ་བ་རིམ་གྲོ་པ། །ཡོན་ཏན་དག་གིས་བརྒྱན་པ་མཁས་པ་སྟེ། །ཡོན་ཏན་རྫུ་འཕྲུལ་མཐའ་ཡས་རྫུ་འཕྲུལ་ཅན། །འདུས་པ་ལན་གྲངས་བཅུ་གཉིས་ཀུན་ལ་ཡང་། །ཆགས་པ་མེད་པར་གྱུར་པ་སེམས་སྦྱངས་པ། །བྱེ་བ་ཕྲག་ནི་སུམ་ཅུ་གཉིས་གཉིས་ཡོད། །མི་ཚེ་ལོ་གྲངས་དག་ནི་ཉི་ཁྲི་ཡིན། །མིག་གི་སྦྱིན་པ་མཛད་པའི་དམ་ཆོས་དག །ལོ་གྲངས་ཉི་ཁྲིའི་བར་དུ་གནས་པར་འགྱུར། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་བརྒྱད་པ་ཐམས་ཅད་རིན་ཆེན་ཡིན། །རྒྱལ་བ་སྒྲ་ནི་རྣམ་པར་གྲགས་པ་ཡི། །སྐྱེ་བའི་ཡུལ་ནི་གྲགས་པ་ཅན་ཞེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བརྒྱ་ཡོད་ཡབ་ནི་ནོར་གྲགས་ཡིན། །བློ་གྲོས་གྲགས་མ་ཞེས་བྱ་རྒྱལ་བའི་ཡུམ། །སྲས་པོ་གྲགས་ལྡན་ལྷ་ལེགས་རིམ་གྲོ་པ། །ལྷ་ཡི་དབྱངས་ཞེས་བྱ་བ་མཁས་པ་སྟེ། །རྣམ་པར་གྲགས་པའི་ཀླུ་ནི་རྫུ་འཕྲུལ་ཅན། །འདུས་པ་ལན་གྲངས་གསུམ་སྟེ་ཀུན་ལ་ཡང་། །རི་བོའི་ལྷུན་ལྟར་གཡོ་བ་མེད་པ་པོ། །དེ་དག་ཐེར་འབུམ་ཐེར་འབུམ་འབྱུང་བར་འགྱུར། །མི་ཚེ་ལོ་གྲངས་སྟོང་ཕྲག་བཅྭ་བརྒྱད་ཡིན། །གྲགས་པ་མཐའ་ཡས་མྱ་ངན་འདས་ནས་ཀྱང་། །དམ་ཆོས་ལོ་གྲངས་སྟོང་སྙེད་གནས་པར་འགྱུར། །རྒྱལ་བའི་མཆོད་རྟེན་དཔག་ཚད་གསུམ་པ་སྟེ། །རིན་ཆེན་མཆོག་རབ་བདུན་པོའི་རང་བཞིན་ཡིན། །དེ་བཞིན་གཤེགས་པ་ཟླ་བ་རྒྱས་པ་ཡི། །སྐྱེ་བའི་ཡུལ་ནི་ཏོག་གི་འོད་ཅེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་གཉིས་ཡོད་སྐྱེ་བའི་དབང་པོ་ཡབ། །གྲགས་བྱིན་མ་ཞེས་བྱ་བ་རྒྱལ་བའི་ཡུམ། །སྲས་པོ་སྐྱེ་ལྡན་འོད་འཕྲོ་རིམ་གྲོ་པ། །སྒྲ་གཅན་གཟི་བརྗིད་ཅན་ནི་མཁས་པ་སྟེ། །འཇིགས་པ་མེད་པར་རྒོལ་བ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་དྲུག་ཀུན་ལའང་། །ཐ་སྤངས་དུག་རྩ་བཅད་པར་མཚུངས་པ་པོ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་དག་ནི་ལྔ་ཁྲི་ཡིན།