།སྐུ་གདུང་དག་ནི་རྒྱས་འགྱུར་མཆོད་རྟེན་གྲངས། །བྱེ་བ་བརྒྱ་ཕྲག་དགུ་ཡོད་གསེར་གྱིས་སྤྲས། །དེ་བཞིན་གཤེགས་པ་གྲགས་པའི་བཤེས་གཉེན་གྱི། །སྐྱེ་བའི་ཡུལ་ནི་གྲགས་པ་འཕགས་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །བྱེ་བ་དགུ་ཡོད་སྦྱིན་སྲེག་འོད་འཕྲོ་ཡབ། །བསོད་ནམས་ཅན་ཞེས་བྱ་བ་ཡུམ་ཡིན་ནོ། །སྲས་པོ་དྲང་སྲོང་ཁྱད་འཕགས་རིམ་གྲོ་པ། །ཡོན་ཏན་བདེན་ཞེས་བྱ་བ་མཁས་པ་སྟེ། །འཇིགས་མེད་བློ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་དྲུག་ཅུ་རྩ་དྲུག་སྟེ། །ཀུན་ལའང་བདུད་དཔུང་བརླག་མཐར་བྱེད་པ་པོ། །བྱེ་བ་ཕྲག་ནི་སུམ་ཅུ་བཞི་བཞི་ཡོད། །མི་ཚེ་ལོ་གྲངས་ཉི་ཁྲི་ཆིག་སྟོང་ཡིན། །མཚུངས་པ་མེད་པའི་དམ་པའི་ཆོས་དག་ཀྱང་། །ལོ་གྲངས་ཉི་ཁྲི་ཉིས་སྟོང་བར་དུ་གནས། །རྒྱལ་བའི་སྐུ་གདུང་དག་ནི་རྒྱས་འགྱུར་ལ། །མཆོད་རྟེན་བཟང་པོ་བྱེ་བ་བདུན་ཅུ་དྲུག །དེ་བཞིན་གཤེགས་པ་བདེན་པ་ཞེས་བྱ་བའི། །སྐྱེ་བའི་ཡུལ་ནི་གཟི་བརྗིད་མཛེས་ཞེས་བྱ། །དེའི་རིགས་རྒྱལ་རིགས་ཡིན་ཏེ་འོད་དཔག་ཚད། །བྱེ་བ་བཅུ་ཡོད་མི་ཡི་དབང་པོ་ཡབ། །སྐལ་འདོད་མ་ནི་ཡུམ་ཡིན་སྲས་པོ་ནི། །སྐར་མཁན་མཆོད་སྦྱིན་བཟང་པོ་རིམ་གྲོ་པ། །སྙན་པར་གྲགས་ཞེས་བྱ་བ་ཤེས་ཅན་ཏེ། །རྣམ་པར་འཕྲུལ་ཞེས་བྱ་བ་རྫུ་འཕྲུལ་ཅན། །འདུས་པ་ལན་གྲངས་བྱེ་སྟོང་ཀུན་ལ་ཡང་། །དྲི་གསུམ་དྲི་མ་ཀུན་བྲལ་དགྲ་བཅོམ་པ། །བྱེ་བ་བརྒྱ་ཕྲག་བདུན་ཅུ་བདུན་ཅུ་ཡོད། །སྐུ་ཚེ་ལོ་གྲངས་སུམ་ཁྲི་ཚང་བ་ཡིན། །རྒྱལ་བ་ཞི་བར་ཕྱིན་པའི་དམ་ཆོས་དག །ལོ་གྲངས་དགུ་སྟོང་བར་དུ་གནས་པར་འགྱུར། །རྒྱལ་བའི་སྐུ་གདུང་རིལ་གཅིག་མཆོད་རྟེན་གཅིག །དཔག་ཚད་དགུ་པ་རིན་ཆེན་བརྒྱ་ཡིས་སྤྲས། །བདེ་བར་གཤེགས་པ་དཀའ་ཐུབ་ཆེན་པོ་ཡི། །སྐྱེ་ཡུལ་མགོན་མེད་ཚིམ་པར་བྱེད་ཅེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །ཉི་ཤུ་གཉིས་ཡོད་ཡབ་ནི་འོད་ཟེར་བཟང་། །དགའ་ལྡན་མ་ཞེས་བྱ་བ་ཡུམ་ཡིན་ནོ། །སྲས་པོ་འཇིགས་མེད་གྲགས་པ་རིམ་གྲོ་པ། །རྣམ་པར་སྣང་བྱེད་གྲགས་པ་ཤེས་ཅན་ཏེ། །ལྷུན་པོ་སྒུལ་ཞེས་བྱ་བ་རྫུ་འཕྲུལ་ཅན། །