མི་ཚེ་ལོ་གྲངས་བདུན་ཁྲི་ཉིས་སྟོང་ཡིན། །དེ་བཞིན་གཤེགས་པའི་དམ་པའི་ཆོས་དག་ཀྱང་། །ལོ་གྲངས་བདུན་ཁྲི་ཉིས་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བཟང་པོ་ཐེར་འབུམ་ཕྲག་གསུམ་ཡོད། །དེ་བཞིན་གཤེགས་པ་ཟླ་གདུགས་སྐྱེ་བ་ཡི། །ཡུལ་ནི་འོད་དག་འཕྲོ་བས་བརྒྱན་ཅེས་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །དཔག་ཚད་གསུམ་ཡོད་ཡབ་ནི་དྲན་ལྡན་ཡིན། །གདངས་མཐོ་མ་ནི་རྒྱལ་ཡུམ་སྲས་པོ་ནི། །སྒྲ་གཅན་འཛིན་ཡིན་རིགས་ལྡན་རིམ་གྲོ་པ། །ཡེ་ཤེས་དགའ་ཞེས་བྱ་བ་མཁས་པ་སྟེ། །སྲེད་པ་རྣམ་པར་སྐེམས་པ་རྫུ་འཕྲུལ་ཅན། །འདུས་པ་ལན་གྲངས་བཅུ་སྟེ་ཀུན་ལ་ཡང་། །གཡོ་མེད་རིམས་ནད་མེད་པའི་བསམ་གཏན་པ། །བྱེ་བ་ཕྲག་ནི་དགུ་བཅུ་དགུ་དགུ་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །སྟོན་པ་འགོག་པར་ཕྱིན་པའི་དམ་ཆོས་དག །ལོ་གྲངས་སྟོང་ཕྲག་བཅུ་ཡི་བར་དུ་གནས། །རྒྱལ་བའི་སྐུ་གདུང་མཆོད་རྟེན་གཅིག་ཡིན་ཏེ། །དཔག་ཚད་ལྔ་པ་གསེར་གྱིས་རྣམ་པར་སྤྲས། །འཇིག་རྟེན་མགོན་པོ་འོད་ནི་འཕྲོ་བ་ཡི། །སྐྱེ་ཡུལ་ལེགས་པར་གསུངས་དང་ལྡན་ཞེས་བྱ། །རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་འོད་བྱེད་ཡིན། །ཏོག་གི་འོད་ཅེས་བྱ་བ་རྒྱལ་བའི་ཡུམ། །སྲས་པོ་བཀྲ་ཤིས་ཚོགས་དབང་རིམ་གྲོ་པ། །བཟང་པོ་གྲགས་ཞེས་བྱ་བ་མཁས་པ་སྟེ། །འཇིགས་པ་མེད་པར་གྲགས་པ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་ཀུན་ལ་ཡང་། །སོ་སོ་ཡང་དག་རིག་པའི་ཕ་མཐར་ཕྱིན། །རྣམ་གྲོལ་མི་སློབ་འབྲས་ལྡན་ཤ་སྟག་གོ། །མི་ཚེ་ལོ་གྲངས་སུམ་ཁྲི་ཉིས་སྟོང་ཡིན། །དངོས་པོ་མེད་པར་ཕྱིན་པའི་དམ་ཆོས་དག །ལོ་གྲངས་སུམ་ཁྲི་དྲུག་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་ཐེར་འབུམ་ཕྲག་ནི་སུམ་ཅུ་གཉིས། །དེ་བཞིན་གཤེགས་པ་དྲི་མེད་རྒྱལ་པོ་ཡི། །སྐྱེ་བའི་ཡུལ་ནི་བསོད་ནམས་འོད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །བདུན་ཅུ་གཉིས་ཡོད་ཡབ་ནི་དཔལ་བཟངས་ཡིན། །བདུད་རྩི་དགའ་བ་རྒྱལ་ཡུམ་སྲས་པོ་ནི། །སེང་གེའི་འགྲོས་ཡིན་ལྷ་ལྡན་རིམ་གྲོ་པ། །ཡོན་ཏན་འབྱུང་གནས་ཤེས་རབ་ཆེན་པོ་སྟེ།