།ཉན་ཐོས་འདུས་པ་ནི་ལན་སུམ་ཅུ་རྩ་བརྒྱད་དེ། །ཐམས་ཅད་ལ་ཡང་ཁྲི་ཕྲག་འབུམ་འབུམ་མོ། །སྐུ་ཚེའི་ཚད་ནི་ལོ་བྱེ་བའོ། །དམ་པའི་ཆོས་ཀྱང་ལོ་བྱེ་བའི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ལྷ་གྲགས་སྐྱེ་བའི་ཡུལ་ནི་ལྷ་དགའ་ཞེས་བྱའོ། །རིགས་ནི་རྒྱལ་རིགས་སོ། །འོད་ནི་གླིང་ཆེན་པོ་བཞི་པའི་བྱེ་མ་སྙེད་ཙམ་མོ། །ཡབ་ནི་ཡུལ་འཁོར་བཟང་པོ་ཞེས་བྱའོ། །ཡུམ་ནི་ནོར་ལྷའི་བུ་ཞེས་བྱའོ། །སྲས་ནི་རྣམ་པར་སྣང་བྱེད་ཅེས་བྱའོ། །རིམ་གྲོ་པ་ནི་ལེགས་སེམས་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་ཆོས་བརྩེགས་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ལྗོན་པའི་མེ་ཏོག་ཅེས་བྱའོ། །འདུས་པ་ནི་ལན་བཅྭ་བརྒྱད་དེ་ཐམས་ཅད་ལ་ཡང་དུང་ཕྱུར་ཕྲག་གཅིག་དང་བྱེ་བ་ཕྲག་བཞི་བཞིའོ། །སྐུ་ཚེའི་ཚད་ནི་ལོ་བདུན་ཁྲིའོ། །དམ་པའི་ཆོས་ནི་ལོ་སུམ་ཁྲི་དྲུག་སྟོང་གི་བར་དུ་གནས་སོ། །སྐུ་གདུང་ནི་རིལ་པོ་གཅིག་ཏུ་འདུག་གོ། །མཆོད་རྟེན་ཡང་གཅིག་ཏུ་ཟད་དོ། །དེ་བཞིན་གཤེགས་པ་སྲིད་མཐའ་གཟིགས་སྐྱེ་བའི་ཡུལ་ནི་དགའ་བས་བལྟས་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་དྲུག་ཅུའོ། །ཡབ་ནི་མྱ་ངན་མེད་ཅེས་བྱའོ། །ཡུམ་ནི་དགའ་བས་བྱིན་ཞེས་བྱའོ། །སྲས་ནི་རི་བརྩེགས་ཞེས་བྱའོ། །རིམ་གྲོ་པ་ནི་མཚན་བྱིན་ཞེས་བྱའོ། །ཤེས་རབ་ཅན་རྣམས་ཀྱི་མཆོག་ནི་གཟི་བརྗིད་ཆེན་པོ་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་ཡིད་དུ་འོང་བའི་འོད་ཅེས་བྱའོ། །འདུས་པ་ནི་ལན་བཞི་བཅུ་སྟེ་ཐམས་ཅད་ལ་ཡང་འབུམ་ཕྲག་བཅྭ་ལྔ་བཅྭ་ལྔའོ། །སྐུ་ཚེའི་ཚད་ནི་ལོ་ཁྲི་དྲུག་སྟོང་ངོ་། །དམ་པའི་ཆོས་ནི་ལོ་ཁྲི་བརྒྱད་སྟོང་གི་བར་དུ་གནས་སོ། །སྐུ་གདུང་ནི་རྒྱས་པར་འགྱུར་རོ། །དེ་བཞིན་གཤེགས་པ་ཟླ་བ་སྐྱེ་བའི་ཡུལ་ནི་བཀོད་པ་དང་ལྡན་པ་ཞེས་བྱའོ། །རིགས་ནི་བྲམ་ཟེའོ། །འོད་ནི་དཔག་ཚད་བཞི་བཅུའོ། །ཡབ་ནི་ཟླ་བའི་ཏོག་ཅེས་བྱའོ། །ཡུམ་ནི་ཉི་མའི་སྙིང་པོ་ཞེས་བྱའོ། །སྲས་ནི་གཟི་བརྗིད་འོད་ཅེས་བྱའོ། །རིམ་གྲོ་པ་ནི་གདངས་སྙན་ཅེས་བྱའོ། །ཤེས་རབ་ཅན་རྣམས་ཀྱི་མཆོག་ནི་སྒྲིབ་མེད་མཐོང་ཞེས་བྱའོ། །རྫུ་འཕྲུལ་ཅན་རྣམས་ཀྱི་མཆོག་ནི་བརྩོན་པ་མི་གཏོང་བ་ཞེས་བྱའོ།