།མཆོད་རྟེན་བཟང་པོའི་གྲངས་ནི་བྱེ་བ་ཕྲག །དགུ་བཅུ་རྩ་གཉིས་རིན་པོ་ཆེ་ཡིས་སྤྲས། །རྡུལ་དང་བྲལ་བ་མཆོད་པ་གྲགས་པ་ཡི། །སྐྱེ་བའི་ཡུལ་ནི་འཇིག་རྟེན་དད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །བདུན་ཅུ་གསུམ་ཡོད་ཡབ་ནི་ཞིང་བཟངས་ཡིན། །ཕྱོགས་སེམས་མ་ནི་ཡུམ་ཡིན་སྲས་པོ་ནི། །བཞིན་གཙང་ཚུལ་མི་འཆོས་པ་རིམ་གྲོ་པ། །དགའ་བའི་ང་རོ་ཞེས་བྱ་མཁས་པ་སྟེ། །རྣམ་པར་སེལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བརྒྱད་ཅུ་ཀུན་ལ་ཡང་། །ང་རྒྱལ་རྣམ་གྲོལ་ཐོབ་པའི་བསམ་གཏན་པ། །བྱེ་བ་ཕྲག་ནི་དགུ་བཅུ་གཉིས་གཉིས་ཡོད། །མི་ཚེ་ལོ་གྲངས་དགུ་ཁྲི་ཉིས་སྟོང་ཡིན། །རྣམ་པར་ཐར་པར་ཕྱིན་པའི་དམ་ཆོས་དག །ལོ་གྲངས་སུམ་ཁྲི་ཉིས་སྟོང་བར་དུ་གནས། །མཆོད་རྟེན་དཔག་ཚད་བཅུ་གཉིས་པ་ཡི་གྲངས། །དྲུག་ཁྲི་དྲུག་སྟོང་གསེར་གྱི་རྒྱལ་མཚན་གང་། །དེ་བཞིན་གཤེགས་པ་ཆོས་ཀྱི་གྲགས་པ་ཡི། །སྐྱེ་བའི་ཡུལ་ནི་རྣམ་པར་ངེས་ཞེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་བཅུ་ཡོད་ཡབ་ནི་དབང་པོ་ཡིན། །མི་གཡོ་བློ་གྲོས་སྐྱེད་པའི་ཡུམ་སྲས་པོ། །ར་ཧུ་ཤ་ཡིན་བློ་བཟངས་རིམ་གྲོ་པ། །འགྲོ་བས་མཆོད་ཅེས་བྱ་བ་མཁས་པ་སྟེ། །གྲགས་པ་མཆོད་ཅེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་རྩ་དྲུག་སྟེ། །ཀུན་ལའང་བདུད་དཔུང་དཔུང་མེད་བྱེད་པ་པོ། །བྱེ་བ་ཕྲག་ནི་ཉི་ཤུ་གཉིས་གཉིས་ཡོད། །མི་ཚེ་ལོ་གྲངས་བདུན་ཁྲི་སུམ་སྟོང་ཡིན། །འཇིག་རྟེན་ཕན་ཕྱིར་དམ་པའི་ཆོས་དག་ཀྱང་། །ལོ་གྲངས་ཁྲི་ཕྲག་གཅིག་གི་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བཟང་པོ་བྱེ་བ་ཕྲག་གསུམ་འབྱུང་། །བདེ་བར་གཤེགས་པ་སྦྱིན་པའི་འོད་དག་གི། །སྐྱེ་ཡུལ་འཇིག་རྟེན་ཤིན་ཏུ་དགའ་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་ཀྱི་ཚད། །དཔག་ཚད་བཅུ་གཅིག་བདག་ཉིད་ཆེན་པོ་ཡབ། །ཡུལ་ལ་དགའ་བ་ཡུམ་ཡིན་སྲས་པོ་ནི། །ཆོས་ཀྱི་འབྱུང་གནས་གཟི་བརྗིད་རིམ་གྲོ་པ། །ཡོན་ཏན་རྒྱ་མཚོ་ཞེས་བྱ་མཁས་པ་སྟེ། །འཇིག་རྟེན་འཇིགས་མེད་ཅེས་བྱ་རྫུ་འཕྲུལ་ཅན། །འདུས་པ་ལན་གྲངས་སུམ་ཅུ་རྩ་དྲུག་སྟེ། །ཀུན་ལའང་པད་མཚུངས་ལུས་པ་མེད་གྱུར་པ།