།རིགས་ནི་རྒྱལ་རིགས་ཡིན་ཏེ་འོད་དཔག་ཚད། །ཀུན་ཏུ་སུམ་ཅུ་ཡབ་ནི་ལེགས་ཡིད་གཞུངས། །ཡུམ་ནི་མེ་ཏོག་འོད་ཡིན་སྲས་པོ་ནི། །ཡོན་ཏན་བསགས་པ་འཇམ་པ་རིམ་གྲོ་པ། །རྟ་དབང་ལྷ་ཞེས་བྱ་བ་མཁས་པ་སྟེ། །སྒྲ་གཅན་འཛིན་ཅེས་བྱ་བ་རྫུ་འཕྲུལ་ཅན། །ཡང་སྲིད་ཟད་པ་དགྲ་ནི་བཅོམ་པ་དག །འདུས་པ་དང་པོར་འབུམ་ཕྲག་ལྔ་ཡོད་དོ། །གཉིས་པར་དྲུག་ཅུ་གསུམ་པར་བདུན་ཅུ་བདུན། །སྐུ་ཚེའི་ཚད་ནི་ལོ་གྲངས་སྟོང་ཡིན་ནོ། །རྒྱལ་བ་དམ་པ་མྱ་ངན་འདས་ནས་ཀྱང་། །དམ་ཆོས་ལོ་གྲངས་སུམ་སྟོང་བར་དུ་གནས། །དེ་ཡི་སྐུ་གདུང་རིལ་པོ་གཅིག་ཡིན་ལ། །མཆོད་རྟེན་འཕང་དུ་དཔག་ཚད་གསུམ་ཙམ་འཕགས། །དེ་བཞིན་གཤེགས་པ་ས་ཡི་དབང་ཕྱུག་གི། །སྐྱེ་བའི་ཡུལ་ནི་གཟི་དང་ལྡན་ཞེས་བྱ། །རྒྱལ་བ་རྒྱལ་རིགས་ཡིན་ཏེ་འོད་ཀྱི་ཚད། །དཔག་ཚད་དྲུག་ཅུ་ཡབ་ནི་གཟུགས་བཟང་ཡིན། །ཆོས་ཀྱི་འོད་ཅེས་བྱ་བ་ཡུམ་ཡིན་ནོ། །སྲས་པོ་བདེ་དགའ་དགེ་བ་རིམ་གྲོ་པ། །གཏི་མུག་སེལ་ཞེས་བྱ་བ་མཁས་པ་སྟེ། །དགའ་རྒྱལ་ཞེས་ནི་བྱ་བ་རྫུ་འཕྲུལ་ཅན། །དགྲ་བཅོམ་སྟོང་ཕྲག་དྲུག་ཅུ་རྩ་བཞི་སྟེ། །འདུས་པ་གཉིས་པར་དྲུག་ཅུ་རྩ་ཡང་ལྔ། །འདུས་པ་གསུམ་པར་སྟོང་ཕྲག་དྲུག་ཅུ་ཡོད། །སྐུ་ཚེའི་ཚད་ནི་ལོ་གྲངས་བྱེ་བ་ཡིན། །མཚུངས་པ་མེད་པ་བདེ་བར་གཤེགས་པའི་ཆོས། །ལོ་གྲངས་བྱེ་བ་ཕྲག་ནི་གསུམ་དུ་གནས། །དེ་ཡི་སྐུ་གདུང་དག་ཀྱང་རྒྱས་འགྱུར་ལ། །མཆོད་རྟེན་བྱེ་བ་བརྒྱ་ཕྲག་དྲུག་ཅུ་གཉིས། །དེ་བཞིན་གཤེགས་པ་མེ་ཏོག་སྤྱན་དག་གི། །སྐྱེ་བའི་ཡུལ་ནི་སེམས་དང་འབྲེལ་ཞེས་བྱ། །རིགས་ནི་བྲམ་ཟེ་ཡིན་ཏེ་འོད་དཔག་ཚད། །དྲུག་ཅུ་རྩ་གཉིས་ཡབ་ནི་སྐྱེ་དབང་ཡིན། །བློ་གྲོས་སེམས་མ་ཞེས་བྱ་ཡུམ་ཡིན་ནོ། །སྲས་པོ་བདེ་འགྲོ་མེ་ཏོག་རིམ་གྲོ་པ། །མྱ་ངན་སེལ་ཞེས་བྱ་བ་མཁས་པ་སྟེ། །འགྲོ་བ་འཛིན་ཅེས་བྱ་བ་རྫུ་འཕྲུལ་ཅན། །འདུས་པ་དང་པོར་སྟོང་ཕྲག་དྲུག་ཅུ་ཡོད། །གཉིས་པར་བདུན་ཅུ་གསུམ་པར་བརྒྱད་ཅུ་ཡོད། །དེ་ཚེ་རྒྱལ་བ་དེ་ཡི་སྐུ་ཚེའི་ཚད། །ལོ་གྲངས་སྟོང་ཕྲག་དགུ་བཅུ་དག་ཀྱང་ཡིན། །མྱ་ངན་འདས་པ་དེ་ཡི་དམ་ཆོས་དག །ལོ་གྲངས་བྱེ་བ་ཕྲག་ནི་གཉིས་སུ་གནས།