།མི་ཚེ་ལོ་གྲངས་ཆིག་ཁྲི་ཉིས་སྟོང་ཡིན། །རྒྱལ་བ་སྲིད་པ་ཞི་བར་གྱུར་པ་ཡི། །དམ་ཆོས་ལོ་གྲངས་སྟོང་ཕྲག་བཅུ་ཡང་གནས། །རྒྱལ་བའི་མཆོད་རྟེན་དྲུག་ཅུ་རྩ་གཉིས་ཏེ། །གདུགས་གྲངས་ཆིག་ཁྲི་དྲུག་སྟོང་དག་གིས་བརྒྱན། །དེ་བཞིན་གཤེགས་པ་དྲག་ཤུལ་འོད་ཟེར་གྱི། །སྐྱེ་ཡུལ་འོད་ནི་རྟག་པ་ཞེས་ཀྱང་བྱ། །རྒྱལ་བའི་རིགས་ནི་བྲམ་ཟེ་འོད་ཀྱི་ཚད། །གླིང་བཞི་པ་ཙམ་བརྒྱད་ཡོད་དབྱངས་སྙན་ཡབ། །རྒྱལ་ལྡན་མ་ནི་ཡུམ་ཡིན་སྲས་པོ་ནི། །ཁ་ལོ་སྒྱུར་ཡིན་དབྱེར་མེད་རིམ་གྲོ་པ། །འགྲོས་མཁས་པ་ཞེས་བྱ་བ་མཁས་པ་སྟེ། །འཇིག་རྟེན་པ་ཡིས་བསྔགས་པ་རྫུ་འཕྲུལ་ཅན། །འདུས་པ་ལན་གྲངས་བརྒྱད་དེ་ཀུན་ལ་ཡང་། །ང་མེད་ཕུང་པོར་འཛིན་པ་སྤངས་པ་པོ། །བྱེ་བ་ཕྲག་ནི་བཅུ་བཞི་བཅུ་བཞི་ཡོད། །མི་ཚེ་ལོ་གྲངས་དག་ནི་བརྒྱད་ཁྲི་ཡིན། །དམ་པའི་ཆོས་དག་ལོ་གྲངས་སྟོང་ཕྲག་ནི། །བཞི་བཅུ་རྩ་དྲུག་བར་དུ་གནས་པར་འགྱུར། །སྐུ་གདུང་རྒྱས་འགྱུར་མཆོད་རྟེན་བཟང་པོའི་གྲངས། །བྱེ་བ་སྟོང་ཕྲག་ཉི་ཤུ་རྩ་གཉིས་འབྱུང་། །དེ་བཞིན་གཤེགས་པ་བརྟུལ་ཞུགས་ཐུབ་མེད་ཀྱི། །སྐྱེ་བའི་ཡུལ་ནི་དགའ་བས་ཚིམ་ཞེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བཅུ་ཡིན་ཡབ་ནི་ལྷ་དབང་ཡིན། །ས་བདག་མ་ཞེས་བྱ་བ་རྒྱལ་བའི་ཡུམ། །སྲས་པོ་བྱམས་པ་ལེགས་བྱམས་རིམ་གྲོ་པ། །བློ་མཚུངས་པ་ཞེས་བྱ་བ་མཁས་པ་སྟེ། །ལེགས་ངེས་ཐོབ་ཅེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བཅུ་གཅིག་ཀུན་ལ་ཡང་། །དགྲ་བཅོམ་བྱེ་ཕྲག་དགུ་བཅུ་གཉིས་གཉིས་ཡོད། །ལྷག་པ་གཞན་ཡང་བརྒྱད་སྟོང་བརྒྱད་སྟོང་ཡིན། །མི་ཚེ་ལོ་གྲངས་སྟོང་ཕྲག་བདུན་ཅུ་ཡིན། །དམ་པའི་ཆོས་དག་ལོ་གྲངས་སྟོང་ཕྲག་ནི། །དྲུག་ཅུ་རྩ་དགུའི་བར་དུ་གནས་པར་འགྱུར། །མཆོད་རྟེན་གྲངས་ནི་བྱེ་བ་ཕྲག་བརྒྱ་དང་། །ལྷག་ཀྱང་རྩ་ལྔ་གསེར་གྱི་རྒྱལ་མཚན་ཅན། །འོད་དང་ལྡན་པ་འགྲོ་བས་མཆོད་པ་ཡི། །སྐྱེ་བའི་ཡུལ་ནི་སེམས་སྦྱངས་པ་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་བྱམས་ལེགས་ཡིན། །བློ་གྲོས་གྲགས་མ་ཡུམ་ཡིན་སྲས་པོ་ནི། །