།དེ་བཞིན་གཤེགས་པ་ཡོན་ཏན་བསྲུངས་སྐྱེ་བའི་ཡུལ་ནི་ཡོན་ཏན་དང་ལྡན་པ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་དྲུག་གོ། །ཡབ་ནི་ཡོན་ཏན་མཆོག་ཅེས་བྱའོ། །ཡུམ་ནི་ཡོན་ཏན་དཔལ་ཞེས་བྱའོ། །སྲས་ནི་རིན་ཆེན་མཆོད་ཅེས་བྱའོ། །རིམ་གྲོ་པ་ནི་མངོན་པར་དགའ་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ལེགས་པའི་བློ་གྲོས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བླ་མ་ཞེས་བྱའོ། །འདུས་པ་ནི་ལན་བཅུ་བཞི་སྟེ། ཐམས་ཅད་ལ་ཡང་དུང་ཕྱུར་ཕྲག་བཅུ་གསུམ་བཅུ་གསུམ་མོ། །སྐུ་ཚེའི་ཚད་ནི་ལོ་ཉི་ཁྲི་སུམ་སྟོང་ངོ་། །དམ་པའི་ཆོས་ནི་ལོ་བརྒྱད་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་དོན་གྱི་བློ་གྲོས་སྐྱེ་བའི་ཡུལ་ནི་ཆོས་གསལ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་དཔག་ཚད་བཞི་ཁྲི་བཞི་སྟོང་ངོ་། །ཡབ་ནི་མེ་ཏོག་རྒྱལ་པོ་ཞེས་བྱའོ། །ཡུམ་ནི་གྲགས་ལྡན་མ་ཞེས་བྱའོ། །སྲས་ནི་པད་མ་ཅན་ཞེས་བྱའོ། །རིམ་གྲོ་པ་ནི་ལེགས་སྐྱེས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་མི་གནས་པའི་བློ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་དྲང་སྲོང་ཟླ་བ་ཞེས་བྱའོ། །འདུས་པ་ནི་ལན་ཉི་ཤུ་རྩ་དགུ་སྟེ། ཐམས་ཅད་ལ་ཡང་སྟོང་ཕྲག་བཅུ་གསུམ་བཅུ་གསུམ་མོ། །སྐུ་ཚེའི་ཚད་ནི་ལོ་དགུ་སྟོང་ངོ་། །དམ་པའི་ཆོས་ཀྱང་ལོ་དགུ་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་བསྙེངས་མེད་སྐྱེ་བའི་ཡུལ་ནི་ཟིལ་གྱིས་མི་ནོན་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་སྟོང་ངོ་། །ཡབ་ནི་སྟོབས་ལྷ་ཞེས་བྱའོ། །ཡུམ་ནི་ལེགས་བསམས་གྲགས་མ་ཞེས་བྱའོ། །སྲས་ནི་སྐྲག་མེད་ཅེས་བྱའོ། །རིམ་གྲོ་པ་ནི་མི་སྐྲག་གནས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་གཞན་གྱིས་མི་ཐུབ་པའི་རྒྱལ་མཚན་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཚོགས་ཐུབ་ཅེས་བྱའོ། །འདུས་པ་ནི་ལན་དགུ་སྟེ། ཐམས་ཅད་ལ་ཡང་ཐེར་འབུམ་ཐེར་འབུམ་མོ། །སྐུ་ཚེའི་ཚད་ནི་ལོ་ཁྲི་དགུ་སྟོང་ངོ་། །དམ་པའི་ཆོས་ནི་ལོ་བདུན་ཁྲིའི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ།