ཤེས་རབ་ཅན་རྣམས་ཀྱི་མཆོག་ནི་འཁྲུལ་མེད་ཅེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཡོན་ཏན་ཡང་དག་འཕགས་ཞེས་བྱའོ། །འདུས་པ་ནི་ལན་བཅུ་དྲུག་སྟེ། ཐམས་ཅད་ལ་ཡང་བྱེ་བ་ཕྲག་སུམ་ཅུ་རྩ་བཞི་བཞིའོ། །སྐུ་ཚེའི་ཚད་ནི་ལོ་བརྒྱད་ཁྲི་དྲུག་སྟོང་ངོ་། །དམ་པའི་ཆོས་ཀྱང་ལོ་ཁྲི་བཞི་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་དགྲ་བཅོམ་གྲགས་པ་སྐྱེ་བའི་ཡུལ་ནི་དེ་བཞིན་གཤེགས་པའི་སྤྱན་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་གླིང་ཆེན་པོ་བཞི་པའི་འཇིག་རྟེན་གྱི་ཁམས་བཅུ་དྲུག་ཙམ་མོ། །ཡབ་ནི་དགྲ་བཅོམ་པ་ཞེས་བྱའོ། །ཡུམ་ནི་འཕགས་བེའུ་མ་ཞེས་བྱའོ། །སྲས་ནི་མྱ་ངན་འདས་པ་གྲགས་ཞེས་བྱའོ། །རིམ་གྲོ་པ་ནི་དགྲ་བཅོམ་གསལ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་སྙན་པ་གྲངས་མེད་པ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་སྤོབས་པ་ཆེན་པོ་ཞེས་བྱའོ། །འདུས་པ་ནི་ལན་བརྒྱད་ཅུ་རྩ་བཞི་སྟེ། ཐམས་ཅད་ལ་ཡང་འབུམ་སུམ་ཁྲི་སུམ་ཁྲིའོ། །སྐུ་ཚེའི་ཚད་ནི་ལོ་བརྒྱད་ཁྲི་བདུན་སྟོང་ངོ་། །དམ་པའི་ཆོས་ནི་ལོ་བྱེ་བའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་ཆོས་ཀྱི་ཡོན་ཏན་སྐྱེ་བའི་ཡུལ་ནི་ཡོན་ཏན་ཅན་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་ཉིས་བརྒྱའོ། །ཡབ་ནི་ཡོན་ཏན་གཟི་བརྗིད་ཅེས་བྱའོ། །ཡུམ་ནི་ཡོན་ཏན་ཅན་ཞེས་བྱའོ། །སྲས་ནི་ཡོན་ཏན་མཐའ་ཡས་ཞེས་བྱའོ། །རིམ་གྲོ་པ་ནི་ཡོན་ཏན་ཆེན་པོའི་གཟི་བརྗིད་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཡོན་ཏན་གཟི་བརྗིད་མཐའ་ཡས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཐར་པའི་ཡོན་ཏན་རྒྱལ་པོ་ཞེས་བྱའོ། །འདུས་པ་ནི་ལན་སུམ་ཅུ་རྩ་གསུམ་སྟེ། ཐམས་ཅད་ལ་ཡང་ཐེར་འབུམ་ཕྲག་བདུན་བདུན་ནོ། །སྐུ་ཚེའི་ཚད་ནི་ལོ་འབུམ་མོ། །དམ་པའི་ཆོས་ནི་ལོ་ཁྲི་བདུན་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ཞིང་བཟང་པོ་སྐྱེ་བའི་ཡུལ་ནི་བཀོད་པ་ཆེན་པོ་ཞེས་བྱའོ། །རིགས་ནི་བྲམ་ཟེའོ། །འོད་ནི་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཉི་ཤུ་ཙམ་མོ། །ཡབ་ནི་རིན་ཆེན་འོད་ཅེས་བྱའོ།