།བཙུན་མོའི་འཁོར་གྱིས་མི་འཕྲོགས་པའི་བསམ་གཏན་ནི་དཔེར་ན་རྒྱལ་པོ་གཞོན་ནུ་སེང་གེའི་ལྟ་བུ་གང་ཡིན་པ་དེ་ནི་བསམ་གཏན་ནོ། །ཡུལ་གྱི་ནང་དུ་སོང་ཡང་ཡོངས་སུ་གཏོང་བ་ཐམས་ཅད་ལ་དམིགས་པའི་ཤེས་རབ་ནི་དཔེར་ན་ཡུལ་ཀ་ཤིའི་རྒྱལ་པོས་མགོ་བྱིན་པ་ལྟ་བུ་གང་ཡིན་པ་དེ་ནི་ཤེས་རབ་སྟེ། འདི་དག་ནི་གནས་པའི་ཕ་རོལ་ཏུ་ཕྱིན་པ་དྲུག་གོ །དེ་ལ་ལྡན་པའི་ཕ་རོལ་ཏུ་ཕྱིན་པ་དྲུག་གང་ཞེ་ན། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྦྱིན་པ་ནི་དཔེར་ན་རྒྱ་མཚོ་ཆེན་པོའི་རུ་སྦལ་ལྟ་བུ་གང་ཡིན་པ་དེ་ནི་སྦྱིན་པའོ། །གཞན་ལ་ཕན་པར་བརྩོན་པའི་ཚུལ་ཁྲིམས་ནི་དཔེར་ན་འགྲོན་པ་རྣམས་སྦྲུལ་ཆེན་པོས་བསྐོར་བ་ལས་སེང་གེས་ཐར་བར་བྱས་པ་ལྟ་བུ་གང་ཡིན་པ་དེ་ནི་ཚུལ་ཁྲིམས་སོ། །མཉན་པའི་ཕྱིར་བཟོད་པ་ནི་དཔེར་ན་དྲང་སྲོང་ལྷའི་རྒྱལ་པོས་ཚིགས་སུ་བཅད་པའི་ཕྱིར་མགོ་ཡོངས་སུ་བཏང་བ་ལྟ་བུ་གང་ཡིན་པ་དེ་ནི་བཟོད་པའོ། །བྲམ་ཟེའི་ཁྱེའུ་ཡིས་དོན་ཇི་ལྟ་བ་བཞིན་དུ་བསམས་པའི་རེག་པ་ལྔ་སྤང་བའི་ཕྱིར་གནས་ཤིང་གཞན་ལ་བརྩེ་བར་ཡོངས་སུ་བསྔོས་པའི་བརྩོན་འགྲུས་གང་ཡིན་པ་དེ་ནི་བརྩོན་འགྲུས་སོ། །བསམ་གཏན་ནི་དཔེར་ན་མུ་སྟེགས་བྱེད་རྩིབས་ཀྱི་མུ་ཁྱུད་བྱུང་བ་གཞན་ལ་སྙིང་བརྩེ་བ་དང་ལྡན་པ་ལྟ་བུ་གང་ཡིན་པ་དེ་ནི་བསམ་གཏན་ནོ། །སྐྱེ་བོ་མང་པོ་ཡོངས་སུ་སྨིན་པར་བྱེད་པའི་ཤེས་རབ་ནི་དཔེར་ན་སྲེག་པའི་སྐྱེས་པའི་རབས་ཀྱི་ལྟ་བུ་གང་ཡིན་པ་དེ་ནི་ཤེས་རབ་སྟེ། །འདི་དག་ནི་ལྡན་པའི་ཕ་རོལ་ཏུ་ཕྱིན་པ་དྲུག་གོ། །དེ་ལ་རྣམ་པར་སྨིན་པ་མང་པོའི་ཕ་རོལ་ཏུ་ཕྱིན་པ་དྲུག་གང་ཞེ་ན། འཇིག་རྟེན་ལ་ཕན་པར་བྱ་བའི་སྦྱིན་པ་ནི་དཔེར་ན་འབེལ་མའི་ལྟ་བུ་གང་ཡིན་པ་དེ་ནི་སྦྱིན་པའོ། །ཚངས་པའི་འཇིག་རྟེན་ལ་གནས་ཏེ་འཛམ་བུའི་གླིང་གི་མི་རྣམས་ལས་བྱ་བ་ལ་འཇུག་པར་བྱེད་པའི་ཚུལ་ཁྲིམས་གང་ཡིན་པ་དེ་ནི་ཚུལ་ཁྲིམས་སོ། །སེམས་ཅན་གྱི་ཕྱིར་བདག་ཡོངས་སུ་གཏོང་བའི་བཟོད་པ་ནི་དཔེར་ན་རྒྱ་མཚོ་ནི་ཤི་བའི་རོ་དང་མི་གནས་པས་སེམས་ཅན་རྣམས་དགྲོལ་བའི་དོན་དུ་རྒྱ་མཚོ་ཆེན་པོར་བདག་ཉིད་ཡོངས་སུ་གཏོང་བ་ལྟ་བུ་གང་ཡིན་པ་དེ་ནི་བཟོད་པའོ། །སྐྱེ་བོ་མང་པོ་ཡོངས་སུ་སྨིན་པར་འགྱུར་བའི་བརྩོན་འགྲུས་ནི་དཔེར་ན་རྒྱ་མཚོར་དེད་དཔོན་བསོད་ནམས་ཁྱིམ་ལག་རྐྱལ་གྱིས་རྒལ་བ་ལས་རིག་པར་བྱ་བ་ལྟ་བུ་གང་ཡིན་པ་དེ་ནི་བརྩོན་འགྲུས་སོ།